ສຳນັກຂ່າວຕ່າງປະເທດ ລາຍງານໃນວັນທີ 25 ມັງກອນຜ່ານມານີ້ວ່າ ທ່ານ ສີຈິ້ນຜິງ ປະທານປະເທດຈີນ ແລະ ທ່ານ ຮັດຊັນ ຣູຮານີ ປະທານາທິບໍດີແຫ່ງປະເທດອີຣ່ານ ໄດ້ກ່າວຖະແຫລງຂ່າວຮ່ວມກັນ ໃນລະຫວ່າງທີ່ຜູ້ນຳຈີນ ເດີນທາງໄປຢ້ຽມຢາມອີຣ່ານ ຢ່າງເປັນທາງການ ເມື່ອວັນທີ 23 ມັງກອນ 2016 ຜ່ານມານີ້ວ່າ ຈີນຈະໃຫ້ຄວາມຮ່ວມມື ໂຄງການກໍ່ສ້າງ ລະບົບເສັ້ນທາງລົດໄຟຄວາມໄວສູງ ລະຫວ່າງນະຄອນຫລວງເຕເຮຣານ ແລະ ເມືອງມັດຮັດ ເມືອງໃຫຍ່ອັນດັບທີສອງຂອງອີຣ່ານ ໂດຍຝ່າຍຈີນຈະໃຫ້ຄວາມຊ່ວຍເຫລືອ ທາງດ້ານການເງິນ ໃຫ້ແກ່ໂຄງການດັ່ງກ່າວ.
ພ້ອມດຽວກັນນັ້ນ, ໃນລະຫວ່າງເດີນທາງຢ້ຽມຢາມອີຣ່ານຂອງ ສີຈິ້ນຜິງ ຜູ້ນຳທັງສອງປະເທດ ຍັງໄດ້ມີການລົງນາມ ຂໍ້ຕົກລົງທະວິພາຄີຮ່ວມກັນເຖິງ 17 ສະບັບ ຊຶ່ງເປັນຂໍ້ຕົກລົງຮ່ວມມື ໃນຂົງເຂດພື້ນຖານໂຄງລ່າງ, ການລົງທຶນ ແລະ ສິ່ງແວດລ້ອມ ໂດຍຜູ້ນຳທັງສອງປະເທດ ຍັງໄດ້ປະກາດວ່າ ຈະຜັກດັນໃຫ້ການຄ້າລະຫວ່າງ ຈີນ-ອີຣ່ານ ໃຫ້ບັນລຸມູນຄ່າ 600 ຕື້ໂດລາ ພາຍໃນສິບປີຕໍ່ໜ້າ ຊຶ່ງຕົວເລກມູນຄ່າການຄ້າສອງຝ່າຍ ເມື່ອປີ 2014 ຜ່ານມາ ແມ່ນມີມູນຄ່າຢູ່ໃນລະດັບ 52 ຕື້ໂດລາ.
ສປ ຈີນ ແມ່ນເປັນຄູ່ຄ້າລາຍໃຫຍ່ທີ່ສຸດຂອງອີຣ່ານ ຊຶ່ງໃນໄລຍະທີ່ອີຣ່ານ ຖືກມາດຕະການຂວ້ຳບາດ ຈາກຊາດຕາເວັນຕົກ ໃນປີ 2012 ຈີນກໍຍັງຄົງຊື້ນ້ຳມັນຈາກອີຣ່ານ ເຖິງແມ່ນໄດ້ສ້າງຄວາມບໍ່ພໍໃຈ ໃຫ້ແກ່ສະຫະລັດອາເມຣິກາກໍຕາມ, ທັງນີ້ ປະທານປະເທດ ສີຈິ້ນຜິງ ກໍຍັງເປັນຜູ້ນຳຕ່າງຊາດຄົນທຳອິດ ທີ່ເດີນທາງໄປຢ້ຽມຢາມອີຣ່ານ ນັບຕັ້ງແຕ່ມີການຍົກເລີກ ມາດຕະການຂວ້ຳບາດດັ່ງກ່າວຜ່ານມາ.
ທ່ານ ຢາຕອນລາ ອາລີ ຄາເມເນ ຜູ້ນຳສູງສຸດຂອງອີຣ່ານ ໄດ້ກ່າວກັບປະທານປະເທດຈີນວ່າ ອີຣ່ານຈະເດີນໜ້າ ສົ່ງເສີມຄວາມສຳພັນກັບຕາເວັນອອກ ພ້ອມທັງຍົກຍ້ອງຈຸດຢືນອິດສະຫລະຂອງຈີນ ເທິງເວທີໂລກ ຊຶ່ງຈະຊ່ວຍໃຫ້ ຄວາມສຳພັນຍຸດທະສາດກັບອີຣ່ານ ກ້າວເຂົ້າສູ່ລວງເລິກຂຶ້ນຕື່ມ, ພ້ອມນັ້ນ ທ່ານຍັງໄດ້ກ່າວອີກວ່າ ” ລັດອິດສະລາມຈະບໍ່ລືມການຮ່ວມມືຂອງຈີນ ໃນລະຫວ່າງຍຸກແຫ່ງການຂວ້ຳບາດ “.
