ຂປລ. ກະຊວງການຕ່າງປະເທດ ສະຫລຸບຜົນງານການເຄື່ອນໄຫວວຽກງານ ປະຈຳປີ 2015 ຂຶ້ນໃນວັນ 25 ທັນວາ 2015 ໂດຍການເປັນປະທານຂອງທ່ານ ທອງລຸນ ສີສຸລິດ ຮອງນາຍົກລັດຖະມົນຕີ,ລັດຖະມົນຕີວ່າ ການ ກະຊວງການຕ່າງປະເທດ, ບັນດາລັດຖະມົນຕີຊ່ວຍວ່າການ, ພະນັກງານອາວຸໂສ ແລະ ພະນັກງານກະຊວງເຂົ້າຮ່ວມ.
ໃນໂອກາດນີ້ ທ່ານ ບຸນເຫລືອ ພັນດານຸວົງ ຫົວໜ້າຫ້ອງການ ກະຊວງການຕ່າງປະເທດ ໄດ້ຜ່ານບົດສະ ຫລຸບ ຜົນງານການເຄື່ອນໄຫວວຽກງານໃນໜຶ່ງປີຜ່ານມາ, ສັງເກດຕີລາຄາສະພາບການພາກພື້ນ ແລະ ສາກົນ, ສະຫລຸບການເຄື່ອນໄຫວ ຜົນງານທີ່ພົ້ນເດັ່ນຂອງວຽກງານການຕ່າງປະເທດ ປີ 2015 ແລະ ທິດທາງແຜນການຈຸດສຸມ ໃນປີ 2016, ໄດ້ສ້າງສາຍພົວພັນການທູດ ກັບ 138 ປະເທດ, ມີສຳນັກງານຕາງໜ້າທູດ ທັງໝົດ 38 ແຫ່ງ ຢູ່ 27 ປະເທດ ໃນນັ້ນມີສະຖານທູດ 26 ແຫ່ງ, ສຳນັກງານຕາງໜ້າຖາວອນ 3 ແຫ່ງ ແລະ ສຳນັກງານສາກົນສຸນໃຫ່ຍ 9 ແຫ່ງ, ວຽກງານການເຄື່ອນໄຫວການຕ່າງປະເທດຢູ່ໃນທ່າບຸກ, ໂດຍຍຶດໝັ້ນແນວທາງ “ສັນຕິພາບ ເອກະລາດ ແລະ ການຮ່ວມມື ” ຢ່າງສະເໝີຕົ້ນສະເໝີປາຍ, ການພົວພັນຮ່ວມມືໃນຂອບສອງຝ່າຍໄດ້ສືບຕໍ່ເປີດກວ້າງ ແລະ ກ້າວເຂົ້າສູ່ລວງເລິກຍິ່ງຂຶ້ນ, ໄດ້ສະແດງອອກເຖິງການຢ້ຽມຢາມ ລະຫວ່າງການນຳຂັ້ນສູງກັບປະເທດຕ່າງໆຢ່າງເປັນປົກກະຕິ, ໃນຂອບຫລາຍຝ່າຍ ໄດ້ມີການເຄື່ອນໄຫວຢ່າງເປັນເຈົ້າການ ແລະ ສາ ມາດ ປົກປ້ອງສິດຜົນປະໂຫຍດອັນຊອບທຳ ຂອງ ສປປ ລາວ ຢູ່ໃນເວທີພາກພື້ນ ແລະ ສາກົນ ເຊັ່ນ: ເວທີອາຊຽນ, ເວທີອາເຊັມ, ອົງການການຄ້າໂລກ, ອົງການສະຫະປະຊາຊາດ ເປັນຕົ້ນ. ນອກນັ້ນ, ໄດ້ສຳເລັດການເປັນເຈົ້າພາບຈັດກອງປະຊຸມລະດັບພາກພື້ນ ແລະ ສາກົນ ທີ່ສຳຄັນຫລາຍຄັ້ງ ດ້ວຍຜົນສຳເລັດອັນຈົບງາມ ເປັນຕົ້ນ ກອງ ປະຊຸມໂຕະມົນ ຄັ້ງທີ 12 ກອງປະຊຸມລະດັບລັດຖະມົນຕີ ເຂດສາມຫລ່ຽມພັດທະນາ ກຳປູເຈຍ-ລາວ-ຫວຽດນາມ CLV ຄັ້ງທີ 10, ກອງະຊຸມໃຫຍ່ ຄັ້ງທີ 3 ຂອງອົງຄະນະພັກກະຊວງການຕ່າງປະເທດ ແລະ ກອງປະຊຸມອື່ນໆ.
ທິດທາງແຜນການໃນນຕໍ່ໜ້າ ແມ່ນສືບຕໍ່ຍົກສູງບົດບາດເປັນເສນາທິການ ໃຫ້ຂັ້ນເທິງດ້ານການຕ່າງປະເທດ, ຢຶດໝັ້ນ ໃນແນວທາງການຕ່າງປະເທດຂອງພັກ, ເປີດກວ້າງການພົວພັນສາກົນຢ່າງມີຈຸດສຸມ ແລະ ຍາດແຍ່ງຜົນປະໂຫຍດຕົວຈິງມາສູ່ປະເທດຊາດ, ປັບປຸງກົນໄກການປະສານງານ ແລະ ຄຸ້ມຄອງວຽກງານການຕ່າງ ປະເທດຜ່ານປະຕູດຽວ, ສູ້ຊົນແກ້ໄຂຈຸດຄົງຄ້າງເສັ້ນຊາຍແດນ ກັບປະເທດເພື່ອນບ້ານໃຫ້ສຳເລັດໂດຍພື້ນຖານ, ສ້າງຄວາມເຂັ້ມແຂງໃຫ້ແກ່ຂະແໜງການຕ່າງປະເທດຂັ້ນທ້ອງຖິ່ນ ເພື່ອຮັບປະກັນຄວາມພ້ອມສຳລັບການເຊື່ອມໂຍງ-ເຊື່ອມຈອດພາກພື້ນ ແລະ ສາກົນ ໃຫ້ຫລາຍຂຶ້ນ.
ແຫລ່ງຂ່າວ:
