ທ່ານ​ເຈົ້າ​ຄອງ​ນະຄອນຫຼວງ​ວຽງ​ຈັນ ຮຽກຮ້ອງ​ທຸກ​ພາກສ່ວນ ສືບຕໍ່​ເອົາໃຈໃສ່​ຮັກສາ​ສະຖຽນ​ລະ​ພາບ​ທາງ​ດ້ານ​ການເມືອງ ເຮັດ​ໃຫ້​ສັງຄົມ​ມີ​ຄວາມ​ສະຫງົບ ພ້ອມ​ຮັກສາ​ຈັງຫວະ​ການ​ຂະຫຍາຍຕົວ​ທາງ​ດ້ານ​ເສດຖະກິດ ພາຍຫຼັງ​ການຈັດຕັ້ງ​ປະຕິບັດ​ໃນ​ແຕ່​ລະ​ຂົງເຂດ​ວຽກ​ງານ ໃນ​ປີ 2013 ໄດ້​ຮັບ​ຜົນສຳເລັດ​ຫຼາຍ​ດ້ານ ໂດຍ​ສະເພາະ ເສດຖະກິດ​ຂະຫຍາຍຕົວ​ໃນ​ລະດັບ 12,7% ໂຕ​ເລກ​ແຜນການ​ແມ່ນ 12,6%.

ທ່ານ ສຸ​ກັນ ມະຫາລາດ ເຈົ້າ​ຄອງ​ນະຄອນຫຼວງ​ວຽງ​ຈັນ ກ່າວ​ໃນ​ພິທີ​ສະເຫຼີມສະຫຼອງ​ສົ່ງ​ທ້າຍ​ປີ​ເກົ່າ 2013 ແລະ ຕ້ອນຮັບ​ປີ​ໃໝ່ 2014 ທີ່​ຜ່ານ​ມາ ມີ​ບາງ​ຕອນ​ສຳ​ຄັນວ່າ: ນະຄອນຫຼວງ​ວຽງ​ຈັນ ຕະຫຼອດ​ໄລຍະ 1 ປີຜ່ານມາ ດ້ວຍ​ຄວາມ​ສູ້​ຊົນ​ບຸກ​ບືນ​ຂອງ​ທຸກ​ພາກສ່ວນ ໄດ້​ເຮັດ​ໃຫ້​ນະຄອນຫຼວງ​ວຽງ​ຈັນ​ມີ​ຜົນສຳເລັດ​ໃນ​ຫຼາຍ​ດ້ານ ທີ່​ເປັນ​ໜ້າ​ພາກພູມ​ໃຈ ເປັນຕົ້ນ​ແມ່ນ​ສະຖຽນ​ລະ​ພາບ​ທາງ​ດ້ານ​ການເມືອງ​ມີ​ຄວາມ​ໜັກ​ແໜ້ນ ມີ​ຄວາມ​ເປັນ​ລະບຽບ​ຮຽບ​ຮ້ອຍ​ໃນ​ສັງຄົມ ແລະ ໄດ້​ຮັບ​ການ​ຍົກ​ລະດັບ​ໂດຍ​ພື້ນຖານ ປາກົດການ​ຫຍໍ້ທໍ້​ໃນ​ສັງຄົມ​ຖືກ​ສະກັດ​ກັ້ນ​ແກ້​ໄຂ ໃຫ້​ມີ​ບາດກ້າວ​ຫັນປ່ຽນ​ຢ່າງ​ຕັ້ງໜ້າ ສຳລັບ​ໃນ​ປີ 2014 ແມ່ນ​ຈະ​ໄດ້​ພ້ອມ​ກັນ​ປະຕິບັດ​ບັນດາ​ຄາດໝາຍ​ກອງ​ປະຊຸມ​ໃຫຍ່ ຄັ້ງ​ທີ IX ຂອງ​ພັກ ກໍ່​ຄື​ກອງ​ປະຊຸມ​ໃຫຍ່ ຄັ້ງ​ທີ V ຂອງ​ອົງຄະ​ນະ​ພັກ​ນະຄອນຫຼວງ​ວຽງ​ຈັນ​ວາງ​ອອກ ໃຫ້​ປາກົດ​ຜົນ​ເປັນ​ຈິງ ເຮັດ​ໃຫ້​ນະຄອນຫຼວງ​ວຽງ​ຈັນ ສືບຕໍ່​ມີ​ສະຖຽນ​ລະ​ພາບ​ທາງ​ດ້ານ​ການເມືອງ ສັງຄົມ​ມີ​ຄວາມ​ສະຫງົບ ແລະ ຄວາມ​ເປັນ​ລະບຽບ​ຮຽບ​ຮ້ອຍ ການ​ພັດທະນາ​ເສດຖະກິດ ສັງຄົມ ໃຫ້​ມີ​ການ​ຂະຫຍາຍຕົວ​ດີ​ຂຶ້ນ​ກວ່າ​ເກົ່າ ເອົາໃຈໃສ່​ສະກັດ​ກັ້ນ​ການ​ແກ້​ໄຂ​ປາກົດການ​ຫຍໍ້ທໍ້​ໃນ​ສັງຄົມ ແລະ ສ້າງ​ນະຄອນຫຼວງ​ໃຫ້​ມີ​ຄວາມ​ສະຫງົບ ສະອາດ ສີຂຽວ ສຸຂະພາບ ແລະ ພັດທະນາ.

ອີງ​ຕາມ​ບົດ​ລາຍ​ງານ​ການຈັດຕັ້ງ​ປະຕິບັດ ແຜນ​ພັດທະນາ​ເສດຖະກິດ-ສັງຄົມ ສົກ​ປີ 2013-2014 ຂອງ​ນະຄອນຫຼວງ​ວຽງ​ຈັນ ເຫັນ​ໄດ້​ວ່າ: ເສດຖະກິດ-ສັງຄົມ ສືບຕໍ່​ຂະຫຍາຍຕົວ​ຢ່າງ​ຕໍ່​ເນື່ອງ ລື່ນ​ແຜນການ 0,1% ໃນ​ນັ້ນ ຂະແໜງ​ກະສິກຳ-ປ່າໄມ້ ເພີ່ມ​ຂຶ້ນ 7,4% ກວມ​ເອົາ 19,4% ຂອງ GDP ອຸດສາຫະກຳ​ເພີ່ມ​ຂຶ້ນ 15,9% ກວມ​ເອົາ 45,4% ຂອງ GDP ການ​ບໍລິການ​ເພີ່ມ​ຂຶ້ນ 10,1% ກວມ​ເອົາ 35,2% ຂອງ GDP ສ່ວນ​ການ​ລົງທຶນ​ສາມາດ​ປະຕິບັດ​ໄດ້ 10.938,35 ຕື້​ກີບ ລື່ນ​ແຜນການ 9,02% ໃນ​ນັ້ນ ການ​ລົງທຶນ​ຂອງ​ລັດ​ມີ 705 ໂຄງການ ມູນ​ຄ່າ 419.847 ລ້ານ​ກີບ ການ​ລະດົມ​ທຶນ​ຊ່ວຍເຫຼືອ​ເຂົ້າ​ໃນ​ການ​ພັດທະນາ​ຈາກ​ການ​ກູ້​ຢືມ ແລະ ຊ່ວຍເຫຼືອ​ລ້າ​ຈາກ​ຕ່າງປະເທດ (ODA) ປະຕິບັດ​ໄດ້ 669,27 ຕື້​ກີບ ທຽບໃສ່​ຄາດໝາຍ​ທີ່​ວາງ​ໄວ້ (41,43 ຕື້​ກີບ) ເທົ່າ​ກັບ 16 ເທື່ອ ສະເພາະ​ທຶນ​ກູ້​ຢືນ ແລະ ທຶນ​ຊ່ວຍເຫຼືອ​ລ້າ​ທີ່​ນອນ​ຢູ່​ໃນ​ແຜນທີ່​ສະພາ​ແຫ່ງ​ຊາດ​ຮັບຮອງ​ເອົາ ປະຕິບັດ​ໄດ້ 20 ໂຄງການ ມູນ​ຄ່າ 11,28 ລ້ານ​ກວ່າ​ໂດ​ລາ​ສະຫະລັດ ຫຼື ປະມານ 89,16 ຕື້​ກີບ ທຽບໃສ່​ແຜນການ (41,43 ຕື້​ກີບ) ປະຕິບັດ​ໄດ້​ລື່ນ​ຄາດໝາຍ 2 ເທື່ອ ແລະ ການ​ລົງທຶນ​ຂອງ​ພາກ​ເອກະ​ຊົນ​ທັງ​ພາຍ​ໃນ-ຕ່າງປະເທດ ອີງ​ຕາມ​ຂໍ້​ມູນ​ທີ່​ໄດ້​ຮັບ​ຈາກ​ທະນາຄານ​ສົ່ງເສີມ​ກະສິກຳ ແລະ ທະນາຄານ​ນະໂຍບາຍ ແມ່ນ​ໄດ້​ອະນຸຍາດ​ໃຫ້​ເອກະ​ຊົນ​ທັງ​ພາຍ​ໃນ ແລະ ຕ່າງປະເທດ​ລົງທຶນ​ຢູ່​ເຂດ​ນະຄອນຫຼວງ​ວຽງ​ຈັນ ທັງ​ໝົດ 1.276 ໂຄງການ ມູນ​ຄ່າ 1,107 ຕື້​ໂດ​ລາ​ສະຫະລັດ ຫຼື ປະມານ 8.634 ຕື້​ກວ່າ​ກີບ ທຽບໃສ່​ຄາດໝາຍ​ທີ່​ວາງ​ໄວ້ (8.527,74 ຕື້​ກີບ) ແມ່ນ​ລື່ນ​ຄາດໝາຍ 1,25%.

ທີ່ມາ http://www.vientianemai.net/teen/khao/1/11012