ສປປ ລາວ ເປັນປະເທດໜຶ່ງທີ່ຖືກຖິ້ມລະເບີດຫຼາຍທີ່ສຸດ ໃນປະຫວັດສາດຂອງໂລກ ນັບແຕ່ປີ 1964 ເຖິງປັດຈຸບັນມີປະຊາຊົນລາວບັນດາເຜົ່າ 50 ພັນກວ່າຄົນ ໄດ້ຮັບບາດເຈັບ ແລະ ເສຍຊີວິດຍ້ອນບັນຫາລູກລະເບີດບໍ່ທັນແຕກຕົກຄ້າງ ໃນນີ້ ລວມມີລະເບີດລູກຫວ່ານ ປະມານ 30 ພັນກວ່າຄົນ ເຊິ່ງຖືກເຄາະຮ້າຍໃນສົງຄາມອິນດູຈີນ ແລະ 20 ພັນກວ່າຄົນ ໄດ້ຮັບເຄາະຮ້າຍແຕ່ປີ 1973-2012 ເຊິ່ງໃນປີ 2011 ມີຜູ້ເຄາະຮ້າຍຈາກລະເບີດບໍ່ທັນແຕກ ຈຳນວນ 99 ຄົນ ໃນນັ້ນ ເປັນເດັກນ້ອຍ 40%.
ຕໍ່ກັບບັນຫາດັ່ງກ່າວ ພັກ ແລະ ລັດຖະບານລາວ ໄດ້ເອົາໃຈໃສ່ຢ່າງຕັ້ງໜ້າ ເຂົ້າໃນຂະບວນການຈັດຕັ້ງປະຕິບັດວຽກງານກວດກູ້ລະເບີດບໍ່ທັນແຕກ ຕົກຄ້າງຢູ່ໃນ 10 ແຂວງທົ່ວປະເທດ ທີ່ມີຜົນກະທົບສູງ ປະກອບມີ: ແຂວງຫົວພັນ ຊຽງຂວາງ ຫຼວງພະບາງ ບໍລິຄຳໄຊ ຄຳມ່ວນ ສະຫວັນນະເຂດ ຈຳປາສັກ ສາລະວັນ ເຊກອງ ແລະ ແຂວງອັດຕະປື ໂດຍລັດຖະບານ ໄດ້ຊອກຫາແຫຼ່ງທຶນທັງພາຍໃນ-ຕ່າງປະເທດ ເພື່ອສຸມໃສ່ກວດກູ້ເນື້ອທີ່ດິນ ເຊິ່ງປີ 2013 ຂະແໜງການແກ້ໄຂບັນຫາລະເບີດບໍ່ທັນແຕກຕົກຄ້າງ ສາມາດລະດົມທຶນຈາກຕ່າງປະເທດໄດ້ທັງໝົດ 420 ຕື້ກີບ (ປະມານ 46,62 ລ້ານໂດລາສະຫະລັດ) ເພີ່ມຂຶ້ນ 16 ລ້ານໂດລາສະຫະລັດ ທຽບໃສ່ປີ 2012 ພ້ອມນັ້ນ ຍັງສາມາດເກັບກູ້ລະເບີດໄດ້ທັງໝົດ 82,917 ໜ່ວຍ ໃນນັ້ນ ມີລູກບົມໃຫຍ່ 73 ໜ່ວຍ ກວດກູ້ເນື້ອທີ່ດິນໄດ້ຈຳນວນ 10.514 ເຮັກຕາ ເຊິ່ງມີເນື້ອທີ່ການຜະລິດ ຈຳນວນ 3.320 ເຮັກຕາ.
ທີ່ມາ: http://www.vientianemai.net/teen/khao/1/11444