ຂປລ. ໃນຕອນເຊົ້າວັນທີ 25 ທັນວາ 2015, ສະຫາຍ ທອງສິງ ທຳມະວົງ ກຳມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຄຳນັບ ຂອງຄະນະຜູ້ແທນກະຊວງຍຸຕິທຳ ແຫ່ງ ສສ ຫວຽດນາມ ເຊິ່ງນຳໂດຍ ສະຫາຍ ດຣ. ຮ່າ ຮຸ໋ງເກືອງ ກຳມະການສູນກາງ, ເລຂາຄະນະພັກ, ລັດຖະມົນຕີວ່າການກະຊວງຍຸຕິທຳ ສສ ຫວຽດນາມ ທີ່ໄດ້ເດີນທາງມາຢ້ຽມຢາມ ສປປ ລາວ ແຕ່ວັນທີ 24-30 ທັນວາ 2015 ເພື່ອແລກປ່ຽນບົດຮຽນ ດ້ານວຽກງານຍຸຕິທຳ ກັບກະຊວງຍຸຕິທຳຂອງລາວ.
ໃນການຕ້ອນຮັບ, ສະຫາຍ ທອງສິງ ທຳມະວົງ ໄດ້ກ່າວສະແດງຄວາມຊົມເຊີຍຕໍ່ການມາຢ້ຽມຢາມ ສປປ ລາວ ຂອງຄະນະຜູ້ແທນ ກະຊວງຍຸຕິທຳ ສສ ຫວຽດນາມ ເຊິ່ງເປັນການຮັດແໜ້ນຄວາມສາມັກຄີທີ່ເປັນມູນເຊື້ອ ລະຫວ່າງ ສອງພັກ-ສອງລັດ ກໍຄື ສອງກະຊວງຍຸຕິທຳ ໃຫ້ນັບມື້ຂະຫຍາຍຕົວຢ່າງບໍ່ຢຸດຢັ້ງ, ທັງເປັນ ການປະກອບສ່ວນເພີ່ມທະວີ ໃຫ້ວຽກງານຍຸຕິທຳຂອງ ລາວ-ຫວຽດນາມ ນັບມື້ມີຄວາມກ້າວໜ້າ ແລະ ເຂັ້ມແຂງຂຶ້ນໄປເລື້ອຍໆ.
ພ້ອມນີ້, ສະຫາຍ ດຣ. ຮ່າ ຮຸ໋ງເກືອງ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ຂອງການນຳຂັ້ນສູງລາວ, ພ້ອມທັງ ສະແດງຄວາມຂອບໃຈຕໍ່ການນຳກະຊວງຍຸຕິທຳ ທີ່ໄດ້ໃຫ້ການຮ່ວມມືເປັນຢ່າງດີ ໃນການມາ ເຄື່ອນໄຫວຢ້ຽມຢາມ ແລະ ເຮັດວຽກໃນຄັ້ງນີ້ ເຊິ່ງຈະເປັນການເສີມສ້າງການຮ່ວມມືດ້ານວຽກງານວິຊາການ, ການແລກປ່ຽນຂໍ້ມູນຂ່າວສານ, ແລກປ່ຽນບຸກຄະລາກອນ ແລະ ອື່ນໆ ໃນຂະແໜງການຍຸຕິທຳຂອງສອງປະເທດ ໃຫ້ນັບມື້ຂະຫຍາຍຕົວ ແລະ ກວ້າງຂວາງຍິ່ງໆຂຶ້ນ.
ແຫລ່ງຂ່າວ:
