ໃນວັນທີ 3 ມັງກອນ 2016 ໄດ້ເກີດເຫດລັກລົດໃຫຍ່ສີຟ້າຍີ່ຫໍ້ເຊີລີ້, ປ້າຍທະ ບຽນ ກກ 5351 ກຳແພງນະຄອນ ຂອງ ສູນກາງສະຫະພັນກຳມະບານລາວ, ຊຶ່ງແມ່ນທ້າວໂພໄຊ ອາຍຸ 18 ປີ, ຢູ່ບ້ານແກ້ວສຳພັນ, ເມືອງປາກເຊ, ແຂວງຈຳ ປາສັກ ເປັນພະນັກງານຮັກສາຄວາມປອດໄພຂອງຫ້ອງການດັ່ງກ່າວເອງເປັນຄົນລັກໄປ, ຕົກມາຮອດວັນທີ 4 ມັງກອນ ກໍ່ຖືກເຈົ້າໜ້າທີ່ ປກສ ແຂວງບໍລິຄຳໄຊ ສະກັດ ແລະກັກຕົວມາດຳເນີນຄະດີ.
ຜ່ານການສືບສວນ-ສອບສວນຂອງ ເຈົ້າໜ້າທີ່ຜູ້ກ່ຽວໄດ້ຮັບສາລະພາບວ່າ: ລະຫວ່າງເດືອນກໍລະກົດ 2015 ຕົນໄດ້ເຂົ້າມາເປັນພະນັກງານຮັກສາຄວາມປອດໄພຢູ່ສູນກາງສະຫະພັນກຳມະບານລາວ, ມີມື້ໜຶ່ງຕົນໄດ້ເອົາໜັງສືພິມເຂົ້າໄປສົ່ງໃນຫ້ອງການ ແລ້ວສັງເກດເຫັນກະແຈລົດ ໃຫຍ່ຫ້ອຍໄວ້ຂ້າງຕູ້ ຈິ່ງມີແນວຄິດຢາກ ຮຽນຂັບ, ມາຮອດວັນທີ 26 ທັນວາຕົນ ໄດ້ເຂົ້າໄປເອົາກະແຈລົດທີ່ຫ້ອຍຢູ່ຂ້າງຕູ້ ໂດຍປະຕູຫ້ອງການອັດບໍ່ແຈບ, ພາຍຫຼັງໄດ້ກະແຈລົດແລ້ວຕົນຈຶ່ງໄດ້ອອກມາຫາລົດ ແລ້ວໄດ້ຮຽນຂັບໄປມາບໍລິເວນ ເດີ່ນຫ້ອງການຈົນຮອດເວລາ 22 ໂມງຂອງວັນດຽວກັນຕົນໄດ້ນຳລົດ ແລະກະແຈໄປໄວ້ບ່ອນເກົ່າ ເພື່ອບໍ່ໃຫ້ທາງຫ້ອງ ການສົງໄສ.
ເວລາປະມານ 20 ໂມງ ຂອງວັນທີ 3 ມັງກອນ 2016 ໄດ້ເອົາລົດຄັນດັ່ງກ່າວ ມາຮຽນຂັບອີກ ຈົນຮອດເວລາປະມານ 23 ໂມງ ໄດ້ນຳເອົາລົດເຂົ້າໄປຈອດໄວ້ບ່ອນເກົ່າ ແຕ່ຕົນ ຫຼົງໄປຢ່ຽບຄັນເລັ່ງ ເຮັດໃຫ້ລົດໄປຕຳກັບກຳແພງຫ້ອງການ ແລະເຮັດໃຫ້ລົດເປ່ເພເສຍຫາຍ ເມື່ອເປັນແນວນັ້ນ ຕົນຈິ່ງມີແນວຄິດທີ່ຈະໜີຈິ່ງໄດ້ເກັບເຄື່ອງນຸ່ງໃສ່ກະເປົາ ພ້ອມເອົາ ເຄື່ອງປຣິ້ນເຕີ້ຢູ່ຫ້ອງການໄປນຳ, ຕົກມາຮອດເວລາ 3 ໂມງ ຂອງວັນທີ 4 ມັງກອນ 2016 ຕົນຈິ່ງໄດ້ຂັບລົດຄັນດັ່ງກ່າວມາທາງປາກຊັນເພື່ອກັບເມືອບ້ານຢູ່ປາກເຊ ພໍຮອດເຂດບ້ານໜອງເກິນ, ເມືອງທ່າພະບາດ, ແຂວງບໍລິຄຳໄຊ ພໍດີນ້ຳມັນລົດໝົດຕົນຈິ່ງນັ່ງຟັງເພງ ຢູ່ໃນ ລົດຈົນຮອດເວລາ 8 ໂມງຂອງວັນດຽວກັນຕົນຈິ່ງໄດ້ລັດລົດ 6 ລໍ້ທີ່ແລ່ນຜ່ານ ມາ ແລະໄດ້ຂໍຂຶ້ນລົດໄປນຳເພື່ອເອົາປິ້ນເຕີໄປຂາຍຢູ່ຕະຫຼາດປາກທວາຍໄດ້ເງິນ 60 ພັນກີບ ເມື່ອໄດ້ເງິນແລ້ວຈຶ່ງໄດ້ໄປ ຊື້ນ້ຳມັນແອັດຊັງ ແລະໄດ້ລັດລົດຮຸນໄດກັບຄືນໄປຫາລົດເພື່ອຕື່ມນ້ຳມັນແລ້ວຂີ່ລົງໄປຕາມເສັ້ນທາງເລກທີ 13 ໃຕ້ ພໍ ຮອດເວລາ 12 ໂມງ ໄດ້ຂີ່ລົດມາຮອດ ບ້ານຂາມ, ເມືອງປາກຊັນ, ແຂວງບໍລິ ຄຳໄຊ ລົດໄດ້ໝົດນ້ຳມັນອີກ, ຕົນຈິ່ງໄດ້ນັ່ງຢູ່ລົດຈົນຮອດເວລາປະມານ 13 ໂມງ ມີຄົນຂີ່ລົດວີໂກ້ ມາແວ່ຈອດຖາມ ຕົນຈິ່ງໄດ້ລົງໄປຂໍຄວາມຊ່ວຍເຫຼືອ ແລ້ວ ກໍຖືກເຈົ້າໜ້າທີ່ເຂົ້າກັກຕົວມາດຳເນີນຄະດີ.
ປະຈຸບັນ ທາງເຈົ້າໜ້າທີ່ຕຳຫຼວດພະແນກສືບສວນ-ສອບສວນ ປກສ ແຂວງບໍລິຄຳໄຊ ໄດ້ມອບຕົວ ທ້າວ ໂພໄຊ ຜູ້ຖືກຫາໃຫ້ແກ່ອຳນາດການປົກຄອງກ່າວຮັບໂດຍ ທ່ານ ພັນໂທ ລີຕູ້ ຮອງອຳນວຍການ ລັດວິສາຫະກິດບໍລິການຄວາມປອດໄພ ເພື່ອດຳເນີນຄະດີຕໍ່ຜູ້ກ່ຽວຕາມກົດໝາຍ.
ສ່ວນຊັບສິນທີ່ຍຶດກັບຄືນມາໄດ້ນັ້ນ ເຈົ້າໜ້າທີ່ຕຳຫຼວດພະແນກສືບສວນ-ສອບສວນ ປກສ ແຂວງບໍລິຄຳໄຊ ໄດ້ຈັດພິທີ ມອບຄືນໃຫ້ເຈົ້າຂອງເດີມເປັນທີ່ຮຽບຮ້ອຍແລ້ວ, ໃນຕອນບ່າຍຂອງວັນທີ 5 ມັງກອນຜ່ານມາ, ກ່າວມອບໂດຍ ທ່ານ ຮ້ອຍເອກ ສິນດາໄລ ຊຸມພົນພັກດີ ຮອງ ພະແນກສືບສວນ-ສອບສວນ ປກສ ແຂວງແລະກ່າວຮັບແມ່ນ ທ່ານ ວັນຄຳ ໄຊຍະຮັກ ຮອງຫົວໜ້າກົມກວດກາສູນກາງສະ ຫະພັນກຳມະບານລາວ ໂດຍມີເຈົ້າໜ້າທີ່ກ່ຽວຂ້ອງທັງສອງຝ່າຍເຂົ້າຮ່ວມ.
ຂ່າວຈາກ: ເສດຖະກິດ-ສັງຄົມ
