ຂປລ.ໃນວັນທີ 5 ມັງກອນ 2016 ທ່ານ ທອງສິງ ທຳມະວົງ ນາຍົກລັດຖະມົນຕີ ແລະ ພັນລະຍາ ພ້ອມດ້ວຍຄະນະ ໄດ້ເດີນທາງໄປຢ້ຽມຢາມ ແລະ ມອບເຄື່ອງຊ່ວຍເຫລືອ ຢູ່ແຂວງໄຊສົມບູນ. ໂດຍມີ ທ່ານ ສົມບັດ ເຢຍລີເຮີ່ ເລຂາພັກແຂວງ, ເຈົ້າແຂວງໆໄຊສົມບູນ, ພ້ອມດ້ວຍອຳນາດການປົກຄອງ ພາຍໃນແຂວງ ໃຫ້ການຕ້ອນຮັບ.
ໃນໂອກາດນີ້, ທ່ານນາຍົກລັດຖະມົນຕີ ໄດ້ຮັບຟັງການລາຍງານສະພາບພົ້ນເດັ່ນ ໃນການພັດທະນາເສດຖະກິດ–ສັງຄົມຂອງແຂວງ ໂດຍຫຍໍ້ ຈາກທ່ານເຈົ້າແຂວງ ເຊິ່ງເຫັນວ່າ: ເສດຖະກິດສືບຕໍ່ຂະຫຍາຍຕົວຢ່າງຕໍ່ເນື່ອງ ໄປຕາມທິດຫັນເປັນອຸດສາຫະກຳ ແລະ ທັນສະໄໝ, ໃນສົກປີ 2014-2015 ເສດຖະກິດ ຂະຫຍາຍຕົວໃນລະດັບ 10% ລວມຍອດຜະລິດຕະພັນພາຍໃນ (GDP) ບັນລຸໄດ້ 806 ຕື້ກວ່າກີບ, ລາຍຮັບສະເລ່ຍໃສ່ຫົວຄົນ ໄດ້ 1.206 ໂດລາສະຫະລັດ, ປະຈຸບັນ ທົ່ວແຂວງຍັງມີບ້ານທຸກຍາກທັງໝົດ 26 ບ້ານ, ອັດຕາການປົກຫຸ້ມຂອງປ່າໄມ້ ກວມ 65%, ອັດຕາການຊົມໃຊ້ນ້ຳສະອາດ ບັນລຸ 80%, ອັດຕາການຊົມໃຊ້ວິດຖ່າຍ ກວມ 60%; ມີເນື້ອທີ່ນາ 10.300 ກວ່າເຮັກຕາ ສາມາດຜະລິດໄດ້ 62.300 ກວ່າໂຕນ, ສະເລ່ຍໃສ່ຫົວຄົນ ໄດ້ຮັບເຂົ້າເປືອກ 430 ກິໂລ/ຄົນ/ປີ. ດ້ານກະສິກຳ ອັນພົ້ນເດັ່ນແມ່ນການປູກມັນຕົ້ນ, ສາລີ, ພືດຜັກຕ່າງໆ, ຢາງພາລາ. ພ້ອມກັນນັ້ນ, ກໍຍັງມີການລ້ຽງສັດໃຫຍ່ ເປັນຕົ້ນ ຄວາຍ, ງົວ ເຊິ່ງມີເຖິງ 50.000 ກວ່າໂຕ.
ພ້ອມນີ້, ທ່ານນາຍົກລັດຖະມົນຕີ ໄດ້ໃຫ້ກຽດໂອ້ລົມ ແລະ ສະເໜີບາງບັນຫາເພື່ອໃຫ້ການນຳຂອງແຂວງ ນຳໄປຄົ້ນຄວ້າ, ຊອກຫາທິດທາງ, ມາດຕະການ ເພື່ອປັບປຸງ–ແກ້ໄຂວຽກງານຈຳນວນໜຶ່ງໃຫ້ມີຄວາມຖືກຕ້ອງ–ສອດຄ່ອງ, ເດັດຂາດ ແລະ ມີປະສິດທິຜົນດີກວ່າເກົ່າ. ເປັນຕົ້ນວຽກງານການແກ້ໄຂປະກົດການຫຍໍ້ທໍ້ຕ່າງໆ ການ ໝູນໃຊ້ທ່າແຮງບົ່ມຊ້ອນຂອງແຂວງ ເຂົ້າໃນການພັດທະນາເສດຖະກິດ ແລະ ການບຳລຸງກໍ່ສ້າງພະນັກງານ ໂດຍສະເພາະ ແມ່ນໃຫ້ສຸມໃສ່ບຳລຸງກໍ່ສ້າງພະນັກງານກັບທີ່ເປັນສຳຄັນ ຕາມທິດຫັນເປັນໜຸ່ມ ໄປຄຽງຄູ່ກັບການກໍ່ສ້າງພະນັກງານທ້ອງຖິ່ນໃຫ້ຫລາຍ ແລະ ປະກອບດ້ວຍບັນດາເຜົ່າ, ທັງຮັບປະກັນໃຫ້ມີລັກສະນະຕໍ່ເນື່ອງ–ຍືນຍົງ, ເປັນລະບົບ–ຄົບຊຸດ. ພ້ອມທັງສ້າງເງື່ອນໄຂໃຫ້ມີສູນຝຶກວິຊາຊີບ, ໂຮງຮຽນວິຊາຊີບ, ສູນທົດລອງດ້ານກະສິກຳ ແລະ ອື່ນໆ ໃຫ້ເກີດຂຶ້ນຢູ່ແຂວງໄຊສົມບູນໃນອະນາຄົດ ໄດ້ໄວເທົ່າທີ່ຈະໄວໄດ້.
ໃນຕອນທ້າຍ, ຄອບຄົວຂອງທ່ານ ນາຍົກລັດຖະມົນຕີ ໄດ້ມອບເຄື່ອງຊ່ວຍເຫລືອ ໃຫ້ແກ່ກຳລັງປ້ອງກັນຊາດ ທີ່ປະຕິບັດໜ້າທີ່ຢູ່ເຂດຮາກຖານ, ຫ່າງໄກສອກຫລີກ. ສຳລັບເຄື່ອງຊ່ວຍເຫລືອຄັ້ງນີ້ ປະກອບມີຜ້າຫົ່ມ ຈຳນວນ 800 ຜືນ, ເສື້ອກັນໜາວ 800 ຜືນ ແລະ ເງິນສົດຈຳນວນໜຶ່ງ ລວມມູນຄ່າທັງໝົດປະມານ 140 ລ້ານກີບ. ນອກຈາກນັ້ນ, ກໍຍັງມີພາກສ່ວນອື່ນໄດ້ມອບເຄື່ອງຊ່ວຍເຫລືອຕື່ມອີກ ເປັນຕົ້ນອຸປະກອນສື່ສານ, ຜ້າຫົ່ມ ແລະ ເສື້ອກັນໜາວຈຳນວນໜຶ່ງ.
ແຫລ່ງຂ່າວ:
