ສຳນັກຂ່າວຕ່າງປະເທດລາຍງານວ່າ ໃນວັນທີ 19 ມັງກອນຜ່ານມານີ້ ກະຊວງວັດທະນະທຳກຳປູເຈຍ ໄດ້ຖະແຫລງວ່າ ພິພິທະພັນກີເມດຂອງປະເທດຝຣັ່ງ ໄດ້ທຳການສົ່ງຄືນຮູບແກະສະຫລັກ ສຽນເທບພະເຈົ້າຮິນດູ ທີ່ຖືກລັກອອກຈາກຜາສາດຂອມ ເມື່ອ 130 ປີກ່ອນ ຄືນໃຫ້ແກ່ກຳປູເຈຍ ໃນວັນເສົາທີ 16 ມັງກອນ 2016 ຕາມຄຳຮ້ອງຂໍຂອງລັດຖະບານກຳປູເຈຍ ພາຍຫລັງຖືກລັກລອບ ສົ່ງອອກນອກປະເທດ ໃນໄລຍະຕົກເປັນຫົວເມືອງຂຶ້ນຂອງຝຣັ່ງ ໃນປີ 1886.
ກະຊວງວັດທະນະທຳກຳປູເຈຍ ໄດ້ລະບຸວ່າ ສຽນຂອງຮູບແກະສະຫລັກດັ່ງກ່າວນີ້ ຈະຖືກນຳໄປຕໍ່ໃສ່ພາກສ່ວນລຳຕົວ ທີ່ຖືກຮັກສາໄວ້ຢູ່ ຫໍພິພິທະພັນແຫ່ງຊາດ ແລະ ຈະທຳການຈັດສະແດງ ໃຫ້ສາທາລະນະໄດ້ຮັບຊົມ ໃນວັນພະຫັດທີ 21 ມັງກອນນີ້ ແລະ ຮູບແກະສະຫລັກເຕັມຕົວ ກໍອາດຖືກນຳໄປຈັດສະແດງ ທີ່ປະເທດຝຣັ່ງ ໃນອານາຄົດອີກດ້ວຍ.
