ພຸດທະສາສະນິກະຊົນ ນ້ອມສົ່ງດວງວິນຍານ ພຣະອາຈານໃຫຍ່ ມະຫາ ຈະຣູນ ວະຊິຣະຣັງສີ ທີ່ວັດໂພນພະເນົາ ນະຄອນຫຼວງວຽງຈັນ !
ວັນພະຫັດ ທີ 7 ມັງກອນ 2016 ສູນກາງ ອົງການພຸດທະສາສະໜາສັມພັນລາວ(ອ.ພ.ສ) ພ້ອມດ້ວຍອົງການຈັດຕັ້ງທີ່ກ່ຽວຂ້ອງ ແລະ ພຸດທະສາສະນິກະຊົນທັງຫຼາຍ ທັງພາຍໃນ ແລະ ຕ່າງປະເທດ ໄດ້ຈັດພິທີຊາປະນະກິດສົບພຣະອາຈານໃຫຍ່ ມະຫາ ຈະຣູນ ວະຊິຣະຣັງສີ ອະດີດຮອງປະທານສູນກາງ ອ.ພ.ສ, ຫົວໜ້າກັມມາທິການສາທາລະນູປະການ, ທີ່ປຶກສາ ອ.ພ.ສ ເມືອງໄຊເສດຖາ ແລະ ອະດີດເຈົ້າອະທິການວັດໂພນພະເນົາ ຂຶ້ນທີ່ວັດໂພນພະເນົາ ໃນຕອນບ່າຍ ເວລາ 14:00 ນາທີ.
ໃນພິທີ ຝ່າຍສົງ ມີພຣະອາຈານໃຫຍ່ ມະຫາ ບຸນມາ ສີມາພົມ ຮອງປະທານ, ຫົວໜ້າກັມມາທິການປົກຄອງສົງ ພ້ອມດ້ວຍພຣະເຖຣານຸເຖຣະ ສ່ວນຝ່າຍຄະລາວາດ ມີ ທ່ານ ດຣ.ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ພ້ອມດ້ວຍການນໍາພັກ-ລັດ ແລະ ພຸດທະສາສະນິກະຊົນທັງຫຼາຍ ເຂົ້າຮ່ວມ ເພື່ອນ້ອມສົ່ງດວງວິນຍານຂອງພຣະອາຈານໃຫຍ່ເປັນຄັ້ງສຸດທ້າຍ.
ການຈາກໄປຂອງພຣະອາຈານໃຫຍ່ ເປັນການຈາກໄປແຕ່ພຽງສັງຂານຮ່າງກາຍ ແຕ່ຄຸນງາມຄວາມດີ ແລະ ຜົນງານອັນຍິ່ງໃຫຍ່ທີ່ພຣະອາຈານໄດ້ສ້າງໄວ້ນັ້ນ ຈະຍັງຄົງຍືນຍົງ ໝັ້ນຄົງ ຢູ່ຄຽງຄູ່ກັບຊາດລາວ, ແຜ່ນດິນລາວ ແລະ ພຣະພຸດທະສາສະໜາຕະຫຼອດໄປ.
ຂ້ານ້ອຍ ຂໍນ້ອມໄວ້ອາໄລຕໍ່ການຈາກໄປຂອງພຣະອາຈານໃຫຍ່ ມະຫາ ຈະຣູນ ວະຊິຣະຣັງສີ ດ້ວຍຈິດໃຈອັນບໍລິສຸດ.
*ໂພສ ໂດຍ : ທັມມະວາທີ
(ຮູບພາບ ໂດຍ: ກອງທຶນສົ່ງເສີມພຣະສົງສາມະເນນ)