ເພື່ອເປັນການເສີມຂະຫຍາຍສາຍພົວພັນຮ່ວມມື ລະຫວ່າງລັດຖະບານສອງປະເທດ ລາວ-ເບລາຣຸສ ໃຫ້ມີການເຕີບໃຫຍ່ຂະຫຍາຍຕົວ ແລະ ເຂັ້ມແຂງເປັນກ້າວໆ ຕອນເຊົ້າວັນທີ 26 ມີນາ 2014 ຢູ່ທີ່ກະຊວງການຕ່າງປະເທດ ໄດ້ມີພິທີພົບປະຄະນະຜູ້ແທນຂັ້ນສູງສອງຝ່າຍ ລາວ-ເບລາຣຸສ ຂຶ້ນ ຝ່າຍລາວນຳໂດຍທ່ານ ທອງລຸນ ສີສຸລິດ ຮອງນາຍົກລັດຖະມົນຕີ ລັດຖະມົນຕີວ່າການກະຊວງການຕ່າງປະເທດ ຝ່າຍ ເບລາຣຸສ ນຳໂດຍທ່ານ ວະລາດີເມຍ ມາກເກ ລັດຖະມົນຕີວ່າການກະຊວງການຕ່າງປະເທດ ສ.ເບລາຣຸສ.
ການພົບປະຄັ້ງນີ້ ສອງຝ່າຍໄດ້ປຶກສາຫາລື ແລະ ທົບທວນຄືນບັນດາທິດທາງການຮ່ວມມືໄລຍະຜ່ານມາ ໂດຍທ່ານ ທອງລຸນ ສີສຸລິດ ກ່າວວ່າ: ພັກ ແລະ ລັດຖະບານລາວ ຂໍສະແດງຄວາມຍ້ອງຍໍ-ຊົມເຊີຍຕໍ່ລັດຖະບານ ສ.ເບລາຣຸສ ທີ່ໄດ້ໃຫ້ການຮ່ວມມື ແລະ ຊ່ວຍເຫຼືອວຽກງານການພັດທະນາດ້ານເສດຖະກິດ-ສັງຄົມ ເປັນຕົ້ນແມ່ນການເສີມຂະຫຍາຍສາຍພົວພັນຮ່ວມມື ວຽກງານການຕ່າງປະເທດສອງຝ່າຍ ໃຫ້ມີຄວາມໜັກແໜ້ນ ແລະ ເຂັ້ມແຂງຍິ່ງຂຶ້ນ ເຊິ່ງການມາຢ້ຽມຢາມ ສປປ ລາວ ຢ່າງເປັນທາງການຂອງຄະນະຄັ້ງນີ້ ໄດ້ມີຂຶ້ນພາຍຫຼັງການເປີດກອງປະຊຸມປຶກສາຫາລືດ້ານການເມືອງ ແລະ ກອງປະຊຸມຄະນະກຳມາທິການຮ່ວມມືດ້ານເສດຖະກິດ-ການຄ້າ ວັດທະນະທຳ ວິທະຍາສາດ-ເຕັກໂນໂລຊີ ແລະ ການສະເຫຼີມສະຫຼອງວັນສ້າງຕັ້ງສາຍພົວພັນການທູດ ຄົບຮອບ 20 ປີ.
ໂອກາດການພົບປະຄັ້ງນີ້ ລັດຖະບານລາວ-ເບລາຣຸສ ຍັງໄດ້ຫາລືເຖິງການຢ້ຽມຢາມຢ່າງເປັນທາງການຄັ້ງທຳອິດຂອງທ່ານ ອາເລັກຊັນເດີ ລູກາແຊນໂກ ປະທານາທິບໍດີແຫ່ງ ສາທາລະນະລັດເບລາຣຸສ ໂດຍການຢ້ຽມຢາມຄັ້ງນີ້ ຄາດວ່າຈະມີຂຶ້ນໃນທ້າຍປີ 2014.
ທີ່ມາ : http://www.vientianemai.net/teen/khao/1/11445