ໃນຕອນບ່າຍວັນທີ 21 ມັງກອນຜ່ານມາ ທີ່ຫ້ອງປະຊຸມພະແນກຊັບພະຍາກອນທຳມະຊາດ ແລະສິ່ງແວດລ້ອມ ແຂວງອຸດົມໄຊ ໄດ້ມີພິທີເຊັນສັນຍາສຳປະທານດິນຂອງລັດ ເພື່ອພັດທະນາສວນຢາງພາລາຢູ່ເມືອງນາໝໍ້ ແຂວງອຸດົມໄຊ ລະຫວ່າງພະແນກຊັບພະຍາກອນທຳມະຊາດ ແລະສິ່ງແວດລ້ອມແຂວງກັບທ່ານ ນາງ ຫຍົງຈີນຊຽວ.
ໃນສັນຍາໄດ້ຕົກລົງມອບສິດພັດທະນາດິນ ເພື່ອພັດທະນາສວນຢາງພາລາຢູ່ເຂດບ້ານຫ້ວຍແຮ, ບ້ານພູທອງ, ບ້ານຫ້ວຍອອນ ແລະບ້ານປາງດູ ເມືອງນາໝໍ້ໃນເນື້ອທີ່ທັງໝົດ 420 ກວ່າເຮັກຕາ ໃຫ້ທ່ານນາງ ຫຍົງຈີນຊຽວ ສຳປະທານເພື່ອນຳໃຊ້ເຂົ້າໃນການພັດທະນາສວນຢາງພາລາໃນໄລຍະເວລາ 30 ປີ ເລີ່ມແຕ່ປີ 2015 ເຖິງປີ 2045 ໃນນັ້ນ ຈະຍົກເວັ້ນຄ່າສຳປະທານເປັນຈ່າຍຄ່າທຳນຽມທີ່ດິນໄລຍະເວລາ 4 ປີ (2015-2019) ເນື່ອງຈາກຕົ້ນຢາງພາລາຍັງນ້ອຍບໍ່ສາມາດປາດໄດ້ ແລະຈະຊຳລະຄ່າສຳປະທານເລີ່ມແຕ່ປີ 2019 ເປັນຕົ້ນໄປ ພ້ອມທັງປະຕິບັດການຊຳລະຄ່າສຳປະທານຕາມລັດຖະບັນຍັດຂອງປະທານປະເທດ ແລະດຳລັດຂອງນາຍົກລັດຖະມົນຕີວ່າດ້ວຍການເອົາທີ່ດິນຂອງລັດໃຫ້ເຊົ່າ ຫຼື ສຳປະທານ.
ຕາງໜ້າພະແນກຊັບພະຍາກອນທຳມະຊາດ ແລະສິ່ງແວດລ້ອມແຂວງ ລົງນາມໂດຍທ່ານ ທອງຈັນ ສຸກສັກດາ ຮອງຫົວໜ້າພະແນກຊັບພະຍາກອນທຳມະຊາດ ແລະສິ່ງແວດລ້ອມ ແລະຕາງໜ້າຜູ້ສໍາປະທານລົງນາມໂດຍທ່ານນາງ ຫຍົງ ຈີນຊຽວ ຜູ້ສຳປະທານ, ມີຕາງໜ້າຈາກພະແນກການ, ຂະແໜງການທີ່ກ່ຽວຂ້ອງ ແລະຫ້ອງການຂັ້ນເມືອງເຂົ້າຮ່ວມເປັນສັກຂີພິຍານ.
ທີ່ມາ: