ຂປລ, ວັນທີ 23 ມັງກອນ ນີ້ ສະມາຄົມນັກປະພັນລາວ ຮ່ວມກັບສະມາຄົມນັກປະພັນ ແຂວງສະຫວັນນະເຂດ ໄດ້ໄປມອບເຄື່ອງຊ່ວຍເຫລືອໃຫ້ໂຮງຮຽນຊົນເຜົ່າບ້ານແດນວິໄລ ເມືອງນອງ ແຂວງສະ ຫວັນນະເຂດ. ເຄື່ອງທີ່ເອົາໄປຊ່ວຍ ເຫລືອໃນຄັ້ງນີ້ ມີຜ້າຫົ່ມ, ເຄື່ອງນຸ່ງຫົ່ມ, ນໍ້າດື່ມ, ນ້ຳນົມ, ໝີ່ສຳເລັດຮູບ, ປື້ມຂຽນ, ບິກສໍ, ປື້ມເລື່ອງຕ່າງໆ, ວາລະສານ ແລະ ອື່ນໆ ລວມມູນຄ່າ 26.376.000 ກີບ.
ພິທີມອບເຄື່ອງດັ່ງກ່າວ, ໄດ້ຈັດຂຶ້ນທີ່ໂຮງຮຽນມໍຕົ້ນແດນວິໄລ ເມືອງນອງ ແຂວງສະຫວັນນະເຂດ ຕາງໜ້າໃຫ້ສະມາຄົມນັກປະພັນລາວ ມອບໂດຍທ່ານ ຫົງເຫີນ ຂຸນພິທັກ, ກ່າວຮັບໂດຍທ່ານ ບຸນທັນ ແສງສຸລິນ ຫົວໜ້າອຳນວຍການໂຮງ ຮຽນມໍຕົ້ນແດນວິໄລ, ໂດຍຊ້ອງໜ້າຂອງທ່ານ ບຸນຍົງ ວັນນາລີ ຮອງເຈົ້າເມືອງໆນອງ, ທ່ານ ກາດຳ ເຜີຍຊະນະວົງ ຫົວໜ້າພະແນກສຶກສາເມືອງນອງ, ພ້ອມດ້ວຍນັກຮຽນ, ນັກປະພັນ, ຈາກສູນກາງ ແລະ ແຂວງ ດັ່ງກ່າວເຂົ້າຮ່ວມ.
ໂຮງຮຽນມໍຕົ້ນແດນວິໄລ ສ້າງຕັ້ງຂຶ້ນໃນວັນທີ 25/02/2013, ຕັ້ງຫ່າງຈາກເທສະບານເມືອງນອງ ໄປທາງທິດຕາເວັນອອກປະມານ 40 ກມ, ເປັນໂຮງຮຽນແຫ່ງທີ່ 5 ໃນຈຳນວນໂຮງຮຽນທັງໝົດ 6 ແຫ່ງ ເມືອງນອງ, ມີ 13 ບ້ານ ທີ່ມາຮຽນຢູ່ ມໍຕົ້ນແດນວິໄລ, ໃນເບື້ອງຕົ້ນ ມີນັກຮຽນທັງໝົດ 20 ຄົນ, ຍິງ 5 ຄົນ, ມີຄູສອນ 4 ຄົນ, ຍິງ 2 ຄົນ, ມາຮອດສົກຮຽນ 2015-2016 ມີ ນັກຮຽນ 90 ຄົນ, ຍິງ 25 ຄົນ. ໂຮງຮຽນແຫ່ງນີ້ ແມ່ນຮັບນັກຮຽນຢູ່ 2 ກຸ່ມ ຄື: ກຸ່ມບ້ານ ອາສີງ ແລະ ກຸ່ມບ້ານ ປະເລາະ ເຊິ່ງສອງກຸ່ມບ້ານ ມີໂຮງຮຽນປະຖົມສົມບູນ ທັງໝົດ 10 ແຫ່ງ.
ການມອບເຄື່ອງຊ່ວຍ ເຫລືອຄັ້ງນີ້ ກໍເພື່ອເປັນການຊ່ວຍເຫລືອນັກຮຽນທີ່ຍັງທຸກຍາກຢູ່ ມໍຕົ້ນແດນວິໄລ ເຊິ່ງມີສາມຊົນເຜົ່າ ຄື: ເຜົ່າປະໂກ໊ະ, ເຜົ່າມັງກອງ ແລະ ເຜົ່າຕຣີ. ໂຮງຮຽນດັ່ງກ່າວ ເປັນອາຄານກໍ່ຊັ້ນດຽວ ມີ 4 ຫ້ອງ, ມີຊັ້ນ ມ1 ແລະ ມ2 ນັກຮຽນຈຳນວນໜຶ່ງທີ່ຢູ່ຫ່າງໄກ ແມ່ນນອນຫໍພັກ ເຊິ່ງຍັງເປັນເຮືອນນອນແບບປະຖົມປະຖານ ບໍ່ມີໄຟຟ້າ, ນ້ຳກິນນ້ຳໃຊ້ ແມ່ນອາໄສທຳມະຊາດ ແລະ ຍັງຂາດເຂີນອຸປະກອນການຮຽນ ການສອນຫລາຍຢ່າງ.
ການຊ່ວຍເຫລືອຄັ້ງນີ້ ສ່ວນຫລາຍ ແມ່ນໄດ້ຈາກການລະດົມຂອງພະອາຈານ ໄພວັນ ມາລາວົງ ນັກກະວີ ລາງວັນແມ່ນ້ຳຂອງ ປີ 2015 ບວກກັບນັກປະພັນລາວ ທີ່ ຢູ່ນະຄອນຫລວງວຽງຈັນ ແລະ ສະມາຄົມນັກປະພັນສາຂາແຂວງສະຫວັນນະເຂດ.
ແຫລ່ງຂ່າວ:
