ພາຍຸ​ຫິມະ “​ໂຈ​ນາສ” ​ຕົກ​ຢູ່​ໃນ​ພື້ນ​ທີ່​ຕາ​ເວັນ​ອອກ​ຂອງ​ອາ​ເມ​ລິ​ກາ​ນັບ​ຕັ້ງ​ແຕ່​ວັນ​ທີ 22-24 ມັງກອນ​ທີ່​ຜ່ານ​ມາ ​ເຮັດ​ໃຫ້​ມີ​ຜູ້​ເສຍ​ຊີວິດ​ແລ້ວ 24 ຄົນ ​ແລະ ສ້າງ​ຄວາມ​ເສຍ​ຫາຍ​ຢ່າງ​ໜັກ​ໃຫ້​ແກ່​​ເສດຖະກິດ.

ສຳນັກ​ຂ່າວ​ຕ່າງປະ​ເທດ​ລາຍ​ງານ​ຈາກ​ນະຄອນຫຼວງ​ນິວຢ​ອກຂອງ​ອາ​ເມ​ລິ​ກາ​ວ່າ ສຳນັກງານ​ອຸຕຸນິຍົມ​ວິທະຍາ​ອາ​ເມ​ລິ​ກາ(​ເອັນ​ດັບ​ເບິ​ລຢູ​ເອສ)ສາມາດ​ວັດ​ແທກ​ປະລິມານ​ຫິມະ​ຕົກ​ສະ​ສົມ​ຢູ່​ທີ່​ສວນສາທາລະນະ​ເຊັນ​ທຣັລ ​ປາກ ​ໃນ​ນິວຢອກ​ໄດ້ 68 ຊັງ​ຕີ​ແມັດ ​ໃນ​ວັນ​ທີ 24 ມັງກອນ ຖື​ເປັນ​ລະດັບ​ສູງ​ສຸດ​ເປັນອັນ​ດັບ 2 ​ໃນ​ປະຫວັດສາດ​ນັບຕັ້ງ​ແຕ່​ມີ​ການ​ບັນ​ທຶກ​ສະຖິຕິ​ໃນ​ປີ 1869 ​ແລະ ປະລິມານ​ຫິມະ​ຕົກ​ສະ​ສົມ​ໃນ​ນະ​ຄອນ​ວໍ​ຊີງ​ຕັນ​ຢູ່​ທີ່​ປະມານ 55 ຊັງ​ຕີ​ແມັດ, ຂະນະ​ດຽວ​ກັນ​ອິດ​ທິພົນ​ຂອງ​ພະຍຸ​ຫິມະ “​ໂຈ​ນາສ” ສົ່ງ​ຜົນ​ກະທົບ​ຢ່າງ​ໜັກ​ຕໍ່​ລະບົບ​ຂົນ​ສົ່ງ​ມວນ​ຊົນ​ເຊັ່ນ: ລົດ​ໄຟ ​ແລະ ລົດ​ເມ​ປະຈຳ​ທາງ ທີ່​ໃຫ້​ບໍລິການ​ຈຳກັດ ​ເນື່ອງ​ຈາກ​ສະພາບ​ອາກາດ​ໜາວ​ແຮງ​ສ້າງ​ຄວາມ​ເສຍ​ຫາຍ​ຕໍ່​ລະບົບ​ລາງລົດ​ໄຟ ​ແລະ ສາຍ​ກາ​ນບິນ​ຕ້​​ອງ​ໄດ້​ຍົກ​ເລີກ​ຖ້ຽວ​ບິນ​ຫຼາຍ​ກວ່າ 12 ພັນ​ຖ້ຽວ, ​​ສ່ວນ​ຂອງ​ຈຳນວນ​ຜູ້​ເສຍ​ຊີວິດ​ໃນ​ຄັ້ງ​ນີ້​ຢູ່​ທີ່ 24 ຄົນ ​ໂດຍ​ສາຍ​ເຫດ​ຂອງ​ການ​ເສຍ​ຊີ​ວິດ​ສ່ວນ​ໃຫຍ່​ກ່ຽວຂ້ອງ​ກັບ​ອຸບັດ​ເຫ​ດທາງ​ລົດ.

ທັງ​ນີ້ ​ມີ​ການ​ວິ​ເຄາະ​ວ່າ ອິທິພົນ​ຂອງ​ພະຍຸ​ອາດ​ສ້າງ​ຄວາມ​ເສຍ​ຫາຍ​ຕໍ່​ເສດຖະກິດ​ໃຫ້​ກັບ​ພາກ​ຕາ​ເວັນ​ອອກ​ຂອງ​ອາ​ເມ​ລິ​ກາລະ​ຫວ່າງ 585-850 ລ້ານ​ໂດ​ລາ​ສະຫະລັດ.

ທີ່ມາ: