ຄະນະນຳນະຄອນຫຼວງວຽງຈັນ ໄດ້ຕົກລົງໃຫ້ບໍລິສັດ ມິດຕະພາບພັດທະນາການກະເສດ ຈຳກັດຜູ້ດຽວ ແລະ ບໍລິສັດ ນ້ຳສາລາຄຳ ຈຳກັດ ສຳປະທານທີ່ດິນ ຈຳນວນ 148 ເຮັກຕາ ເຂດບຶງສາລາຄຳ ບ້ານສາລາຄຳ ເມືອງຫາດຊາຍຟອງ ເພື່ອພັດທະນາໃຫ້ເປັນເຂດສີຂຽວ ຜະລິດກະສິກຳຄົບວົງຈອນ ເປັນຕົ້ນແມ່ນລ້ຽງປາ ປູກໄມ້ທຳມະຊາດ ແລະ ປູກພືດຜັກສະອາດ ຕະຫຼາດກະສິກຳ ແລະ ຕະຫຼາດການຄ້າທົ່ວໄປ ບໍລິການທີ່ພັກອາໄສ ເຮືອນພັກ ແລະ ຮ້ານອາຫານ ພັດທະນາຄອງລະບາຍນ້ຳສາທາລະນະ ພັດທະນາອ່າງເກັບນ້ຳສະອາດ ກິດຈະກຳກີລາເທິງນ້ຳ ແລະ ບົກ ກໍ່ສ້າງເສັ້ນທາງ ແລະ ຮ່ອງລະບາຍນ້ຳ ກໍ່ສ້າງຫ້ອງທົດລອງ ຫ້ອງສາທິດ ແລະ ຫ້ອງເຝິກອົບຮົມດ້ານກະສິກຳ ເຊິ່ງມີໄລຍະສຳປະທານ 70 ປີ ຄາດຄະເນມູນຄ່າລົງທຶນເບື້ອງຕົ້ນ ປະມານ 40 ລ້ານກວ່າໂດລາສະຫະລັດ ຫຼື ປະທານ 320 ຕື້ກວ່າກີບ.
ພິທີລົງນາມໃຫ້ສຳປະທານທີ່ດິນດັ່ງກ່າວ ໄດ້ຈັດຂຶ້ນໃນວັນທີ 25 ມີນາ 2014 ຢູ່ຟາມກາບຊ້ອນ ບ້ານສາລາຄຳ ເມືອງຫາດຊາຍຟອງ ນະຄອນຫຼວງວຽງຈັນ ລະຫວ່າງທ່ານ ພູຂົງ ບັນນະວົງ ຫົວໜ້າພະແນກແຜນການ ແລະ ການລົງທຶນ ນະຄອນຫຼວງວຽງຈັນ ແລະ ທ່ານນາງ ກາບຊ້ອນ ກໍລະສັກ ຜູ້ອຳນວຍການບໍລິສັດ ມິດຕະພາບພັດທະນາການກະເສດ ຈຳກັດຜູ້ດຽວ ແລະ ທ່ານ ເດັ່ນວິໄລ ທີຣະວົງ ຜູ້ອຳນວຍການບໍລິສັດ ນ້ຳສາລາຄຳ ຈຳກັດ ໂດຍມີທ່ານ ສາຍທອງ ແກ້ວດວງດີ ຮອງເຈົ້າຄອງນະຄອນຫຼວງວຽງຈັນ ທ່ານ ສຈ.ດຣ. ຄຳຜາດ ສຸລິນພູມມີ ລັດຖະມົນຕີຊ່ວຍວ່າການ ກະຊວງກະສິກຳ-ປ່າໄມ້ ທ່ານ ບຸນທາມ ພຸດທະວົງສາ ເຈົ້າເມືອງຫາດຊາຍຟອງ ມີບັນດາຫົວໜ້າກົມ ຮອງກົມ ແລະ ພະນັກງານທີ່ກ່ຽວຂ້ອງ ແລະ ອຳນາດການປົກຄອງຈາກ 6 ບ້ານເຂົ້າຮ່ວມເປັນສັກຂີພິຍານ.
ທີ່ມາ :http://www.vientianemai.net/teen/khao/1/11440