ສະຫາຍ ສົມສະຫວາດ ເລັ່ງສະຫວັດ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ໄດ້ເປັນປະທານກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງພັກປະຊາຊົນປະຕິວັດລາວ ໃນມື້ທີ 3 ວັນທີ 20 ມັງກອນ 2016 ຢູ່ຫໍປະຊຸມແຫ່ງຊາດ ໂດຍໃນວາລະກອງປະຊຸມ ສະຫາຍ ຈັນສີ ໂພສີຄຳ ຄະນະເລຂາທິການສູນກາງພັກ ໄດ້ຕາງໜ້າອະນຸກຳມະການກົດລະບຽບ ແລະ ບຸກຄະລາກອນ ສະເໜີຮ່າງກົດລະບຽບຂອງພັກ ສະບັບປັບປຸງໃໝ່.
ຈາກນັ້ນ ສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ ກໍ່ໄດ້ສະເໜີບົດສຳຫຼວດຂອງຄະນະບໍລິຫານງານສູນກາງພັກ ສະໄໝທີ IX ຂອງພັກ ຕະຫຼອດ 5 ປີຜ່ານມາ ໂດຍສະເພາະ ການຊີ້ນຳ-ນຳພາຈັດຕັ້ງຜັນຂະຫຍາຍມະຕິ IX ຂອງພັກ ເຂົ້າສູ່ວຽກງານຕົວຈິງ ເຊິ່ງຜົນງານອັນພົ້ນເດັ່ນແມ່ນປະເທດຊາດ ມີຄວາມເປັນເອກະລາດ ອຳນາດອະທິປະໄຕສັງຄົມ ມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍໂດຍພື້ນຖານ ເສດຖະກິດແຫ່ງຊາດຂະຫຍາຍຕົວດ້ວຍຈັງຫວະໄວ ຕໍ່ເນື່ອງ ແລະ ຖືກທິດ ສິ່ງສຳຄັນແມ່ນ ສາມາດບັນລຸໃນການແກ້ໄຂຄວາມທຸກຍາກຂອງປະຊາຊົນ ເຮັດໃຫ້ລາຍໄດ້ຕົວຈິງຂອງປະຊາຊົນເພີ່ມຂຶ້ນ ຂົງເຂດວັດທະນະທຳ-ສັງຄົມ ໄດ້ຮັບການຂະຫຍາຍຕົວ ທັງດ້ານປະລິມານ ແລະ ຄຸນະພາບ ອັນພົ້ນເດັ່ນແມ່ນໄດ້ມີຜົນສຳເລັດສ່ວນໃຫຍ່ ແລະ ມີການຫັນປ່ຽນຢ່າງຈະແຈ້ງ ໃນການປະຕິບັດເປົ້າໝາຍສະຫັດສະວັດດ້ານການພັດທະນາ ລະບົບການເມືອງຂອງລະບອບປະຊາທິປະໄຕປະຊາຊົນ ໄດ້ຮັບການປັບປຸງບູລະນະໃຫ້ມີຄວາມໜັກແໜ້ນເຂັ້ມແຂງ.
ຈາກນັ້ນ ສະຫາຍ ດຣ. ບຸນປອນ ບຸດຕະນະວົງ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ກໍ່ໄດ້ຕາງໜ້າອະນຸກຳມະການກົດລະບຽບ ແລະ ບຸກຄະລາກອນ ສະເໜີມາດຖານກຳມະການສົມບູນ ແລະ ກຳມະການສຳຮອງຂອງຄະນະບໍລິຫານງານສູນກາງພັກ ໂຄງປະກອບ ແລະ ປະກາດລາຍຊື່ຜູ້ສະໝັກເຂົ້າ ໃນຄະນະບໍລິຫານງານສູນກາງພັກ ສະໄໝທີ X ນອກນີ້ ສະຫາຍ ໄຊສີ ສັນຕິວົງ ກຳມະການສູນກາງພັກ ກໍ່ໄດ້ເຊີນບັນດາຜູ້ແທນສົມບູນ ເຂົ້າຮ່ວມການຄົ້ນຄວ້າຢູ່ແຕ່ລະໜ່ວຍ ໂດຍແບ່ງເປັນ 34 ໜ່ວຍ.
ສຳລັບບັນດາແຂກຖືກເຊີນ ແມ່ນໄດ້ໄປຢ້ຽມຢາມກຸ່ມປູກຜັກປອດສານພິດ ບ້ານໂນນແຕ້ ເມືອງໄຊທານີ ເພື່ອຊົມການສາທິດການປູກຜັກປອດສານພິດຕົວແບບ ຈາກນັ້ນ ກໍ່ໄດ້ເດີນທາງໄປຟາມພັນເພັດ ເມືອງຫາດຊາຍຟອງ ເພື່ອຊົມການສາທິດວິທີປູກເຂົ້າດ້ວຍເຄື່ອງກົນຈັກ ແນໃສ່ໃຫ້ຄະນະຜູ້ແທນໄດ້ຮັບຮູ້ ເຂົ້າໃຈຢ່າງເລິກເຊິ່ງກ່ຽວກັບການສາທິດດັ່ງກ່າວ ພ້ອມທັງນຳເອົາບົດຮຽນໄປຈັດຕັ້ງຜັນຂະຫຍາຍຢູ່ທ້ອງຖິ່ນຂອງຕົນ ໄດ້ຢ່າງມີປະສິດທິຜົນ.
ແຫລ່ງຂ່າວ:
