ຂປລ. ກອງປະຊຸມໃຫຍ່ຜູ້ແທນຊາວໜຸ່ມ ປະຊາຊົນ ປະຕິວັດລາວ (ປຊຊລ) ຄັ້ງທີ VII ໄດ້ປິດລົງດ້ວຍຜົນສຳ ເລັດຢ່າງຈົບງາມ ໃນວັນທີ 31 ທັນວາ 2015 ໂດຍການເຂົ້າຮ່ວມຂອງ ສະຫາຍ ດຣ. ບຸນທອງ ຈິດມະນີ ກຳມະການກົມການເມືອງສູນກາງພັກ, ເລຂາທິການສູນກາງພັກ ປະທານຄະນະກວດກາສູນກາງພັກ, ປະທານອົງການກວດກາລັດຖະບານ ຫົວໜ້າການຕໍ່ຕ້ານສໍ້ລາດບັງຫລວງ ຂັ້ນສູນກາງ.
ເພື່ອບັນລຸເປົ້າໝາຍສຳຄັນດັ່ງກ່າວ, ຜູ້ແທນກອງປະຊຸມໄດ້ພ້ອມກັນໃຊ້ສິດຂອງຕົນ ປ່ອນບັດເລືອກຕັ້ງເລືອກຕັ້ງເອົາຄະນະບໍລິຫານງານສູນກາງ ຊປປລ ສະໄໝ ທີ VII ບົນພື້ນຖານຫລັກການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຕະຖານເງື່ອນໄຂທີ່ກຳນົດໄວ້. ກອງປະຊຸມຄັ້ງປະຖົມມະລຶກຂອງຄະນະບໍລິຫານງານ ສູນກາງ ຊປປລ ໄດ້ເປັນເອກະສັນ ເລືອກເອົາຄະນະເລຂາທິການສູນກາງ ຊປປລ ຈຳນວນ 13 ສະຫາຍ, ຍິງ 1 ສະຫາຍ. ສະຫາຍ ດຣ. ສອນທະນູ ທຳມະວົງ ເປັນເລຂາ, ສະຫາຍ ຄຳຜາ ພິມມະສອນ ເປັນຮອງເລຂາ, ສະຫາຍ ອາລຸນໄຊ ສູນນະລາດ ເປັນຮອງເລຂາ, ສະຫາຍນາງ ວິລະວອນ ພັນທະວົງ ເປັນຮອງເລຂາ ແລະ ທັງເປັນປະທານກວດກາ, ສະຫາຍ ບຸນທັນ ພົມສັກສິດ ເປັນຮອງປະທານກວດກາ ແລະ ສະຫາຍ ແສງດາວ ແກ້ວຂາວມະນີ ເປັນຮອງປະທານກວດກາ.
ສະຫາຍ ດຣ. ບຸນທອງ ຈິດມະນີ, ໄດ້ສະແດງຄວາມຊົມເຊີຍ ຕໍ່ຜົນສຳເລັດຂອງກອງປະຊຸມໃຫຍ່ຜູ້ແທນຊາວໜຸ່ມ (ປຊຊລ) ຄັ້ງທີ VII ແລະ ຄະນະບໍລິຫານງານສູນກາງ ຊປປ ລາວ ຊຸດໃໝ່ ທີ່ໄດ້ຮັບການເລືອກຕັ້ງລ້ວນ ແຕ່ເປັນບຸກຄົນທີ່ມີຄຸນສົມບັດ, ມີຄວາມຮູ້ຄວາມສາມາດ, ມີຄວາມຮູ້ທາງດ້ານວິຊາສະເພາະທີ່ແນ່ນອນ ແລະ ມີມາດຖານເງື່ອນໄຂຄົບຖ້ວນ ສົມເປັນຕົວແທນໃຫ້ແກ່ ຊາວໜຸ່ມ-ເຍົາວະຊົນບັນດາເຜົ່າ ໃນຂອບເຂດທົ່ວປະເທດ ແລະ ຮຽກຮ້ອງໃຫ້ສະມາຊິກຊາວໜຸ່ມ-ເຍົາວະຊົນບັນດາເຜົ່າ ຈົ່ງເພີ່ມທະວີຄວາມສາມັກຄີ ເປັນປຶກແຜ່ນ, ສ້າງຄວາມເປັນເອກະພາບຢ່າງສູງ ພາຍໃຕ້ການນຳພາຂອງພັກປະຊາຊົນ ປະຕິວັດລາວ ພ້ອມກັນບຸກບືນກ້າວຂຶ້ນຢ່າງໜັກແໜ້ນ, ສຸມໃສ່ສະຕິປັນຍາ ກຳລັງແຮງຂອງຊາວໜຸ່ມ, ເຊີດຊູນ້ຳໃຈຮັກຊາດ ເປັນເຈົ້າຕົນເອງເພີ່ງຕົນເອງ, ສ້າງຄວາມເຂັ້ມແຂງດ້ວຍຕົນເອງ, ຍົກສູງຄວາມຮັບຜິດຊອບການເມືອງຂອງຕົນ ເຂົ້າໃນການຈັດຕັ້ງປະຕິບັດພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ຫລຸດພົ້ນອອກຈາກຄວາມທຸກຍາກ, ຄວາມດ້ອຍພັດທະນາ, ນຳເອົາປະເທດຊາດມັ່ງຄັ່ງເຂັ້ມແຂງ, ປະຊາຊົນມີຄວາມຜາສຸກ, ສັງຄົມຍຸຕິທຳປະຊາທິປະໄຕ ແລະ ສີວິໄລ.
ແຫລ່ງຂ່າວ:
