ເພື່ອເຮັດໃຫ້ບັນດາຫົວໜ່ວຍທຸລະກິດໃນທົ່ວສັງຄົມ ຫັນເຂົ້າສູ່ລະບຽບການເປັນກ້າວໆ, ແນໃສ່ໃຫ້ວຽກງານກວດກາການຄ້າມີຄວາມເຂັ້ມແຂງ ແລະ ໄດ້ເຄື່ອນໄຫວຢ່າງປົກກະຕິ. ມາໃນວັນທີ 3 ກັນຍາຜ່ານມານີ້, ເຈົ້າໜ້າທີ່ກວດກາການຄ້າແຂວງສະຫວັນນະເຂດ ສົມທົບກັບເຈົ້າໜ້າທີ່ກວດກາການຄ້າເມືອງອາດສະພັງທອງ, ສອງຄອນ, ຈຳພອນ, ໄກສອນພົມວິຫານ ແລະ ອຸທຸມພອນ ພ້ອມກັນລົງກວດກາສິນຄ້າເຂດເທດສະບານເມືອງອາດສະພັງທອງ ຊີ້ຍັງພົບເຫັນການຄ້າຂາຍທີ່ບໍ່ຖືກຕ້ອງຕາມລະບຽບໃນຫຼາຍຮ້ານ.
ຕາມການໃຫ້ສຳພາດຂອງທ່ານ ແສງພະຈັນ ພັນມະນີວົງ ຮອງຫົວໜ້າໜ່ວຍງານກວດກາ ແລະ ປົກປ້ອງຜູ້ຊົມໃຊ້ ໄດ້ເຜີຍວ່າ: ເປົ້າໝາຍທີ່ເຈົ້າໜ້າທີ່ກວດກາການຄ້າພວກເຮົາລົງມາປະຕິບັດຢູ່ໃນເມືອງນີ້, ຕົ້ນຕໍເນັ້ນໃສ່ຮ້ານຄ້າທີ່ຂາຍຈັກຕັດໄມ້ ແລະ ເຄື່ອງອາໄຫລ່; ເຊິ່ງຈາກການລົງເຄື່ອນໄຫວຕົວຈິງ ກໍໄດ້ພົບເຫັນສິນຄ້າຫ້າມຈຳ ໜ່າຍວາງຂາຍຢູ່ໃນຮ້ານຄ້າຈຳນວນໜຶ່ງ ໂດຍສະເພາະຮ້ານຊາວຕ່າງປະເທດ (ຈີນ) ສາມາດອາຍັດສິນຄ້າຜິດລະບຽບຫຼາຍລາຍການຄື: ຈັກສິຕິນ 8 ເຄື່ອງ, ອາໄຫຼ່ຈັກສະຕິນ 5 ແກັດ, ໃບເລື່ອຍວົງເດືອນ 33 ແກັດ, ໃບມີດ-ດາບໃຫຍ່+ດາບນ້ອຍ 20 ອັນ, ຢາສູບ BASTOS, ຢາສູບກາມ້າ 20 ຊອງ, ເບຍຮູດາ (ເບຍຫວຽດນາມ) 10 ແກັດ ແລະ ສິນຄ້າໝົດອາຍຸອີກຈຳນວນໜຶ່ງ, ລວມມູນຄ່າທັງໝົດກວ່າ 46 ລ້ານກີບ. ນອກນັ້ນຍັງພົບເຄື່ອງຊ໊ອດໄຟຟ້າ ແລະ ເລົາປືນຕື່ມອີກ. ສຳລັບມາດຕະການຕໍ່ກັບຜູ້ກະທຳຜິດ ທາງເຈົ້າໜ້າທີ່ພວກເຮົາ ຈະໄດ້ເຮັດບົດບັນທຶກກ່າວເຕືອນ ຖ້າວ່າພົບເຫັນຄັ້ງຕໍ່ໄປ ຈະໄດ້ປັບໄໝຕາມລະບຽບຫຼັກການຢ່າງເຂັ້ມງວດ. ພິເສດໃນການລົງກວດກາສິນຄ້າທີ່ເມືອງອາດສະພັງທອງຂອງເຈົ້າໜ້າທີ່ກວດກາການຄ້າເທື່ອນີ້, ຍັງກວດພົບໄມ້ຫວງຫ້າມຈຳນວນໜຶ່ງ ທີ່ຖືກຊຸກເຊື່ອງໄວ້ໃນຮ້ານອາຫານຂອງຊາວຫວຽດນາມ ມາໃນປະຈຸບັນ, ພວກເຮົາກໍໄດ້ອາຍັດໄມ້ດັ່ງກ່າວໄວ້ແລ້ວ, ພ້ອມຈະໄດ້ຂໍທິດຊີ້ນຳຈາກຂັ້ນເທິງ ເພື່ອດຳເນີນການໃນຂັ້ນຕໍ່ໄປ. ດ້ານສິນຄ້າເຄື່ອງຂອງຕ່າງໆ ທີ່ຍຶດໄດ້ຈາກບັນດາຫ້າງຮ້ານນັ້ນ,ພາກສ່ວນກ່ຽວຂ້ອງແມ່ນໄດ້ມີການທ້ອນໂຮມ ແລະ ເກັບໄວ້ເປັນຢ່າງດີ ເພື່ອສະເໜີເຈົ້າແຂວງທຳລາຍ.