ກຳມາທິການເສດຖະກິດແຜນການ-ການເງິນ ສະພາແຫ່ງຊາດ 3 ປະເທດ ລາວ ຫວຽດນາມ ແລະ ກຳປູເຈຍ ພ້ອມກັນແລກປ່ຽນບົດຮຽນ ການເພີ່ມທະວີບົດບາດຂອງສະພາແຫ່ງຊາດ ໃນການຕິດຕາມກວດກາງົບປະມານແຫ່ງລັດ ກ່ອນກ້າວສູ່ການເຊື່ອມໂຍງປະຊາຄົມເສດຖະກິດອາຊຽນ ຂະນະທີ່ກອງປະຊຸມຄັ້ງຕໍ່ໄປ ສະເໜີການເຊື້ອເຊີນສະຫະພາບມຽນມາເຂົ້າຮ່ວມ ເພື່ອສ້າງຕັ້ງກົນໄກການຮ່ວມມື 4 ປະເທດອາຊຽນໃໝ່ ເພື່ອຫຼຸດຜ່ອນຄວາມແຕກໂຕນລະຫວ່າງສະມາຊິກເກົ່າ ແລະ ໃໝ່.
ທ່ານ ດຣ. ນາງ ສຸວັນເພັງ ບຸບຜານຸວົງ ກຳມະການຄະນະປະຈຳສະພາແຫ່ງຊາດ ປະທານກຳມາທິການເສດຖະກິດ ແຜນການ-ການເງິນ ກ່າວວ່າ: ກອງປະຊຸມຄັ້ງນີ້ ແມ່ນຈະໄດ້ແລກປ່ຽນບົດຮຽນພາຍໃຕ້ຫົວຂໍ້ ການເພີ່ມທະວີບົດບາດຂອງສະພາແຫ່ງຊາດ ໃນການຕິດຕາມກວດກາງົບປະມານແຫ່ງລັດ ຊຶ່ງເປັນຫົວຂໍ້ທີ່ມີຄວາມສຳຄັນ ໃຫ້ແກ່ການດຳເນີນວຽກງານຂອງກຳມາທິການເສດຖະກິດ ແຜນການ-ການເງິນ ແລກປ່ຽນບົດຮຽນກ່ຽວກັບການປະສານງານ ລະຫວ່າງກຳມາທິການເສດຖະກິດ ແຜນການ-ການເງິນ ກະຊວງການເງິນ ແລະ ອົງການກວດສອບແຫ່ງລັດ ໃນການຮັບຮອງເອົາແຜນງົບປະມານແຫ່ງລັດປະຈຳປີ ລວມໄປເຖິງບົດຮຽນໃນການຈັດຕັ້ງປະຕິບັດມາດຕະການ ໃນການແກ້ໄຂຜົນຂອງການກວດສອບ ຕໍ່ກັບບັນດາຫົວໜ່ວຍງົບປະມານທີ່ລະເມີດກົດໝາຍ ພ້ອມນັ້ນ ຈະສືບຕໍ່ຄົ້ນຄວ້າບັນດາກົນໄກຮ່ວມມືຊ່ວຍເຫຼືອເຊິ່ງກັນ ແລະ ກັນ ລະຫວ່າງກຳມາທິການ 3 ປະເທດ ລາວ ຫວຽດນາມ ແລະ ກຳປູເຈຍ ໃຫ້ໄດ້ຮັບປະສິດທິຜົນ.
3ປະເທດ ລາວ ຫວຽດນາມ ແລະ ກຳປູເຈຍ ຖືວ່າເປັນປະເທດສະຊິກອາຊຽນໃໝ່ ໃນໄລຍະທີ່ຈະເຊື່ອມໂຍງເຂົ້າເປັນປະຊາຄົມເສດຖະກິດອາຊຽນ ຊຶ່ງ 3ປະເທດ ຈະໄດ້ປະເຊີນໜ້າກັບສິ່ງທ້າທາຍອັນໃຫຍ່ຫຼວງ ໃນດ້ານການແຂ່ງຂັນດ້ານເສດຖະກິດ ແລະ ການຍາດແຍ່ງໂອກາດຈາກການເຊື່ອມໂຍງມາສູ່ທັງ 3ປະເທດໄດ້ນັ້ນ ຕ້ອງໄດ້ເອົາໃຈໃສ່ກວດກາ ແລະ ປັບປຸງຄືນລະບົບນິຕິກຳຂອງຕົນໃຫ້ມີປະສິດທິຜົນ ແລະ ສອດຄ່ອງກັບການເຊື່ອມໂຍງ.
ກອງປະຊຸມຮ່ວມ 3 ກຳມາທິການເສດຖະກິດ ແຜນການ-ການເງິນ ຣາຊະອານາຈັກກຳປູເຈຍ ສປປ ລາວ ແລະ ສສ.ຫວຽດນາມ ຈັດຂຶ້ນໃນວັນທີ 19 ມີນາ 2014 ທີ່ໂຮງແຮງລາວພຼາຊາ ນະຄອນຫຼວງວຽງຈັນ ໂດຍການເປັນປະທານຂອງທ່ານ ດຣ. ນາງ ສຸວັນເພັງ ບຸບຜານຸວົງ ມີທ່ານ ຟູງ ກົກ ຫຽນ ປະທານກຳມາທິການວຽກງານການເງິນ-ງົບປະມານ ສສ.ຫວຽດນາມ ທ່ານ ດຣ. ຈຽມຢຽບ ປະທານກຳມາທິການເສດຖະກິດ ການເງິນ ການທະນາຄານ ແລະ ການກວດສອບ ແຫ່ງຣາຊະອານາຈັກກຳປູເຈຍ ແລະ ພະນັກງານວິຊາການຂອງທັງ 3 ພາກສ່ວນ.
http://www.vientianemai.net/teen/khao/1/11404