ຂປລ. ບໍລິສັດເບຍລາວ ຈຳກັດ ໄດ້ຖະແຫລງຂ່າວ ແລະ ເລີ່ມຈຳໜ່າຍຜະລິດຕະພັນ ນ້ຳດື່ມ ຫົວເສືອ ໃນຮູບ ໂສມໃໝ່ ອອກສູ່ຕະຫລາດ ຢ່າງເປັນທາງການ ໃນຕອນບ່າຍວັນທີ 28 ທັນວາ 2015 ນີ້ ທີ່ບໍລິສັດດັ່ງກ່າວ, ໂດຍການເຂົ້າຮ່ວມຂອງທ່ານ ສູນທອນ ສິລິສັກ ຮອງຜູ້ອຳນວຍການບໍລິສັດເບຍລາວ ຈຳກັດ, ບັນດາພະນັກງານພາຍໃນບໍລິສັດ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ບຸນທະແສງ ສິລິສັກ ຜູ້ຈັດການຜະລິດຕະພັນນ້ຳດື່ມຫົວເສືອ ແລະ ໂຊດາລາວ ໄດ້ໃຫ້ຮູ້ວ່າ: ບໍລິສັດ ເບຍລາວ ແມ່ນບໍລິສັດນຳໜ້າໃນການຜະລິດເຄື່ອງດື່ມ ໃນ ສປປ ລາວ ທີ່ມີປະສົບການຫລາຍກ່ວາ 40 ປີ. ປັດຈຸບັນ ບໍລິສັດ ມີການຜະລິດ ແລະ ຈຳໜ່າຍເຄື່ອງດື່ມ ປະເພດເບຍ, ນ້ຳອັດລົມ, ນ້ຳດື່ມ ແລະ ເຄື່ອງດື່ມໃຫ້ພະລັງງານ. ພ້ອມ ດຽວກັນນີ້ ບໍລິສັດ ເບຍລາວ ຈຳກັດ ຍັງໄດ້ມີການເໜັ້ນໜັກໃສ່ ການສ້າງນະວັດຕະກຳໃໝ່ໆ ທາງດ້ານການຜະລິດ, ການຫຸ້ມຫໍ່ ແລະ ມີຜະລິດຕະພັນໃໝ່ໆ ອອກຮັບໃຊ້ສັງຄົມຢ່າງຕໍ່ເນື່ອງ ແລະ ໃນວັນທີ 18 ທັນວາ 2015 ທີ່ຜ່ານມາ ກໍ ໄດ້ເລີ່ມວາງຈຳໜ່າຍ ຜະລິດຕະພັນ ນ້ຳດື່ມ ຫົວເສືອ ໃນຮູບໂສມໃໝ່ ອອກສູ່ຕະຫລາດ ເຊິ່ງນອກຈາກ ການອອກແບບ ການຫຸ້ມຫໍ່ໃຫ້ມີຄວາມທັນສະໄໝ ແລະ ສວຍງາມແລ້ວ ນ້ຳດື່ມ ຫົວເສືອ ໃນຮູບໂສມໃໝ່ນີ້ ຍັງຄົງຮັກສາຄຸນນະພາບ ຂອງຜະລິດຕະພັນ ທີ່ຜູ້ບໍລິໂພກໄດ້ໃຫ້ ຄວາມໄວ້ວາງໃຈຕະຫລອດມາ.
ນ້ຳດື່ມຫົວເສືອ ໄດ້ເລີ່ມວາງຈຳໜ່າຍໃນຕະຫລາດ ມາແຕ່ປີ 1997 ທີ່ບັນຈຸໃນຂວດແກ້ວ, ມາໃນປີ 1999 ໄດ້ປ່ຽນຈາກຂວດແກ້ວ ມາເປັນຕຸກປຣາສະຕິກໃສ ໂດຍຈຳໜ່າຍຂະໜາດບັນຈຸ ຕຸກໃຫຍ່ 1.500 ມິນລີລິດ (ມລ), ຕຸກກາງ 500 ມລ, ຈອກຢາງນ້ອຍ 200 ມລ ແລະ ໃນປີ 2009 ໄດ້ມີການປັບປ່ຽນຮູບໂສມໃໝ່ອີກເທື່ອໜຶ່ງ ເຊິ່ງໃນປີດຽວກັນ ນ້ຳດື່ມຫົວເສືອ ຍັງໄດ້ຮັບກຽດ ໃຫ້ເປັນນ້ຳດື່ມຢ່າງເປັນທາງການ ໃນມະຫະກຳກິລາຊີເກມ ຄັ້ງທີ 25 ທີ່ ສປປ ລາວ ເປັນເຈົ້າພາບ.
ນ້ຳດື່ມ ຫົວເສືອ ໃນຮູບໂສມໃໝ່ ມີຂະໜາດ ບໍລິມາດບັນຈຸ ຄື: ຕຸກໃຫຍ່ ຂະໜາດ ບັນຈຸ 1.500 ມລ, ຕຸກກາງ 600 ມລ ແລະ ຕຸກນ້ອຍ 350 ມລ ເຊິ່ງລາຄາຂາຍ ອອກຈາກບໍລິສັດ ແມ່ນຍັງຄົງຮັກສາໄວ້ຄືເກົ່າ ຄື: ແກັດໃຫຍ່: 1.500 ມລ x12 ລາຄາ 38,000 ກີບ/ແກັດ, ແກັດກາງ: 600 ມລ x24 ລາຄາ 42.000 ກີບ/ແກັດ, ແກັດນ້ອຍ: 350 ມລ x24 ລາຄາ 32,000 ກີບ/ແກັດ.
ແຫລ່ງຂ່າວ:
