ບັນຫາຈາກລູກລະເບີດບໍ່ທັນແຕກຕົກຄ້າງຢູ່ ສປປ ລາວ ຍັງເປັນໄພຂົ່ມຂູ່ອັນໃຫຍ່ຫຼວງຕໍ່ຊີວິດ-ຊັບສິນຂອງປະຊາຊົນບັນດາເຜົ່າ ແລະ ເປັນບັນຫາຫຍໍ້ທໍ້ ໃນການຈັດຕັ້ງປະຕິບັດວຽກງານ ພັດທະນາເສດຖະກິດ-ສັງຄົມຂອງປະເທດຊາດ ເມື່ອເຫັນໄດ້ຄວາມສຳຄັນດັ່ງກ່າວ ພັກ-ລັດຖະບານໄດ້ເອົາໃຈໃສ່ຢ່າງຕັ້ງໜ້າ ເຂົ້າໃນການຂົນຂວາຍແຫຼ່ງທຶນ ທັງພາຍໃນ-ຕ່າງປະເທດ ເພື່ອນຳໃຊ້ເຂົ້າໃນວຽກງານເກັບກູ້ລະເບີດບໍ່ທັນແຕກຕົກຄ້າງ ໃຫ້ນັບມື້ຫຼຸດໜ້ອຍຖ້ອຍລົງ.
ວັນທີ 13 ມັງກອນ 2016 ຢູ່ທີ່ໂຮງແຮມດອນຈັນພາເລດ ໄດ້ມີພິທີເຊັນບົດບັນທຶກຄວາມເຂົ້າໃຈ ລະຫວ່າງຫ້ອງການຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ (ຄຊກລ) ແລະ ອົງການເອັນພີເອ ແຫ່ງຣາຊະອານາຈັກອັງກິດ ຮ່ວມລົງນາມມີທ່ານ ບຸນເພັງ ສີສະຫວັດ ຮອງຫົວໜ້າຫ້ອງການ ຄຊກລ ແລະ ທ່ານ ສະຕີເວັນ ໂຈນັດ ຊາຄຣິດສັນ ຫົວໜ້າອົງການເອັນພີເອ ປະຈຳລາວ ມີທ່ານເອກອັກຄະຣາຊະທູດອັງກິດ ພ້ອມດ້ວຍບັນດາເຈົ້າເມືອງ ແລະ ພະນັກງານ-ວິຊາການ ກ່ຽວຂ້ອງເຂົ້າຮ່ວມ.
ສຳລັບການເຊັນສັນຍາຊ່ວຍເຫຼືອ ວຽກງານເກັບກູ້ລະເບີດບໍ່ທັນແຕກຕົກຄ້າງຢູ່ ສປປ ລາວ ມູນຄ່າ 1.020.000 ໂດລາສະຫາ ລັດ ຫຼື ປະມານ 8,1 ຕື້ກີບຄັ້ງນີ້ ຈະໄດ້ນຳໄປຈັດຕັ້ງປະຕິບັດວຽກງານສຳຫຼວດ ເຝິກອົບຮົມພະນັກງານ-ວິຊາການ ກໍ່ຄືນຳໃຊ້ເຂົ້າໃນວຽກງານກ່ຽວຂ້ອງກັບການເກັບກູ້ລະເບີດບໍ່ທັນແຕກ ຢູ່ແຂວງຊຽງຂວາງ ຈຳນວນ 4 ເມືອງຄື: ເມືອງແປກ ເມືອງພູກູດ ເມືອງຄຳ ແລະ ເມືອງໝອກໃໝ່ ເຊິ່ງໃນ 4 ເມືອງ ກໍ່ຄືແຂວງຊຽງຂວາງ ຖືໄດ້ວ່າເປັນພື້ນທີ່ ທີ່ໄດ້ຮັບຜົນກະທົບຈາກ ລູກລະເບີດບໍ່ທັນແຕກຕົກຄ້າງຫຼາຍທີ່ສຸດໃນປາງສົງຄາມ ແລະ ລັດຖະບານ ກໍ່ໄດ້ເອົາໃຈໃສ່ຢ່າງຕັ້ງໜ້າເຂົ້າໃນການແກ້ບັນຫາດັ່ງກ່າວ ດ້ວຍຄວາມຮັບຜິດຊອບສູງ ເພື່ອແນໃສ່ຍົກສູງຄຸນະພາບຊີວິດຂອງປະຊາຊົນບັນດາເຜົ່າ ໃຫ້ນັບມື້ດີຂຶ້ນເປັນກ້າວໆ.
ແຫລ່ງຂ່າວ:
