ອຸບັດເຫດທີ່ເກີດຂຶ້ນຕາມທ້ອງຖະໜົນທົ່ວນະຄອນຫຼວງວຽງຈັນ ປະຈຳເດືອນມັງກອນ 2014 (16/12/2013-15/01/2014) ເກີດຂຶ້ນທັງໝົດ 164 ກໍລະນີ ແລະ ມີຜູ້ເສຍຊີວິດ 27 ຄົນ ຖ້າທຽບໃສ່ໃນເດືອນທີ່ຜ່ານມາ ອຸບັດເຫດແມ່ນເພີ່ມຂຶ້ນ 25 ກໍລະນີ ແລະ ມີຜູ້ເສຍຊີວິດເພີ່ມຂຶ້ນເຖິງ 5 ຄົນ ເມືອງໄຊທານີ ເກີດອຸບັດເຫດຫຼາຍກວ່າໝູ່ 35 ຄັ້ງ ລວມມູນຄ່າຄວາມເສຍຫາຍປະມານ 1 ຕື້ກວ່າກີບ.
ຈາກອຸບັດເຫດທີ່ເກີດຂຶ້ນໃນແຕ່ລະຄັ້ງ ເຮັດໃຫ້ມີຜູ້ບາດເຈັບເລັກນ້ອຍ 97 ຄົນ ສົມຄວນ 114 ຄົນ ສາຫັດ 32 ຄົນ ຜົນເສຍຫາຍທາງດ້ານພາຫະນະເປ່ເພເລັກນ້ອຍ 115 ຄັນ ສົມຄວນ 204 ຄັນ ໃຊ້ການບໍ່ໄດ້ 1 ຄັນ ຄົນຂັບບາດເຈັບເລັກນ້ອຍ 84 ຄົນ ສົມຄວນ 83 ຄົນ ສາຫັດ 29 ຄົນ ເສຍຊີວິດ 19 ຄົນ ສ່ວນຜູ້ຊ້ອນທ້າຍບາດເຈັບເລັກນ້ອຍ 12 ຄົນ ສົມຄວນ 23 ຄົນ ສາຫັດ 2 ຄົນ ເສຍຊີວິດ 3 ຄົນ ນອກຈາກນີ້ຍັງມີລົດຕຳຄົນຍ່າງເສຍຊີວິດ 5 ຄົນ ອຸບັດເຫດສ່ວນໃຫຍ່ແມ່ນເກີດຢູ່ໃນກຸ່ມອາຊີບກຳມະກອນ ຮອງລົງມາແມ່ນນັກສຶກສາ.
ສາຍເຫດຫຼັກຂອງການເກີດອຸບັດເຫດຕາມທ້ອງຖະໜົນທົ່ວນະຄອນຫຼວງວຽງຈັນ ໃນເດືອນມັງກອນ 2014 ທີ່ເຮັດໃຫ້ມີຜູ້ໄດ້ຮັບບາດເຈັບ ແລະ ເສຍຊີວິດນັ້ນ ກໍ່ຍ້ອນຜູ້ທີ່ໃຊ້ລົດໃຊ້ຖະໜົນ ຍັງລະເມີດຕໍ່ກົດລະບຽບຈາລະຈອນ ເມົາແລ້ວຂັບ ບໍ່ໃສ່ໝວກກັນກະທົບ ໃຊ້ຄວາມໄວເກີນກຳນົດ ເຕັກນິກລົດບໍ່ໄດ້ມາດຕະຖານ.
ທີ່ມາ http://www.vientianemai.net/teen/khao/1/11009