ຂປລ. ໃນວັນທີ 26 ທັນວາ 2015 ນີ້ ໄດ້ຈັດພິທີມອບ–ຮັບ ໂຄງການກໍ່ສ້າງສູນອົງຄະທຽມ ແລະ ຟື້ນຟູສະມັດຕະພາບ ໂດຍມີ ທ່ານ ດຣ. ຄໍາແພງ ໄຊສົມແພງ ລັດຖະມົນຕີວ່າການກະຊວງແຮງງານ ແລະ ສະວັດທີການສັງຄົມ, ທ່ານ ຫງວຽນ ວັນຕີ ລັດຖະມົນຕີຊ່ວຍວ່າການກະຊວງແຮງງານ-ເສຍອົງຄະ ແລະ ສັງຄົມ ແຫ່ງ ສສ ຫວຽດນາມ, ທ່ານນາງ ສິງຄໍາ ຄົງສະຫວັນ ຮອງເຈົ້າແຂວງໆວຽງຈັນ, ມີບັນດາລັດຖະມົນຕີຊ່ວຍວ່າການ, ຫົວໜ້າກົມ, ຮອງກົມ ແລະ ພະນັກ ງານກ່ຽວຂ້ອງສອງຝ່າຍເຂົ້າຮ່ວມ.
ທ່ານ ດຣ. ຄໍາແພງ ໄຊສົມແພງ ໄດ້ມີຄໍາເຫັນໃນບາງຕອນວ່າ: ໂຄງການກໍ່ສ້າງສູນອົງຄະທຽມ ແລະ ຟື້ນຟູສະມັດຕະພາບ ເຊິ່ງຕັ້ງຢູ່ບ້ານນາໝາກ ເມືອງທຸລະຄົມ ແຂວງວຽງຈັນ ແມ່ນໂຄງການຊ່ວຍເຫລືອລ້າຈາກລັດຖະບານ ແຫ່ງ ສສ ຫວຽດນາມ ໃຫ້ແກ່ລັດຖະບານ ແຫ່ງ ສປປ ລາວ ໃນມູນຄ່າ 46,8 ຕື້ດົງ (ສະກຸນເງິນຫວຽດນາມ) ຫລື ປະມານ 20 ຕື້ກວ່າກີບ, ໂຄງການດັ່ງກ່າວ ໄດ້ສ້າງຂຶ້ນເພື່ອຮັບໃຊ້ໃຫ້ແກ່ການຜະລິດອົງຄະທຽມ, ການບໍລິການຟື້ນຟູສຸຂະພາບ ແລະ ນໍາໃຊ້ອຸປະກອນເຄື່ອງມືທີ່ທັນສະໄໝ ໃຫ້ແກ່ພະນັກງານອາວຸໂສປະຕິວັດເສຍອົງຄະ ຈາກການສູ້ຮົບ ແລະ ຮັບໃຊ້ການສູ້ຮົບໃນສະໄໝຕໍ່ສູ້ກູ້ຊາດ ລວມເຖິງຜູ້ເສຍອົງຄະ ແລະ ພິການໃນສັງຄົມຂອງລາວ ເຊິ່ງພາຍຫລັງໂຄງການໄດ້ຖືກອະນຸມັດ ຈາກສອງລັດຖະບານຫວຽດນາມ ແລະ ລາວ, ໂຄງການໄດ້ກໍ່ສ້າງດ້ວຍໄລຍະເວລາ 18 ເດືອນ ເລີ່ມແຕ່ເດືອນສິງຫາ 2014 ຫາ ເດືອນທັນວາ 2015 ດ້ວຍຄວາມເອົາໃຈໃສ່ ຊີ້ນໍາໆພາຂອງການນໍາຂັ້ນສູງຂອງລັດຖະບານ ກໍຄື ຄະນະນໍາຂອງສອງກະຊວງ ເອົາໃຈໃສ່ຈັດຕັ້ງປະຕິບັດຕິດຕາມກວດກາ, ຊຸກຍູ້ ແລະ ຄ້ມຄອງຂອງຄະນະຮັບຜິດຊອບໂຄງການ ຝ່າຍລາວ ແລະ ຝ່າຍຫວຽດນາມ, ພ້ອມດ້ວຍບັນດາຂະແໜງການກ່ຽວຂ້ອງ ແລະ ບໍລິສັດຜູ້ຮັບເໝົາກໍ່ສ້າງ ກໍຄື ອໍານາດການປົກຄອງແຂວງ, ເມືອງ ແລະ ບ້ານ ຈຶ່ງເຮັດໃຫ້ໂຄງການໄດ້ຖືກຈັດຕັ້ງປະຕິບັດສໍາເລັດຕາມແຜນການທີ່ກໍານົດໄວ້ ແລະ ໄດ້ກາຍເປັນສັນຍາລັກແຫ່ງມິດຕະພາບ ແລະ ຄວາມສາມັກຄີພິເສດ ລະຫວ່າງ ສອງຂະແໜງການແຮງງານ ແລະ ສະຫວັດດີການສັງຄົມ ກໍຄື ສອງພັກສອງລັດຖະບານ ແລະ ປະຊາຊົນສອງຊາດ ລາວ–ຫວຽດນາມ, ຫວຽດນາມ–ລາວ ໃນຕໍ່ໜ້າ ແລະ ຍາວນານ.
ແຫລ່ງຂ່າວ:
