ວັນທີ 20 ມັງກອນ 2016 ຄະນະຜູ້ແທນ ແລະ ແຂກເຂົ້າຮ່ວມກອງປະຊຸມໃຫຍ່ ຄັ້ງທີ X ຂອງພັກປະຊາຊົນປະຕິວັດລາວ ທີ່ຈັດຂຶ້ນລະຫວ່າງວັນທີ 18-22 ມັງກອນ 2016 ນຳໂດຍທ່ານນາງ ຍອດແກ້ວມະນີ ສຸພານຸວົງ ລັດຖະມົນຕີຊ່ວຍວ່າການ ຮອງຫົວໜ້າຫ້ອງວ່າການສູນກາງພັກ ໄດ້ລົງຢ້ຽມຢາມບໍລິສັດ ພັນເພັດພັດທະນາກະສິກຳ ຈຳກັດ ຢູ່ເມືອງຫາດຊາຍຟອງ ນະຄອນຫຼວງວຽງຈັນ ໂດຍຖືກຕ້ອນຮັບຈາກທ່ານ ທອງສະຫວັນ ມີບຸນ ປະທານບໍລິສັດ ພັນເພັດພັດທະນາກະສິກຳ ຈຳກັດ (ຟາມພັນເພັດ) ການນຳເມືອງຫາດຊາຍຟອງ ພະແນກກະສິກຳ ແລະ ປ່າໄມ້ ນະຄອນຫຼວງວຽງຈັນ ພ້ອມດ້ວຍພະນັກງານວິຊາການຈາກບໍລິສັດດັ່ງກ່າວ.
ໃນການລົງຢ້ຽມຢາມຄັ້ງນີ້ ຄະນະຜູ້ແທນໄດ້ຮັບຟັງການລາຍງານໂດຍຫຍໍ້ກ່ຽວກັບການດຳເນີນທຸລະ ກິດ ກໍ່ຄືນະໂຍບາຍການສົ່ງເສີມຂອງບໍລິສັດຕົວແບບ ຈາກທ່ານ ທອງສະຫວັນ ມີບຸນ ເຊິ່ງເຫັນວ່າຟາມພັນເພັດ ໄດ້ຮັບການສ້າງຕັ້ງຂຶ້ນໃນປີ 2008 ດ້ວຍຄວາມບຸກບືນຫ້າວຫັນຂອງທ່ານປະທານບໍລິສັດ ແລະ ການເອົາໃຈໃສ່ຊຸກຍູ້ສົ່ງເສີມຂອງພາກລັດ ແລະ ອຳນາດການປົກຄອງທ້ອງຖິ່ນ ໄດ້ເຮັດໃຫ້ທຸລະກິດຂອງບໍລິສັດເຕີບໃຫຍ່ຂະຫຍາຍຕົວເປັນກ້າວໆມາ ຟາມພັນເພັດເປັນບໍລິສັດທີ່ຊຸກຍູ້ສົ່ງເສີມຊາວກະສິກອນແບບຄົບວົງຈອນ ນັບແຕ່ທຶນຮອນ ຝຸ່ນ ແລະ ຜະລິດແນວພັນເຂົ້າລຸ້ນ 3 ໃນເນື້ອທີ່ 30 ເຮັກຕາສະໜອງໃຫ້ຊາວນາ ປະຕິຮູບລົບລ້າງໄຮ່ນານ້ອຍເປັນໄຮ່ນາໃຫຍ່ ແລະ ຊຸກຍູ້ສົ່ງເສີມຊາວນາໃຫ້ຫັນມານຳໃຊ້ເຄື່ອງກົນຈັກກະສິກຳທີ່ທັນສະໄໝ ເຂົ້າໃນການຜະລິດ ເພື່ອຫຼຸດຜ່ອນແຮງງານຄົນ ແຮງງານສັດ ຕົ້ນທຶນ ແລະ ເພີ່ມຜົນຜະລິດໃຫ້ມີປະສິດທິຜົນ ໂດຍລວມແລ້ວ ມາຮອດປັດຈຸບັນ ບໍລິສັດແມ່ນມີເຄື່ອງກົນຈັກຮັບໃຊ້ການຜະລິດກະສິກຳແບບຄົບວົງຈອນ ມີເຄື່ອງຕົກກ້າ ລົດໄຖນາໃຫຍ່ ລົດໄຖນານ້ອຍ ເຄື່ອງຈັກດຳນາ ກ່ຽວເຂົ້າ ເຄື່ອງຄັດເມັດເຂົ້າ ເຄື່ອງອົບເຂົ້າ ເຄື່ອງມັດເຟືອງ ແລະ ອື່ນໆ ອັນໄດ້ສ້າງຄວາມສະດວກໃຫ້ແກ່ຊາວກະສິກອນ ຕາມແນວທາງນະໂຍບາຍຂອງພັກ-ລັດວາງອອກ ໂດຍສະເພາະ ວຽກງານສາມສ້າງ ເຮັດໃຫ້ປະຊາຊົນຜະລິດເຂົ້າໄດ້ຫຼາຍກາຍເປັນສິນຄ້າ ແລະ ສ້າງລາຍຮັບໃຫ້ແກ່ຕົນເອງ ເຮັດໃຫ້ຄອບຄົວຫຼຸດພົ້ນອອກຈາກຄວາມທຸກຍາກເທື່ອລະກ້າວ.
ພາຍຫຼັງທີ່ບໍລິສັດໄດ້ມີນະໂຍບາຍດັ່ງກ່າວ ເຮັດໃຫ້ຊາວກະສິກອນຫຼາຍເມືອງ ໂດຍສະເພາະ ເມືອງຫາດຊາຍຟອງ ມີຄວາມສົນໃຈເຂົ້າມາຮ່ວມເປັນສະມາຊິກແຕ່ລະປີເພີ່ມຂຶ້ນ ປັດຈຸບັນ ມີຊາວນາເມືອງຫາດຊາຍຟອງ ເຂົ້າມາເປັນສະມາຊິກຫຼາຍກວ່າ 300 ຄອບຄົວ ແລະ ມີເນື້ອທີ່ 1 ພັນກວ່າເຮັກຕາ ສະເພາະລະດູນາແຊງປີ 2016 ນີ້ ແຜນການສູ້ຊົນຂອງບໍລິສັດວາງໄວ້ ໃນການສົ່ງເສີມຊາວນານຳໃຊ້ກົນຈັກ ເນື້ອທີ່ 300 ເຮັກຕາ ແລະ ມາຮອດປັດຈຸບັນ ປັກດຳສຳເລັດແລ້ວ 80% ຂອງເນື້ອທີ່ແຜນການ ແລະ ຄາດວ່າການປັກດຳຈະສຳເລັດໃນບໍ່ດົນນີ້.
ຫຼັງໄດ້ຮັບຟັງການລາຍງານຈາກເຈົ້າຂອງຟາມພັນເພັດ ແລະ ຮັບຟັງການມີຄຳເຫັນຈາກທ່ານນາງ ຍອດແກ້ວມະນີ ສຸພານຸວົງ ແລ້ວ ຄະນະຜູ້ແທນໄດ້ຢ້ຽມຊົມຂັ້ນຕອນການຕົກກ້າດ້ວຍເຄື່ອງຈັກ ການປັກດຳນາດ້ວຍເຄື່ອງຈັກ ແລະ ຢ້ຽມຊົມເຄື່ອງກົນຈັກກະສິກຳທີ່ທັນສະໄໝ ທີ່ທາງບໍລິສັດໄດ້ນຳໃຊ້ ທັງນີ້ ກໍ່ເພື່ອໃຫ້ຄະນະຜູ້ແທນທີ່ມາຈາກແຕ່ລະທ້ອງຖິ່ນໃນທົ່ວປະເທດ ໄດ້ເຫັນຕົວຈິງເພື່ອນຳເອົາບົດຮຽນຕົວຈິງຄັ້ງນີ້ ໄປເຜີຍແຜ່ໃຫ້ຊາວກະສິກອນຢູ່ທ້ອງຖິ່ນຂອງຕົນ ເພື່ອເປັນການຊຸກຍູ້ສົ່ງເສີມໃຫ້ຊາວກະສິກອນຢູ່ທ້ອງຖິ່ນຂອງຕົນ ຫັນມານຳໃຊ້ເຄື່ອງກົນຈັກເຂົ້າໃນການຜະລິດກະສິກຳນັບມື້ຫຼາຍຂຶ້ນ.
ຂ່າວແຈ້ງຕື່ມວ່າ: ໃນວັນດຽວກັນນີ້ ຄະນະຜູ້ແທນດັ່ງກ່າວ ຍັງໄດ້ໄປຢ້ຽມຊົມການຜະລິດກະສິກຳສະອາດ (ກະສິກຳອິນຊີ) ຂອງກຸ່ມຜະລິດກະສິກຳອິນຊີ ບ້ານໂນນແຕ້ ເມືອງໄຊທານີ ນະຄອນຫຼວງວຽງຈັນ ຕື່ມອີກ.
ແຫລ່ງຂ່າວ:
