ພິທີ​ລົງ​ນາມ​ບົດ​ບັນທຶກຄວາມ​ເຂົ້າໃຈ ​ໃນ​ການ​ສຶກ​ສາຄວາມ​ເປັນ​ໄປ​ໄດ້​ໂຄງການ​ຊົນ​ລະປະທານ​ ນຳ​ໃຊ້​ນ້ຳ​ລຸ່ມ​ເຮືອນ​ຈັກເຂື່ອນ​ໄຟຟ້າ​ເຊ​ປຽນ-ເຊ​ນ້ຳ​ນ້ອຍ ເມືອງ​ສາມັກຄີ​ໄຊ ແຂວງ​ອັດ​ຕະ​ປື ໄດ້​ຈັດ​ຂຶ້ນ​ວັນ​ທີ 11 ມັງກອນ 2016 ຢູ່​ກົມ​ຊົນລະປະທານ ລະຫວ່າງທ່ານ ໄມ​ກອງ ພອນ​ພົມມະ​ວົງ ຫົວໜ້າ​ກົມ​ຊົນ​ລະ​ປະທານ ແລະ ທ່ານ Zheng Ye ປະທານ​ບໍລິສັດ ​ຊ່ຽນ​ທາຍ​ກໍ່ສ້າງ​ຂົວ-ທາງ ແລະ ຊົນລະປະທານ ຈຳກັດ ​ສປ ຈີນ ໂດຍ​ຊ້ອງ​ໜ້າ​ທ່ານ ​ດຣ. ເພັດ ພົມ​ພິ​ພັກ ລັດ​ຖະ​ມົນຕີ​ວ່າການ​ກະຊວງ​ກະສິກຳ ແລະ ປ່າໄມ້ ທ່ານ ​ດຣ. ນາມ ວິ​ຍະ​ເກດ ເຈົ້າແຂວງ​ອັດ​ຕະ​ປື ພ້ອມ​ດ້ວຍພາກສ່ວນ​ກ່ຽວຂ້ອງ.

ທ່ານ ໄມ​ກອງ ພອນ​ພົມ​ມະ​ວົງ ໄດ້​ກ່າວ​ວ່າ: ຜ່ານ​ການ​ເກັບ​ກຳຂໍ້​ມູນ​ເບື້ອງ​ຕົ້ນ​ເຫັນ​ວ່າ​ ໂຄງການຊົນລະປະທານ​ນຳ​ໃຊ້​ນ້ຳ​ລຸ່ມເຮືອນ​ຈັກ​ເຂື່ອນ​ໄຟຟ້າ​ເຊ​ປຽນ-ເຊ​ນ້ຳ​ ນ້ອຍ ເປັນ​ໂຄງການ​ຊົນ​ລະປະທານ​ແບບ​ນ້ຳ​ໄຫຼ​ເອງ ໂດຍການ​ຈັດ​ສັນ​ນ້ຳ​ຈາກ​ໂຄງການໃຫ້​ໄດ້​ປະມານ 5-7 ແມັດ​ກ້ອນຕໍ່​ວິນາທີ ຕະຫຼອດ​ປີ​ ຈະ​ສາມາດສະໜອງ​ນ້ຳ​ໃຫ້​ແກ່​ການ​ຜະລິດກະສິກຳ​ ປະມານ 6.000 ເຮັກຕາ ໃນ​ນີ້ ເນື້ອທີ່​ປູກ​ເຂົ້າ (ນາປີ ແລະ ນາແຊງ) 5.000 ເຮັກຕາ ນອກນີ້ ຍັງ​ມີ​ເນື້ອທີ່​ປູກ​ພືດ​ອຸດ​ສາ​ຫະກຳ ແລະ ພືດ​ຜັກ​ເປັນ​ສິນຄ້າ​ຈຳນວນ​ໜຶ່ງ ແຕ່​ປັດຈຸບັນ​ ແຂວງ ແລະ ເມືອງ​ສະໜອງ​ຂໍ້​ມູນ​ໃຫ້ແມ່ນ​ມີ​ເນື້ອທີ່​ທຳ​ການ​ຜະລິດ​ເຂົ້າແລ້ວ 3.000 ເຮັກຕາ ພ້ອມ​ດຽວກັນ​ຍັງ​ມີ​ເນື້ອທີ່​ລ້ຽງສັດ ການ​ປະມົງ ແລະ ປູກ​ພືດ​ອື່ນໆ​ຈຳນວນໜຶ່ງ ເຊິ່ງ​ກວມ​ເອົາ 12 ບ້ານ 2.533 ຄອບຄົວ ນອກ​ນີ້ຍັງ​ມີບ້ານເມືອງ​ໃກ້​ຄຽງ ແລະ ຜູ້​ປະກອບ​ການ​ຂະແໜງ​ກະສິກຳ​ທົ່ວໄປ​ຕື່ມ​ອີກ ໂດຍ​ຕາມ​ການ​ຄາດຄະເນ​ເບື້ອງ​ຕົ້ນ​ຂອງ​ວິຊາ​ການ ເຫັນ​ວ່າ​ໂຄງການ​ນີ້​ຂ້ອນ​ຂ້າງ​ມີປະ​ສິດທິ​ຜົນ​ສູງ ​ລະຫວ່າງ​ການ​ລົງທຶນ ແລະ ຜົນ​ໄດ້​ຮັບ ຖ້າ​ຫາກ​ມີການ​ສະໜອງ​ນ້ຳ​ໄດ້​ຕາມ​ແຜນການ.

ເພື່ອ​ປະຕິບັດ​ຕາມ​ແນວທາງນະໂຍບາຍ​ຂອງ​ພັກ ແລະ ລັດ​ຖະບານ​ໃນ​ໄລຍະ​ໃໝ່ ທີ່​ໄດ້​ກຳນົດເອົາ 7 ທົ່ງພຽງ​ໃຫຍ່ ບັນດາ​ທົ່ງພຽງ​ກາງ ແລະ ທົ່ງພຽງ​ນ້ອຍ​ທົ່ວປະເທດ ເປັນ​ຈຸດ​ສຸມ​ໃນ​ການ​ຜະລິດ​ເຂົ້າ ​ເພື່ອ​ຄ້ຳປະກັນ​ຄວາມ​ໝັ້ນຄົງ​ທາງ​ດ້ານ​ສະບຽງ​ອາຫານ ແລະ ຜະລິດ​ເປັນ​ສິນຄ້າ ໂຄງການ​ນີ້​ກໍ່​ແມ່ນ​ໂຄງການ​ໜຶ່ງ ​ທີ່ບັນຈຸ​ເຂົ້າ​ໃນ​ເປົ້າ​ໝາຍ​ດັ່ງກ່າວ ເພື່ອ​ເຮັດ​ໃຫ້ການ​ພັດທະນາ​ຊັບພະຍາກອນ​ນ້ຳ​ລຸ່ມ​ເຮືອນ​ຈັກເຂື່ອນ​ໄຟຟ້າ​ ດັ່ງກ່າວ ​ສາມາດ​ນຳໃຊ້​ເຂົ້າ​ໃນ​ການ​ຜະລິດ​ກະສິກຳໃຫ້​ເກີດ​ປະໂຫຍດ​ສູງ​ສຸດ.