ໃນລະຫວ່າງວັນທີ 23-25 ທັນວາ 2015 ເມືອງສັງທອງ ນະຄອນຫຼວງວຽງຈັນ ໄດ້ຈັດງານຕະຫຼາດນັດວາງສະແດງສິນຄ້າ ຜະລິດຕະພັນກະສິກຳ ອຸດສາຫະກຳ-ຫັດຖະກຳ ແລະ ເປີດນຳໃຊ້ຕະຫຼາດບ້ານໂຄກແຫ້ຂຶ້ນ ທີ່ຕະຫຼາດບ້ານດັ່ງກ່າວ ມີທ່ານ ດຣ. ອານຸພາບ ຕຸນາລົມ ຮອງເຈົ້າຄອງນະຄອນຫຼວງ ບັນດາເຈົ້າເມືອງ ຮອງເຈົ້າເມືອງ ພະແນກການອ້ອມຂ້າງນະຄອນຫຼວງ ຫ້ອງການອ້ອມຂ້າງເມືອງ ເລຂາພັກບ້ານ ນາຍບ້ານ ຫ້າງຮ້ານ ແລະ ແຂກຖືກເຊີນເຂົ້າຮ່ວມ.
ໃນພິທີທ່ານ ຄຳໝູນ ຕຽງທະລາດ ເຈົ້າເມືອງສັງທອງ ໄດ້ກ່າວວ່າ: ງານຕະຫຼາດນັດໄດ້ຈັດຂຶ້ນທຸກໆປີ ຈຸດປະສົງເພື່ອເປັນການຈັດຕັ້ງປະຕິບັດ ແລະ ຜັນຂະຫຍາຍມະຕິຂອງກອງປະຊຸມໃຫຍ່ ຄັ້ງທີ IX ຂອງພັກ ກອງປະຊຸມໃຫຍ່ ຄັ້ງທີ VI ຂອງອົງຄະນະພັກ ນວ ແລະ ມະຕິກອງປະຊຸມໃຫຍ່ ຄັ້ງທີ IV ຂອງອົງຄະນະພັກເມືອງສັງທອງ ໃຫ້ປາກົດຜົນເປັນຈິງ ເປັນການສະເຫຼີມສະຫຼອງ 2 ວັນປະຫວັດສາດ ແລະ ເພື່ອສ້າງໂອກາດຊຸກຍູ້ສົ່ງເສີມຜະລິດຕະພັນສິນຄ້າຂອງພໍ່ແມ່ປະຊາຊົນ ບັນດາຫົວໜ່ວຍທຸລະກິດ ວິສາຫະກິດຂະໜາດນ້ອຍ ກາງ ຄອບຄົວຕົວແບບ ໄດ້ວາງສະແດງ-ຂາຍສິນຄ້າໃຫ້ປະຊາຊົນພາຍໃນເມືອງສັງທອງ ກໍ່ຄືຊາວ ນວ ໄດ້ຊົມໃຊ້ຜະລິດຕະພັນສິນຄ້າທີ່ມີຫຼາຍປະເພດ ແລະ ຜະລິດຕະພັນໃໝ່ໆ ທີ່ໄດ້ຜະລິດອອກມາໃນແຕ່ລະປີ ເປັນການແລກປ່ຽນບົດຮຽນດ້ານຜະລິດ ການຕະຫຼາດ ການບໍລິການ ແລະ ປະສົບການຕ່າງໆ ເພື່ອພັດທະນາ ແລະ ປັບປຸງກິດຈະການຂອງຕົນໃຫ້ດີຂຶ້ນກວ່າເກົ່າ ເພີ່ມຄວາມສາມາດໃນການແຂ່ງຂັນ ແລະ ສ້າງຄວາມກຽມພ້ອມການເຂົ້າຮ່ວມ ເປັນປະຊາຄົມເສດຖະກິດອາຊຽນ ໃນທ້າຍປີ 2015 ແລະ ເພື່ອເປັນການເປີດຕະຫຼາດບ້ານໂຄກແຫ້ ໃຫ້ເປັນບ່ອນຊື້-ຂາຍແລກປ່ຽນສິນຄ້າ ການບໍລິການ ແລະ ສ້າງໃຫ້ກາຍເປັນຕະຫຼາດຕົວແບບຂອງເມືອງສັງທອງ ໃນຕໍ່ໜ້າຕື່ມອີກ.
ພາຍໃນງານຕະຫຼາດນັດຄັ້ງນີ້ ມີບັນດາຫ້າງຮ້ານພາຍໃນເມືອງ ເຂົ້າມາຮ່ວມວາງສະແດງຂາຍສິນຄ້າ ຈຳນວນ 33 ຫົວໜ່ວຍ ເຊັ່ນ: ກຸ່ມຫັດຖະກຳຈັກສານ ແລະ ເຟີນີເຈີໄມ້ປ່ອງ 1 ຫົວໜ່ວຍ ຄອບຄົວຕົວແບບທາງດ້ານກະສິກຳບ້ານ 4 ຫົວໜ່ວຍ ເຟີນີເຈີແກະສະຫຼັກ 3 ຫົວໜ່ວຍ ສູນກະສິກຳຫ້ວຍຄຳ ແລະ ນາລາດ 1 ຫົວໜ່ວຍ ບໍລິສັດ ບົວລະພາກະສິກຳ-ປ່າໄມ້ ຈຳກັດ 1 ຫົວໜ່ວຍ ບໍລິສັດ ລາວອາໂກເອເຊຍ 1 ຫົວໜ່ວຍ ສິນຄ້າໂອດ໋ອບມາຈາກຕ່າງເມືອງ 4 ຫົວໜ່ວຍ ຮ້ານອາຫານ 4 ຫົວໜ່ວຍ ເຄື່ອງລະຫຼິ້ນຕ່າງໆ ແຜງລອຍ 13 ຫົວໜ່ວຍ ວົງດົນຕີ 1 ວົງ ລວມມູນຄ່າສິນຄ້າທີ່ນຳມາວາງສະແດງ ທັງໝົດ 173 ລ້ານກີບ.
ແຫລ່ງຂ່າວ:
