ເວັບໄຊວິທະຍຸກະຈາຍສຽງແຫ່ງຊາດ VOV ຂອງຫວຽດນາມ ໄດ້ລາຍງານໃນວັນທີ 21 ນີ້ວ່າ ໃນວັນທີ 20 ມັງກອນ 2016 ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກກອມມູນິດຫວຽດນາມ ໄດ້ໄຂຂຶ້ນຢ່າງສົມກຽດຢູ່ສູນກອງປະຊຸມແຫ່ງຊາດ ມີ້ດິ່ງ ນະຄອນຫລວງຮ່າໂນ້ຍ. ເຂົ້າຮ່ວມກອງປະຊຸມໃຫຍ່ຄັ້ງນີ້ ມີຜູ້ແທນ 1.510 ຄົນ, ທີ່ຕາງໜ້າໃຫ້ສະມາຊິກພັກພາຍໃນທົ່ວປະເທດ 4,5 ລ້ານຄົນ ພາຍໃຕ້ຫົວຂໍ້ຂອງກອງປະຊຸມໃຫຍ່ ” ເພີ່ມທະວີການກໍ່ສ້າງພັກໃຫ້ປອດໄສ, ໝັ້ນຄົງເຂັ້ມແຂງ; ເສີມຂະຫຍາຍກຳລັງແຮງຂອງທົ່ວປວງຊົນທັງຊາດ ແລະ ປະຊາທິປະໄຕສັງຄົມນິຍົມ; ຍູ້ແຮງພາລະກິດປ່ຽນໃໝ່ຢ່າງຮອບດ້ານ, ຄົບຊຸດ; ປົກປັກຮັກສາປະເທດຊາດຢ່າງໝັ້ນຄົງ, ຮັກສາສະພາບແວດລ້ອມສັນຕິພາບ, ສະຖຽນລະພາບ; ສູ້ຊົນນຳ ຫວຽດນາມກາຍເປັນປະເທດອຸດສາຫະກຳຕາມທິດທັນສະໄໝໂດຍພື້ນຖານຢ່າງໄວ “.
ທ່ານເລຂາທິການໃຫຍ່ ຄະນະບໍລິຫານງານສູນກາງ ພັກກອມມູນິດຫວຽດນາມ ຫງວຽນຟູ໋ຈ້ອງ ໄດ້ອ່ານບົດລາຍງານຂອງຄະນະບໍລິຫານງານສູນກາງພັກຊຸດທີ XI ກ່ຽວກັບບັນດາເອກະສານຍື່ນຕໍ່ກອງປະຊຸມໃຫຍ່ຄັ້ງທີ XII. ເນັ້ນໜັກເຖິງຜົນງານຂອງ 30 ປີແຫ່ງການປ່ຽນໃໝ່, ທ່ານເລຂາທິການໃຫຍ່ ຫງວຽນຟູ໋ຈ້ອງ ຊີ້ແຈ້ງວ່າ, ໃນ 5 ປີຕໍ່ໜ້າ ຈະມີການຫັນປ່ຽນສັບສົນຫຼາຍຢ່າງທີ່ກະທົບໂດຍກົງເຖິງປະເທດຊາດ, ສ້າງເປັນກາລະໂອກາດ ແລະ ການທ້າທາຍ. ບົນພື້ນຖານນັ້ນ, ທ່ານເລຂາທິການໃຫຍ່ ຫງວຽນຟູ໋ຈ້ອງ ເນັ້ນໜັກເຖິງ 6 ໜ້າທີ່ຈຸດສຸມໃນອາຍຸການກອງປະຊຸມໃຫຍ່ຄັ້ງທີ 12, ໃນນັ້ນການພັດທະນາເສດຖະກິດສັງຄົມເປັນໃຈກາງ, ການກໍ່ສ້າງພັກເປັນກຸນແຈ, ສືບຕໍ່ປ່ຽນໃໝ່ຈີນຕະນາການ, ເດັດດຽວຮັກສາເອກະລາດແຫ່ງຊາດ, ລັດທິສັງຄົມ, ແກ້ໄຂບັນຫາເກີດໃໝ່ຢ່າງມີປະສິດທິຜົນ, ເອກະລາດ, ເປັ້ນເຈົ້າຕົນເອງ ແລະ ເຊື່ອມໂຍງເຂົ້າກັບສາກົນ.
ທ່ານເລຂາທິການໃຫຍ່ ຫງວຽນຟູ໋ຈ້ອງ ເຊື່ອໝັ້ນວ່າກອງປະຊຸມໃຫຍ່ຄັ້ງທີ XII ຈະເປັນການເຕົ້າໂຮມເຈດຈຳນົງ, ພູມປັນຍາຂອງທົ່ວພັກ, ທົ່ວປວງຊົນ ແລະ ທົ່ວກອງທັບ, ເພື່ອປະຕິບັດສຳເລັດບັນດາໜ້າທີ່ເຊິ່ງໄດ້ວາງອອກ, ຕັດສິນທິດທາງ, ຄາດໝາຍ, ໜ້າທີໃນໄລຍະ 5 ປີ (2016-2020), ກຳນົດທິດທາງໃຫ້ທົ່ວພັກ, ທົ່ວປວງຊົນ, ທົ່ວກອງທັບໃນໄລຍະ 5 ປີຕໍ່ໜ້າ.