ສຳນັກຂ່າວຕ່າງປະເທດ ລາຍງານໃນວັນທີ 15 ມັງກອນນີ້ວ່າ ກຸ່ມລັດອິດສະລາມ ຫລື ໄອເອັສ ໄດ້ອອກຖະແຫລງການ ຜ່ານສື່ສັງຄົມອອນລາຍຂອງຕົນວ່າ ເປັນຜູ້ຢູ່ເບື້ອງຫລັງເຫດລະເບີດໂຈມຕີ ແລະ ຍິງປະທະກັບເຈົ້າໜ້າທີ່ຕຳຫລວດ ໃນໃຈກາງນະຄອນຫລວງຈາກາຕາ ເມືອງຫລວງປະເທດອິນໂດເນເຊຍ ເມື່ອວັນພະຫັດທີ 14 ມັງກອນຜ່ານມາ ສົ່ງຜົນເຮັດໃຫ້ມີພົນລະເມືອງເສຍຊີວິດ 2 ຄົນ ແລະ ຄົນຮ້າຍເສຍຊີວິດອີກ 5 ຄົນ ລວມເປັນ 7 ຄົນ.
ພາຍໃນຖະແຫລງການດັ່ງກ່າວໄດ້ລະບຸວ່າ ເປົ້າໝາຍຂອງການໂຈມຕີຄັ້ງນີ້ ແມ່ນພົນລະເມືອງຊາວຕ່າງປະເທດ ທີ່ເປັນຊາດພັນທະມິດ ທີ່ດຳເນີນການເຮັດສົງຄາມກັບກຸ່ມໄອເອັສ ໂດຍຕຳຫລວດອິນໂດເນເຊຍລະບຸວ່າ ຜູ້ກໍ່ເຫດ ໄດ້ພະຍາຍາມຮຽນແບບ ເຫດກໍ່ການຮ້າຍໂຈມຕີນະຄອນຫລວງປາຣີ ປະເທດຝຣັ່ງ ເມື່ອຄັ້ງວັນທີ 13 ພະຈິກ 2015 ຜ່ານມາ.
