ໃນວັນທີ 25 ມີນາ 2014 ທີ່ໂຮງແຮມລາວພລາຊາ ໄດ້ຈັດພິທີເຊັນບົດບັນທຶກຄວາມເຂົ້າໃຈ (MOU) ໂຄງການເຂື່ອນໄຟຟ້ານ້ຳຕົກ ນ້ຳງື່ມ 4 ລະຫວ່າງລັດຖະບານແຫ່ງ ສປປ ລາວ ໂດຍຕາງໜ້າເຊັນບົດບັນທຶກແມ່ນທ່ານ ດຣ. ບຸນທະວີ ສີສຸພັນທອງ ລັດຖະມົນຕີຊ່ວຍວ່າການກະຊວງແຜນການ ແລະ ການລົງທຶນ ແລະ ບໍລິສັດ ວີແອລວີ ຊຸມພົນພັກດີ ຈຳກັດຜູ້ດຽວ ເຊັນໂດຍທ່ານ ວິໄລວອນ ຊຸມພົນພັກດີ ປະທານບໍລິສັດດັ່ງກ່າວ ແລະ ເຊັນຮ່ວມເປັນພະຍານຂອງທັງສອງຝ່າຍ ເຊິ່ງເປັນກຽດໃນພິທີທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ຜູ້ຊີ້ນຳວຽກງານເສດຖະກິດ ພ້ອມດ້ວຍທ່ານເຈົ້າແຂວງຊຽງຂວາງ ທ່ານຫົວໜ້າລັດວິສາຫະກິດໄຟຟ້າລາວ ບັນດາທ່ານຜູ້ຕາງໜ້າຈາກກະຊວງ-ກົມກອງທີ່ກ່ຽວຂ້ອງ ອຳນາດການປົກຄອງທ້ອງຖິ່ນ ແລະ ພະນັກງານໃນບໍລິສັດດັ່ງກ່າວເຂົ້າຮ່ວມ.
ໃນພິທີ ທ່ານ ຫັດສະດີ ສີສຸລາດ ທີ່ປຶກສາບໍລິສັດ ວີແອລວີ ຊຸມພົນພັກດີ ຈຳກັດຜູ້ດຽວ ໄດ້ກ່າວວ່າ: ເຂື່ອນໄຟຟ້ານ້ຳຕົກ ນ້ຳງື່ມ 4 ຕັ້ງຢູ່ເມືອງແປກ ແຂວງຊຽງຂວາງ ຫ່າງຈາກຕົວເມືອງໄປທາງທິດຕາເວັນຕົກ 30 ກິໂລແມັດ ເຊິ່ງເບື້ອງຕົ້ນຄາດວ່າຈະເຮັດເປັນ 2 ເຂື່ອນ ແຕ່ຈາກການສຶກສາພົບວ່າ ອາດມີຜົນກະທົບຫຼາຍດ້ານ ຈຶ່ງຊອກຫາທາງເລືອກທີ່ໄດ້ຮັບຜົນກະທົບໜ້ອຍທີ່ສຸດ ແລະ ມີປະສິດທິຜົນສູງສຸດກໍ່ຄື ການເຮັດເຂື່ອນດຽວ ໂດຍເຮັດເປັນເຂື່ອນເບຕົງຍາວ 254 ແມັດ ສູງ 74,5 ແມັດ ມີເນື້ອທີ່ອ່າງໂຕ່ງນ້ຳ 1.748 ກິໂລຕາແມັດ ເນື້ອທີ່ອ່າງເກັບນ້ຳ 9,2 ກິໂລຕາແມັດ ພ້ອມທັງສ້າງອຸບມຸງສົ່ງນ້ຳ ຍາວ 14 ກິໂລແມັດ ຕິດຕັ້ງຈັກ 2 ໜ່ວຍ ລວມກຳລັງຕິດຕັ້ງ 220 ເມັກກາວັດ ສາມາດຜະລິດໄຟຟ້າສະເລ່ຍໄດ່ 822 ກິໂລວັດໂມງຕໍ່ປີ ລວມມູນຄ່າການລົງທຶນ 2.500 ຕື້ກວ່າກີບ (322 ລ້ານໂດລາສະຫະລັດ) ເປັນການລົງທຶນຂອງພາກເອກະຊົນລາວ 100% ເຊິ່ງດຳເນີນງານ ແລະ ມອບໂອນຄືນໃຫ້ລັດຖະບານ (BOT) ແລະ ຄາດວ່າຈະໃຊ້ເວລາໃນການພັດທະນາໂຄງການ 5 ປີ ໂດຍຈະວ່າຈ້າງບໍລິສັດທີ່ມີຊື່ສຽງ ແລະ ມີບົດຮຽນປະສົບການມາຮ່ວມພັດທະນາໂຄງການ ການຜະລິດໄຟຟ້າ ແມ່ນຈະຕອບສະໜອງຮັບໃຊ້ພາຍໃນປະເທດທັງໝົດ ໂດຍເຊື່ອມຕໍ່ເຂົ້າລະບົບກະແສໄຟຟ້າຂອງລັດວິສາຫະກິດໄຟຟ້າລາວ.
ເຂື່ອນໄຟຟ້ານ້ຳຕົກ ນ້ຳງື່ມ 4 ຈະເປັນອີກເຂື່ອນໜຶ່ງທີ່ສາມາດຕອບສະໜອງ ໃຫ້ແກ່ການຂາດແຄນກະແສໄຟຟ້າພາຍໃນປະເທດ ແລະ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງແຂວງ ສາມາດຍົກລະດັບຊີວິດການເປັນຢູ່ ແລະ ແກ້ໄຂຄວາມທຸກຍາກຂອງພໍ່ແມ່ປະຊາຊົນລາວບັນດາເຜົ່າ ໃຫ້ຫຼຸດລົງເທື່ອລະກ້າວ ພ້ອມທັງສາມາດດັດສົມນ້ຳຈາກເຂື່ອນນ້ຳງື່ມ 4 ໃຫ້ແກ່ເຂື່ອນນ້ຳງື່ມ 1 ແລະ 2 ໃຫ້ໄດ້ຮັບຜົນດີຕື່ມອີກ.
ທີ່ມາ : http://www.vientianemai.net/teen/khao/1/11441