ຖືວ່າອີກບໍ່ດົນຂ້າງໜ້ານີ້ ປະເທດເຮົາ ກໍ່ຄືນະຄອນຫຼວງວຽງຈັນ ຈະໄດ້ສະຖານີລົດເມສາທາລະນະທີ່ທັນສະໄໝ ຕັ້ງຢູ່ໃຈກາງຕົວເມືອງນະຄອນຫຼວງວຽງຈັນ ເພື່ອຮອງຮັບການບໍລິການຜູ້ໂດຍສານຂອງລັດວິສາຫະກິດລົດເມ ນະຄອນຫຼວງ ເຊິ່ງປັດຈຸບັນການ ກໍ່ສ້າງໂຄງການດັ່ງກ່າວ ພວມຢູ່ໃນໄລຍະວຽກດິນ ແລະ ເຈາະເສົາເຂັມ ຄາດວ່າສອງໜ້າວຽກນີ້ ຈະສຳເລັດກາງເດືອນມັງກອນ 2016 ທີ່ຈະມາເຖິງນີ້ ພາຍຫຼັງທີ່ສຳເລັດການປັບພື້ນທີ່ ແລະ ຍົກຍ້າຍສະຖານີລົດເມ ອອກໄປຢູ່ບ່ອນຊົ່ວຄາວ ໃນທ້າຍປີ 2015.
ທ່ານ ຄຳພູນ ເຕເມລາດ ຜູ້ອຳນວຍການ ລັດວິສາຫະກິດລົດເມນະຄອນຫຼວງວຽງຈັນ ໄດ້ໃຫ້ສຳພາດໃນວັນທີ 6 ມັງກອນ 2016 ວ່າ: ໂຄງການກໍ່ສ້າງສະຖານີລົດເມ ນະຄອນຫຼວງວຽງຈັນ ເປັນອາຄານ 12 ຊັ້ນ ໂດຍການອອກແບບຂອງບໍລິສັດ NIKKEN SEKKEI ຂອງຍີ່ປຸ່ນ ໂດຍແມ່ນ ບໍລິສັດ ຈິດຈະເລີນກໍ່ສ້າງ ຈຳກັດ ເປັນຜູ້ຮັບເໝົາກໍ່ສ້າງ ແລະ ສຳປະທານ ໃນໄລຍະ ເວລາ 70 ປີ ດ້ວຍມູນຄ່າການລົງທຶນ 47,5 ລ້ານໂດລາສະຫະລັດ ຫຼື ປະມານ 370 ຕື້ກີບ ຈະໃຊ້ເວລາການກໍ່ສ້າງ 3 ປີໃຫ້ສຳເລັດ ກໍ່ຄືຕາມສັນຍາ ວັນທີ 15 ກັນຍາ 2018 ໄດ້ເປີດນຳໃຊ້ ເຊິ່ງໃນຈຳນວນ 12 ຊັ້ນຂອງອາຄານ ໄດ້ແບ່ງອອກເປັນ 2 ໂຊນຄື: ໂຊນໜຶ່ງ ປະກອບມີ 5 ຊັ້ນ ຈະເປັນບ່ອນຈອດລົດທົ່ວໄປ ສ່ວນໂຊນທີ 2 ມີ 12 ຊັ້ນ ຄືຊັ້ນ 1 ຈະເປັນສະຖານີຈອດລົດເມຊັ້ນ 2 ຈະເປັນຫ້ອງການບໍລິການຂອງລັດວິສາຫະກິດລົດເມອີກ 5 ຊັ້ນ ທັດຂຶ້ນໄປ ເປັນຮ້ານຊັບພະສິນຄ້າ ແລະ ຊັ້ນທີ່ເຫຼືອນັ້ນ ແມ່ນຫ້ອງການໃຫ້ເຊົ່າ ສ່ວນຊັ້ນດາດຟ້າ ຈະສ້າງເປັນຮ້ານອາຫານ ແລະ ເປັນບ່ອນຊົມວີວ ຕົວເມືອງນະຄອນຫຼວງວຽງຈັນ ນອກຈາກນີ້ ຍັງຈະສ້າງຂົວຂ້າມເຊື່ອມຕໍ່ລະຫວ່າງສະຖານີລົດເມ ກັບຕະຫຼາດເຊົ້າຕື່ມອີກ ເພື່ອເຮັດໃຫ້ການໄປມາຂອງປະຊາຊົນ ມີຄວາມສະດວກບໍ່ໄດ້ຂ້າມທາງ ພ້ອມນີ້ ຍັງໄດ້ມີການປັບປຸງສະຖານທີ່ ແລະ ເສັ້ນທາງທີ່ຢູ່ຂອບເຂດບໍລິເວນສະຖານີ ໃຫ້ມີຄວາມສວຍງາມ ດ້ວຍການປະດັບປະດາ ແລະ ປູກຕົ້ນໄມ້ໃສ່ ໂດຍລວມແລ້ວ ສະຖານີລົດເມແຫ່ງດັ່ງກ່າວ ພາຍຫຼັງທີ່ສຳເລັດການກໍ່ສ້າງ ຈະມີຄວາມສະດວກຫຼາຍຢ່າງ ໃນການບໍລິການຜູ້ໂດຍສານສາຍພາຍໃນ ແລະ ຕ່າງປະເທດທີ່ມີຄວາມທັນສະໄໝ ມີຄວາມເປັນລະບຽບ ແລະ ຮັບປະກັນຄວາມປອດໄພ.
ແຫລ່ງຂ່າວ:
