ນີ້ແມ່ນຄຳເຫັນຂອງສະຫາຍ ພັນດວງຈິດ ວົງສາ ປະທານສູນກາງແນວລາວສ້າງຊາດ ໄດ້ສະເໜີຕໍ່ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງພັກ ໃນວັນທີ 19 ມັງກອນທີ່ຜ່ານມາ, ຊຶ່ງເປັນມື້ທີ 2 ຂອງການດຳເນີນກອງປະຊຸມສຳຄັນດັ່ງກ່າວວ່າ: ພາຍໃຕ້ການນຳພາຂອງພັກແມ່ນມູນເຊື້ອ ແລະ ກຳລັງແຮງຊະນະເລີດໃນການຕັດສິນການຄົງຕົວ ແລະ ຂະຫຍາຍຕົວຂອງຊາດເຮົາ, ຍ້ອນແນວນັ້ນ ບໍ່ວ່າເວລາໃດການເພີ່ມທະວີຄວາມສາມັກຄີທົ່ວປວງຊົນເປັນໜ້າທີ່ຍຸດທະສາດອັນຍາວນານຂອງພັກເຮົາ, ເປັນຄຳຂັວນ ແລະ ແນວຄິດຊີ້ນຳໃນຕະຫລອດໄລຍະຂອງການປະຕິວັດປະເທດເຮົາ.
ຄະນະພັກສູນກາງແນວລາວສ້າງຊາດ ກ່າວວ່າ: ກອງປະຊຸມໃຫຍ່ສະໄໝທີ X ຂອງພັກຄັ້ງນີ້ ໄດ້ເນັ້ນໜັກ ແລະ ຖືເປັນສຳຄັນການເພີ່ມທະວີຄວາມສາມັກຄີເປັນປຶກແຜ່ນຂອງຊາດ ຍ້ອນມາຈາກຫລາຍປັດໄຈ, ໂດຍສະເພາະດ້ານເສດຖະກິດ, ດັ່ງນັ້ນ ໃນສະໄໝທີ IX, ພັກ ໄດ້ສຸມໃສ່ການແກ້ໄຂຄວາມທຸກຍາກຂອງປະຊາຊົນ, ພັດທະນາຊົນນະບົດ, ປະຕິບັດວຽກງານ 3 ສ້າງ, ເຮັດໃຫ້ປະຊາຊົນມີລາຍຮັບຕົວຈິງສູງຂຶ້ນເທື່ອລະກ້າວ, ເຮັດໃຫ້ປະຊາຊົນໄດ້ຮັບຜົນປະໂຫຍດດ້ານການສຶກສາ, ຮໍ່າຮຽນ, ການປິ່ນປົວສຸຂະພາບ ແລະ ຖືວຽກເຮັດງານທຳ, ເປັນປັດໄຈສຳຄັນໃນການເຕົ້າໂຮມຄວາມສາມັກຄີ, ຄວາມສະເໝີພາບດ້ານການເມືອງ, ດ້ານກົດໝາຍ ແລະ ດ້ານເສດຖະກິດວັດທະນະທຳ-ສັງຄົມ, ໄດ້ຊ່ວຍໃຫ້ພົນລະເມືອງມີສິດເສລີພາບ ຈຶ່ງມີຄວາມສາມັກຄີກັນດີ ແຕ່ຖ້າຫາກຫລຸດໂຕນກັນ ມີການຈຳແນກຊັ້ນຄົນ, ເພດ-ໄວ ແລະ ສາສະໜາໃນສັງຄົມ ກໍຈະຂາດຄວາມສາມັກຄີ
ພ້ອມນີ້ ການປະພຶດທີ່ຍຸຕິທຳ, ບໍ່ເອົາລັດເອົາປຽບກັນ, ການແກ້ ໄຂຄະດີ, ຄວາມຂັດແຍ້ງຕະຫລອດເຖິງການຊຸກຍູ້ສົ່ງເສີມການຜະລິດສິນຄ້າ, ການຄ້າຂາຍ ທີ່ມີຄວາມຍຸຕິທຳ, ທ່ຽງທຳ ເປັນການກະຕຸ້ນໃຫ້ມີຄວາມສາມັກຄີຮ່ວມມືກັນ.
ນອກຈາກນີ້ ການເພີ່ມທະວີຄວາມສາມັກຄີເປັນເອກະພາບພາຍໃນພັກ, ເປັນແບບຢ່າງ ແລະ ຮັບປະກັນໃຫ້ຄວາມສາມັກຄີປອງດອງທົ່ວປວງຊົນ ແມ່ນການເສີມຂະຫຍາຍແບບແຜນວິທີເຮັດວຽກ, ປຶກສາຫາລືປະຊາທິປະໄຕ ກົງໄປກົງມາ ເປັນເອກກະພາບ ຖ້າບໍ່ມີປະຊາທິປະໄຕ ແລ້ວຄວາມສາມັກຄີກໍບໍ່ແໜ້ນຄະນະພັກ, ພະນັກງານຫຼັກແຫຼ່ງ, ຜູ້ເປັນຫົວໜ້າຕ້ອງເປັນແບບຢ່າງກ່ອນໝູ່, ເປັນຄັນທຸງເຕົ້າໂຮມຄວາມສາມັກຄີ, ເປັນແບບຢ່າງດ້ານຄວາມຊື່ສັດບໍລິສຸດ ແລະ ທ່ຽງທຳ ຈຶ່ງເຮັດໃຫ້ຜູ້ອື່ນຮໍ່າຮຽນຕາມແບບຢ່າງທີ່ດີ, ເວົ້າລວມແລ້ວແມ່ນສ້າງຄວາມສາມັກຄີປອງດອງຂອງທຸກພາກສ່ວນ, ໃຫ້ກາຍເປັນຍຸດທະສາດ, ເປັນມູນເຊື້ອ ແລະ ອະລິຍະທຳຂອງຄົນລາວທຸກຊົນເຜົ່າ, ຊັ້ນຄົນ, ເພດ-ໄວ ແລະ ສາສະໜາໃນວົງຄະນະຍາດແຫ່ງຊາດລາວພາຍໃຕ້ແສງສະຫວ່າງມະຕິ IX ຂອງພັກ, ແນວລາວສ້າງຊາດ ຊຶ່ງເປັນພື້ນຖານການເມືອງຂອງພັກທີ່ໄດ້ມີມູນເຊື້ອສ້າງຄວາມສາມັກຄີມາເປັນເວລາ 60 ກ່ວາປີ, ນັບແຕ່ປະທານ ໄກສອນ ພົນວິຫານ, ປະທານ ສຸພານຸວົງ, ປະທານ ຄຳໄຕ ສີພັນດອນ, ຈົນເຖິ່ງປັດຈຸບັນ ດັ່ງສະຫາຍເລຂາທິການໃຫຍ່ ຈູມມາລີ ໄຊຍະສອນ ໄດ້ທຸ້ມເທເຫື່ອແຮງ, ສະຕິປັນຍາ ເພີ່ມພູນຄູນສ້າງຄວາມສາມັກຄີຂອງຊາດຕະຫຼອດມາ. ແນວລາວອິດສະຫຼະ, ແນວລາວຮັກຊາດໃນເມື່ອກ່ອນ, ແນວລາວສ້າງຊາດແຕ່ລະຂັ້ນໄດ້ເພີ່ມທະວີການສຶກສາອົບຮົມ, ເຕົ້າໂຮມຄວາມສາມັກຄີທຸກຊົນເຜົ່າໃຫ້ໄປຕາມແນວທາງຂອງພັກ, ສົ່ງເສີມການເຄົາລົບຄວາມສະເໝີພາບ, ຊ່ວຍເຫຼືອຊຶ່ງກັນ ແລະ ກັນ, ເຈືອຈານທາງດ້ານວັດທະນະທຳ, ຮີດຄອງປະເພນີ ແລະ ປຸກລະດົມເຂົ້າຮ່ວມຂະບວນການແຂ່ງຂັນຮັກຊາດພັດທະນາ, ໃນນັ້ນສູນກາງແນວລາວສ້າງຊາດໄດ້ວາງມາດຕະຖານເງື່ອນໄຂກ່ຽວກັບການສ້າງບ້ານສາມັກຄີ; ໝາຍຄວາມວ່າບ້ານນັ້ນຈະເປັນບ້ານພັດທະນາໄດ້ຕ້ອງມີຄວາມສາມັກຄີ ແລະ ແນວລາວສ້າງຊາດແຕ່ລະຂັ້ນໄດ້ລົງພົບປະກັບປະ ຊາຊົນ, ສາສະໜາ ແລະ ເຈົ້າກົກ ເຈົ້າເຫຼົ່າ, ຜູ້ຊົງຄຸນວຸດທິ, ກຳເອົາປະຊາຊົນ, ສຶກສາອົບຮົມ ແລະ ໄກ່ເກ່ຍໄກ້ໄຂຂໍ້ຂັດແຍ້ງ ເພື່ອຫັດແໜ້ນຄວາມສາມັກຄີພື້ນຖານ ແລະ ໄດ້ໃຊ້ຄວາມພະຍາຍາມເຂົ້າຮ່ວມ ຊຸກຍູ້ການ ຈັດຕັ້ງປະຕິບັດນະໂຍບາຍຊົນເຜົ່າ ໃນດ້ານເສດຖະກິດ, ວັດທະນະທຳ-ສັງຄົມ ແລະ ວຽກງານພະນັກງານຊົນເຜົ່າ, ໃນຄວາມສາມັກຄີປອງດອງ ໄດ້ສະແດງອອກຫຼາຍດ້ານແຕ່ພື້ນຖານແມ່ນ: ຈິດໃຈຮັກຊາດເອກະພາບໃນວົງຄະນະຍາດແຫ່ງຊາດ; ຈິດໃຈຊ່ວຍເຫຼືອຊຶ່ງກັນ ແລະ ກັນ ໃນທຸກກໍລະນີຫຍຸ້ງຍາກ ແລະປົກກະຕິ; ພ້ອມພຽງຮຽງໜ້າປະຕິບັດຕາມການຊີ້ນຳຂອງຄະນະພັກ; ພ້ອມກັນເຂັ້ມງວດຕາມກົດໝາຍ, ຕາມການຄຸ້ມຄອງຂອງລັດ; ເຈືອຈານດ້ານເສດຖະກິດ, ວັດທະນະທຳ, ວິຖີຊີວິດເຮັດໃຫ້ຊົນເຜົ່າຕ່າງໆຍັບເຂົ້າມໍ່ກັນ, ບໍ່ຫລຸດໂຕນກັນ; ເດັດດ່ຽວຕໍ່ສູ້ ຮັບປະກັນຄວາມຍຸດຕິທຳ, ຄວາມກ້າວໜ້າສີວິໄລໃນສັງຄົມ, ແກ້ໄຂສິ່ງຫຍໍ້ທໍ້ຕ່າງໆໃຫ້ໝົດໄປ.
ທີ່ມາ http://laophatthananews.blogspot.com