ສະຫາຍ ນາງ ແສງເດືອນ ຫລ້າຈັນທະບູນ ລັດຖະມົນຕີຊ່ວຍວ່າການ ກະຊວງສຶກສາທິການ ແລະ ກິລາ ໄດ້ມີຄຳເຫັນຕໍ່ກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ X ຂອງພັກ, ຊຶ່ງໄດ້ສຳເລັດລົງໃນວັນທີ 22 ມັງກອນນີ້, ກ່ຽວກັບຜົນສຳເລັດຂອງ ການປະຕິຮູບລະບົບການສຶກສາແຫ່ງຊາດ ຂອງປະເທດເຮົາວ່າ: ລະບົບການສຶກສາແຫ່ງຊາດ ໄດ້ຮັບການປັບປຸງ ແລະ ຂະຫຍາຍຕົວຢ່າງຕໍ່ເນື່ອງ ແຕ່ລະປີຈຳນວນຜູ້ຮຽນໄດ້ເພີ່ມຂຶ້ນ ສາມາດບັນລຸຄາດໝາຍຂອງແຜນງານແຫ່ງຊາດການສຶກສາເພື່ອທຸກຄົນ ກໍຄືເປົ້າໝາຍສະຫັດສະວັດດ້ານການພັດທະນາປີ 2015 ກ່ຽວກັບອັດຕາເຂົ້າຮຽນຂອງນັກຮຽນ ໃນສາຍສາມັນສຶກສາ ເປັນຕົ້ນ ໄດ້ປະກາດຈົບຊັ້ນປະຖົມບຳລຸງທົ່ວປະເທດເປັນທາງການ ໃນເດືອນສິງຫາ 2015 ຜ່ານມານີ້, ມາຮອດປັດຈຸບັນມີ 57 ເມືອງ, 2 ແຂວງ ແລະ ນະຄອນຫລວງວຽງຈັນ ໄດ້ປະກາດຈົບຊັ້ນມັດທະຍົມຕອນຕົ້ນ; ພ້ອມນີ້ ໄດ້ປັບປຸງ ແລະ ຈັດລະບົບການຈັດການຮຽນ-ການສອນ ໃຫ້ຮັດກຸມກວ່າເກົ່າ ເພື່ອເອົາຄຸນນະພາບ ດ້ວຍການປ່ຽນແປງວິທີການຮັບນັກຮຽນເຂົ້າຮຽນ, ສົ່ງເສີມເພດຍິງ, ຊົນເຜົ່າ, ຜູ້ດ້ອຍໂອກາດ, ຜູ້ມີຄຸນສົມບັດດີ, ຮຽນເກັ່ງໃຫ້ໄດ້ຮຽນລະດັບສູງຂຶ້ນ ຕາມພອນສະຫວັນ ແລະ ຄວາມສາມາດຂອງເຂົາເຈົ້າ; ໄດ້ຮ່ວມມືກັບພາກເອກະຊົນທັງພາຍໃນ ແລະ ຕ່າງປະເທດ ໃນການສ້າງກຳລັງແຮງງານ, ໂດຍສະເພາະ ການສ້າງສີມືແຮງງານຢູ່ສະຖານອາຊີວະສຶກສາ.
ບັນດາມະຫາວິທະຍາໄລຂອງລາວເຮົາໄດ້ຮ່ວມມືກັບ 30 ແຫ່ງຂອງມະຫາວິທະຍາໄລຕ່າງປະເທດ, 8 ອົງການຈັດຕັ້ງສາກົນ ແລະ ໄດ້ດຳເນີນໂຄງການຄົ້ນຄວ້າວິໄຈວິທະຍາສາດ ຫລາຍກວ່າ 300 ໂຄງການ ແລະ ໄດ້ນຳເອົາຜົນການຄົ້ນຄ້ວາວິໄຈດັ່ງກ່າວຈຳນວນໜຶ່ງ ລົງພິມເຜີຍແຜ່ໃນວາລະສານວິທະຍາສາດ ໃນລະດັບສາກົນ; ໄດ້ດັດສົມຈຳນວນນັກຮຽນເຂົ້າຮຽນວິຊາສະເພາະລະດັບຕ່າງໆ ໄປຕາມທິດແບບຮູບທາດ, ຊຶ່ງເຮັດໃຫ້ກະແສນັກຮຽນເຂົ້າຮຽນວິຊາຊີບໄດ້ມີການຫັນປ່ຽນຢ່າງຈະແຈ້ງຄື: ສົກຮຽນປີ 2010-2011 ມີນັກຮຽນສາຍອາຊີວະສຶກສາ 40 ພັນກວ່າຄົນ, ມາເຖິງສົກປີ 2014-2015 ມີ 64 ພັນກວ່າຄົນ ແລະ ມີນັກສຶກສາມະຫາວິທະຍາໄລ 36 ພັນກວ່າຄົນ, ຊຶ່ງກ່ອນໜ້ານັ້ນ ຈຳນວນນັກສຶກສາມະຫາວິທະຍາໄລ ຈະຫລາຍກວ່າຈຳນວນນັກຮຽນສາຍອາຊີວະສຶກສາ ແລະ ດ້ານຄຸນນະພາບການສຶກສາ ຂອງ ສປປ ລາວ ມີທ່າອ່ຽງກ້າວສູ່ຄຸນນະພາບໃໝ່ຢ່າງຕັ້ງໜ້າ, ນັກຮຽນລາວເຮົາ ສາມາດເຂົ້າຮ່ວມແຂ່ງຂັນສີມືແຮງງານໃນລະດັບພາກພື້ນ ແລະ ເຂົ້າຮ່ວມສອບເສັງດ້ານໄອທີໃນລະດັບໂລກ ຊຶ່ງຜົນຂອງການແຂ່ງຂັນແຕ່ລະຄັ້ງ ໄດ້ດີພໍສົມຄວນ ແລະ ຢູ່ໃນຂອບມາດຖານຂອງພາກພື້ນ ແລະ ສາກົນ.
ເວົ້າລວມແລ້ວ ພື້ນຖານຂອງການປະຕິຮູບລະບົບການສຶກສາແຫ່ງຊາດ ກໍຄືການພັດທະນາຊັບພະຍາກອນມະນຸດໃນ 5 ປີ ຜ່ານມາ ດ້ານປະລິມານ ແລະ ຄຸນນະພາບໄດ້ມີຄວາມສອດຄ່ອງ ແລະ ກົມກຽວກັນດີຂຶ້ນ, ໂດຍສະເພາະແມ່ນການກໍ່ສ້າງກຳລັງແຮງງານ, ນັກວິຊາການລະດັບສູງ ແລະ ນາຍຊ່າງກຳມະກອນ ໄດ້ມີການຫັນປ່ຽນຈາກ ແບບຮູບຂັນ ກ້າວໄປສູ່ແບບຮູບທາດເທື່ອລະກ້າວ ແລະ ຄາດວ່າ: ໃນສົກປີຕໍ່ໜ້າ ຂະແໜງການສຶກສາ ຍັງຈະໄດ້ສືບຕໍ່ປັບປຸງບາງຂໍ້ຄົງຄ້າງຈຳນວນໜຶ່ງເຊັ່ນ: ອັດຕາລອດເຫລືອຂອງນັກຮຽນຊັ້ນປະຖົມ ປ1 ຮອດ ປ5 ບັນລຸພຽງແຕ່ 78,3% ເຊິ່ງຄາດໝາຍໄດ້ກຳນົດໄວ້ໃຫ້ບັນລຸ 95%, ຄຸນນະພາບຂອງການສຶກສາ ມີທ່າອ່ຽງດີຂຶ້ນ ແຕ່ຖ້າທຽບໃສ່ພາກພື້ນ ແລະ ສາກົນ ຖືວ່າຍັງຕ່ຳ, ສະພາບການກໍ່ສ້າງຊັບພະຍາກອນມະນຸດເຫລືອບໍ່ພໍ ຍັງເປັນບັນຫາທີ່ຈະຕ້ອງຮີບຮ້ອນແກ້ໄຂ ເພື່ອສາມາດຕອບສະໜອງກັບ ຄວາມຕ້ອງການຂອງຕະຫລາດແຮງງານ ໃຫ້ດີກວ່າເກົ່າ.
ແຫລ່ງຂ່າວ:
