ການກຳຈັດຍຸງລາຍ ຫຼື ພາສະນະຂອງເຊື້ອໄຂ້ເລືອດອອກ ຖືວ່າມີຫຼາຍວິທີບໍ່ວ່າຈະເປັນການພົ່ນ ການໃຊ້ຊາຍອັບເດດ ແຕ່ລ່າສຸດ ບໍລິສັດ ບົວທິບກໍ່ສ້າງ ຈຳກັດ ໄດ້ນຳສະເໜີຜະລິດຕະພັນດັກຈັບການວາງໄຂ່ຍຸງລາຍ ແລະ ທຳລາຍຍຸງລາຍໂຕແກ່ ທີ່ເປັນມິດຕໍ່ສິ່ງແວດລ້ອມ ຊຶ່ງຈະເປັນກິດຈະກຳເສີມໃນການຈັດຕັ້ງປະຕິບັດ 5ປ ເປັນວິທີປ້ອງກັນ ແລະ ກຳຈັດຍຸງລາຍ ທີ່ກະຊວງສາທາລະນະສຸກວາງອອກ.
ທ່ານ ດຣ. ຊາວ ອຽກ ເຄ (Chow Aik Khoay) ນັກຄົ້ນຄວ້າກ່ຽວກັບໄຂ້ມາລາເລຍ ຈາກອົງການວັນທີມເນັດເວີກ ປະເທດມາເລເຊຍ ກ່າວວ່າ: ຜະລິດຕະພັນທີ່ນຳມາສະເໜີຄັ້ງນີ້ ເປັນການນຳໃຊ້ເຕັກນິກໃໝ່ ທີ່ບໍ່ສົ່ງຜົນກະທົບຕໍ່ສິ່ງແວດລ້ອມ ເປັນນະວັດຕະກຳທຳອິດຂອງໂລກ ທີ່ຖືກຄົ້ນຄິດ ແລະ ພັດທະນາຢູ່ປະເທດມາເລເຊຍ ແນໃສ່ເພື່ອກຳຈັດວົງຈອນຂອງຍຸງລາຍ ເລີ່ມຈາກໄຂ່ ລວມໄປເຖິງຍຸງໂຕແກ່ ເພື່ອຫຼຸດຜ່ອນພາສະນະໃນການແຜ່ເຊື້ອໄຂ້ເລືອດອອກ ເຕັກນິກນີ້ແມ່ນໄດ້ຮັບການຢັ້ງຢືນຈາກອົງການອະນາໄມໂລກ ມະຫາວິທະຍາໄລເຊນ ປະເທດມາເລເຊຍ.
ເຕັກນິກດັ່ງກ່າວ ແມ່ນຈະໄດ້ນຳໃຊ້ກະປອງຢາງ ໂດຍຕື່ມນ້ຳຢາໃສ່ ເພື່ອລໍ້ໃຫ້ຍຸງເຂົ້າໄປວາງໄຂ່ໃສ່ໃນພາສະນະດັ່ງກ່າວ ຊຶ່ງສາມາດເຮັດໃຫ້ໄຂ່ທີ່ອອກມາສາມາດແຕກອອກມາໄດ້ພຽງ 1% ເທົ່ານັ້ນ ເຖິງແມ່ນວ່າຍັງມີຍຸງທີ່ຟັກອອກມາໄດ້ ແຕ່ກໍ່ບໍ່ແຂງແຮງ ໃນທີ່ສຸດກໍ່ຕາຍໄປ ອຸປະກອນດັ່ງກ່າວ ຈະເຮັດໃຫ້ຈຳນວນຂອງຍຸງລາຍຫຼຸດລົງ.
ກອງປະຊຸມນຳສະເໜີເຕັກນິກດັ່ງກ່າວ ໄດ້ຈັດຂຶ້ນໃນວັນທີ 19 ມີນາ 2014 ທີ່ໂຮງແຮມວັນຊະນະ ຣີເວີຊາຍ ໂດຍການເຂົ້າຮ່ວມຂອງບັນດາພາກສ່ວນກ່ຽວຂ້ອງ ຊຶ່ງນອກຈາກການນຳສະເໜີກ່ອງດັກຈັບຍຸງແລ້ວ ຍັງໄດ້ນຳສະເໜີຢາສີດຍຸງ (ສະເປຣສີດຍຸງ) ຊຶ່ງສາມາດຊີດໃນປະລິດມາໜ້ອຍ ແຕ່ມີປະສິດທິພາບຂ້າຍຸງໄດ້ເປັນຢ່າງດີ.