ຂປລ. ໃນວັນທີ 26 ມັງກອງນີ້ ທີ່ຫ້ອງວ່າ ການສູນກາງພັກ, ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ ປປ ລາວ ໄດ້ຕ້ອນຮັບການເຂົ້າຢ້ຽມຄຳນັບຂອງສະຫາຍ ຊົ້ງທາວ ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນ ໃນນາມຜູ້ຕາງໜ້າພິເສດຂອງສະຫາຍ ສີຈິນຜິງ ເລຂາທິການໃຫຍ່ພັກກອມມູນິດຈີນ ພ້ອມດ້ວຍຄະນະ ທີ່ເດີນທາງມາຢ້ຽມຢາມ ແລະ ຊົມເຊີຍຜົນສຳເລັດກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງພັກ ປະຊາຊົນ ປະຕິວັດລາວ.
ສະຫາຍ ເລຂາທິການໃຫຍ່ ບຸນຍັງ ວໍລະຈິດ ໄດ້ຕີລາຄາສູງ ແລະ ສະແດງຄວາມຂອບອົກຂອບໃຈຢ່າງຈິງໃຈຕໍ່ພັກກອມມູນິດຈີນ ທີ່ໄດ້ແຕ່ງຕັ້ງຄະນະ ມາຊົມເຊີຍຜົສຳເລັດກອງປະຊຸມໃຫຍ່ຄັ້ງທີ X ຂອງພັກ ປປ ລາວ ໃນຄັ້ງນີ້ ເຊິ່ງເປັນການໃຫ້ກຳລັງໃຈອັນແຮງກ້າແກ່ພັກ, ລັດຖະບານ ແລະ ປະຊາຊົນລາວບັນດາເຜົ່າ ເປັນການສະແດງໃຫ້ເຫັນເຖິງຄວາມມຸ້ງໝັ້ນ ໃນການເພີ່ມທະວີໄມຕີຈິດມິດຕະພາບ ແລະ ຄວາມໄວ້ເນື້ອເຊື່ອໃຈກັນທາງດ້ານການເມືອງ, ເສີມຂະ ຫຍາຍສາຍພົວພັນ ແລະ ຄູ່ຮ່ວມຍຸດທະສາດຮອບດ້ານ ແລະ ຮ່ວມຊະ ຕາກຳ ທີ່ມີຜົນປະໂຫຍດຮ່ວມກັນ ລະຫວ່າງສອງພັກ ສອງລັດ ລາວ-ຈີນ. ພ້ອມທັງສະແດງຄວາມພາກພູມໃຈເປັນຢ່າງຍິ່ງທີ່ເຫັນວ່າ ສາຍພົວພັນມິດຕະພາບທີ່ເປັນມູນເຊື້ອ ແລະ ການພົວພັນແບບຄູ່ຮ່ວມຍຸດທະສາດຮອບດ້ານຍາວນານ ລະຫວ່າງ ສອງພັກ ສອງລັດ ລາວ-ຈີນ ໄດ້ຮັບການເສີມຂະຫຍາຍ ແລະ ແຕກດອກອອກຜົນຍິ່ງໆຂຶ້ນ ຕາມທິດ 4 ດີ, ສອງຝ່າຍໄດ້ຮັກສາການໄປມາຫາສູ່ກັນໃນລະດັບສູງ, ມີການແລກປ່ຽນຄະນະຜູ້ແທນຂັ້ນຕ່າງໆແຕ່ສູນກາງຮອດທ້ອງຖິ່ນ ນຳກັນເປັນປະຈຳ.
ໃນໂອກາດນີ້, ສະຫາຍເລຂາທິການໃຫຍ່ ຄະນະບໍລິຫານງານສູນກາງພັກ ປປ ລາວ ໄດ້ຕາງໜ້າໃຫ້ພັກ, ລັດຖະ ບານ ແລະ ປະຊາຊົນລາວບັນດາເຜົ່າ ສະແດງຄວາມຂອບໃຈຢ່າງຈິງໃຈ ແລະ ຮູ້ບຸນຄຸນຢ່າງເລິກເຊິ່ງຕໍ່ພັກ, ລັດຖະບານ ແລະ ປະຊາຊົນຈີນອ້ານນ້ອງ ທີ່ໄດ້ໃຫ້ການຊ່ວຍເຫລືອອັນໃຫຍ່ຫລວງ ແລະ ມີປະສິດທິຜົນແກ່ພາລະກິດຕໍ່ສູ້ປົດປ່ອຍຊາດໃນເມື່ອກ່ອນ ກໍຄື ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຂອງລາວໃນປັດຈຸບັນ. ພ້ອມນັ້ນ ກໍໄດ້ ຢືນຢັນສືບຕໍ່ຢຶດໝັ້ນນະໂຍບາຍຈີນດຽວ ແລະ ຖື ສປ ຈີນ ເປັນເພື່ອນມິດຍຸດທະສາດທີ່ໃກ້ຊິດ ແລະ ໄວ້ວາງໃຈຂອງຕົນ.
ໂອກາດນີ້, ສະຫາຍ ຊົ້ງທາວ ໄດ້ສະແດງຄວາມຂອບໃຈເປັນຢ່າງສູງ ຕໍ່ການຕ້ອນຮັບອັນອົບອຸ່ນ ຂອງສະຫາຍເລຂາທິການໃຫຍ່ ແລະ ໄດ້ນຳເອົາຄວາມຢ້ຽມຢາມຖາມຂ່າວ ແລະ ອວຍພອນໄຊອັນປະເສີດຂອງສະຫາຍ ເລຂາທິການໃຫຍ່ ສີຈິນຜິງ ແລະ ບັນດາສະຫາຍການນຳຂັ້ນສູງ ຂອງພັກກອມມູນິດຈີນ ມາຍັງສະຫາຍ ບຸນຍັງ ວໍລະຈິດ ທີ່ໄດ້ຮັບການເລືອກຕັ້ງ ເປັນເລຂາທິການໃຫຍ່ຄະນະບໍລິຫານງານສູນກາງພັກ ປປ ລາວ; ຕາງໜ້າໃຫ້ພັກກອມມູນິດຈີນ ສະແດງຄວາມຊົມເຊີຍຕໍ່ຜົນສຳເລັດກອງປະຊຸມໃຫຍ່ ຄັ້ງທີ X ຂອງພັກ ປປ ລາວ ພ້ອມທັງເຊື່ອໝັ້ນຢ່າງໜັກແໜ້ນວ່າ ພາຍໃຕ້ການນຳພາຂອງ ພັກ ປປ ລາວ ໂດຍມີ ສະຫາຍ ບຸນຍັງ ວໍລະຈິດ ເປັນຜູ້ນຳໜ້ານັ້ນ, ປະຊາຊົນລາວບັນດາເຜົ່າ ຈະສືບຕໍ່ຍາດໄດ້ບັນດາຜົນສຳເລັດອັນໃໝ່ ໃຫຍ່ຫລວງກວ່າເກົ່າ ໃນພາລະກິດປ່ຽນແປງໃໝ່, ປົກປັກຮັກສາ ແລະ ສ້າງສາປະເທດຊາດ, ປະຕິບັດສຳເລັດມະຕິກອງປະຊຸມໃຫຍ່ຄັ້ງທີ X ຂອງພັກ, ສ້າງປະເທດລາວສັນຕິພາບ, ເອກະລາດ, ປະຊາທິປະໄຕ, ເອກະພາບ ແລະ ວັດທະນາຖາວອນ.
ແຫລ່ງຂ່າວ:
