ຂປລ. ທ່ານ ດຣ. ເນົາ ບຸດຕາ ຄະນະພັກ, ຫົວໜ້າຫ້ອງການກະຊວງສາທາລະນະສຸກ ໄດ້ແຈ້ງໃຫ້ຮູ້ວ່າ: ປັດຈຸບັນ ຂະແໜງສາທາລະນະສຸກ ແມ່ນ ມີຄວາມຮັບປະກັນ 100% ໃນການປ້ອງກັນ ແລະ ຮັກສາສຸຂະພາບຂອງການນຳພັກ-ລັດ ແລະ ຜູ້ແທນທີ່ເຂົ້າຮ່ວມກອງປະຊຸມ ຄັ້ງທີ X ຂອງພັກ ໂດຍໄດ້ກະກຽມຊ່ຽວຊານ ດ້ານການກັນພະຍາດ ແລະ ອາຫານປອດໄພ ຈຳນວນ 88 ທ່ານ ໄດ້ມາປະຈຳການກຽມພ້ອມເວລາເກີດເຫດການສຸກເສີນຕ່າງໆ ຕະຫລອດ 24 ຊົ່ວໂມງ ໂດຍແບ່ງເປັນສາມໜ່ວຍງານຫລັກ ຄື: ໜ່ວຍການປ້ອງກັນການລະບາດພະຍາດ ໂດຍສະເພາະ ແມ່ນພະຍາດໄຂ້ຍຸງລາຍ ແລະ ພະຍາດຕິດຕໍ່ອື່ນໆ ເຊິ່ງກ່ອນໜ້ານີ້ໜ່ວຍງານດັ່ງກ່າວ ໄດ້ລົງພົ່ນຢາ ແລະ ກວດກາ ຢູ່ສະຖານທີ່ຈັດກອງປະຊຸມ ແລະ ບໍລິເວນອ້ອມຮອບເປັນທີ່ຮຽບຮ້ອຍ ແລະ ກ່ອນນີ້ ໜ່ວຍງານຄວາມປອດໄພຂອງອາຫານ ກໍໄດ້ລົງກວດກາບັນດາຮ້ານອາຫານ, ໂຮງແຮມທີ່ຈະມີຜູ້ແທນພັກເຊົາ ໂດຍໄດ້ແນະນຳ ແລະ ເຮັດສັນຍາກັບຜູ້ປະກອບການ ຕ້ອງເອົາໃຈໃສ່ຮັກສາຄວາມສະອາດ, ສະຖານທີ່ພັກເຊົາ ແລະ ຮັບປະກັນຄຸນນະພາບຂອງອາຫານ ບໍ່ ໃຫ້ມີສານປົນເປື້ອນ. ສ່ວນໜ່ວຍງານທີ່ສາມ ແມ່ນມີໜ້າທີ່ບໍລິການປິ່ນປົວສຸຂະພາບຂອງການນຳ ແລະ ຜູ້ແທນທີ່ເຂົ້າຮ່ວມກອງປະຊຸມ ເຊິ່ງມີແພດ, ພະຍາບານ ຈຳນວນ 5 ທ່ານ ປະກອບເຄື່ອງມືຮັບໃຊ້, ຢາ ແລະ ອຸປະກອນການແພດທີ່ຈຳເປັນ ລວມທັງ ລົດຂົນສົ່ງຄົນເຈັບ ປະຈຳຢູ່ສະຖານທີ່ຈັດກອງປະຊຸມ ແລະ ໂຮງແຮມທີ່ຜູ້ແທນພັກເຊົາ ໂດຍມີການປະຈຳການ ແລະ ກຽມພ້ອມຕະຫລອດ 24 ຊົວໂມງ. ນອກຈາກນີ້ ຍັງໄດ້ກຽມລົດ ແລະ ຫ້ອງສຸກເສີນ ຢູ່ໂຮງໝໍສູນກາງແຫ່ງຕ່າງໆ ເພື່ອສາມາດຮັບມືໃນກໍລະເກີດເຫດສຸກເສີນ.
ໃນໂອກາດນີ້, ທ່ານ ດຣ. ເນົາ ບຸດຕາ ໄດ້ຮຽກຮ້ອງເຖິງຜູ້ປະກອບການດ້ານຮ້ານອາຫານ ແລະ ໂຮງແຮມ ໃຫ້ຊ່ວຍກັນຮັກສາຄວາມສະອາດ ແລະ ຮັບປະກັນຄຸນນະພາບຂອງອາຫານ ເພື່ອເຮັດໃຫ້ຜູ້ແທນທີ່ເຂົ້າຮ່ວມກອງປະຊຸມມີສຸຂະພາບແຂງແຮງ ປະກອບສ່ວນໃຫ້ການດຳເນີນກອງປະຊຸມ ຄັ້ງທີ X ຂອງພັກ ມີຜົນສຳເລັດຢ່າງຈົບງາມ.
ແຫລ່ງຂ່າວ:
