ກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດ ຊຸດທີ VII ໃນວັນທີ 23 ທັນວາ 2015 ທີ່ສະພາແຫ່ງຊາດ ໂດຍເປັນປະທານຂອງທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ ມີຮອງປະທານສະພາແຫ່ງຊາດ ພ້ອມດ້ວຍສະມາຊິກສະພາແຫ່ງຊາດ (ສສຊ) ແລະ ລັດຖະມົນຕີວ່າການ ຊ່ວຍວ່າການກະຊວງຕ່າງໆເຂົ້າຮ່ວມ.
ສຳລັບຕອນເຊົ້າ ບັນດາ ສສຊ ໄດ້ພ້ອມກັນປະກອບຄຳຄິດເຫັນ ຕໍ່ບົດລາຍງານຂອງລັດຖະບານ ກ່ຽວກັບຮ່າງວິໄສທັດ ຮອດປີ 2030 ຍຸດທະສາດຮອດປີ 2025 ແລະ ຮ່າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII ແລະ ແຜນງົບປະມານແຫ່ງລັດ 5 ປີ (2016-2020) ໃນນີ້ ສສຊ ໄດ້ສະແດງຄວາມຊົມເຊີຍຕໍ່ຮ່າງວິໄສທັດ ຮອດປີ 2030 ຍຸດທະສາດຮອດປີ 2025 ແລະ ຮ່າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII ແລະ ແຜນງົບປະມານແຫ່ງລັດ 5 ປີ (2016-2020) ທີ່ພາກສ່ວນກ່ຽວຂ້ອງຮ່າງຂຶ້ນມາ ເຫັນວ່າມີຄວາມຈະແຈ້ງສົມຄວນ ແຕ່ຢາກໃຫ້ໃຊ້ຄຳສັບທີ່ຄົບຖ້ວນ ກະທັດຮັດ ແລະ ສ່ອງແສງໃຫ້ເຫັນດ້ານຕັ້ງໜ້າກວ່າເກົ່າ ເພື່ອໃຫ້ການວາງຄາດໝາຍຈັດຕັ້ງປະຕິບັດ ມີຄວາມສອດຄ່ອງ ລະບຸໃຫ້ແຈ້ງການມີສ່ວນຮ່ວມຂອງປະຊາຊົນ ແລະ ສັງຄົມ ໃນການປະຕິບັດຍຸດທະສາດດ້ານຕ່າງໆຕື່ມອີກ.
ສ່ວນຕອນບ່າຍ ພາຍໃຕ້ການເປັນປະທານຂອງທ່ານຮອງປະທານສະພາ ທີ່ປະຊຸມແມ່ນໄດ້ຮັບຟັງການລາຍງານກ່ຽວກັບ ສະພາບການຈັດຕັ້ງປະຕິບັດນະໂຍບາຍ ຫຼຸດຜ່ອນອັດຕາດອກເບ້ຍເງິນກູ້ ແລະ ເງິນຝາກ ໃນການຊຸກຍູ້ສົ່ງເສີມການຜະລິດເປັນສິນຄ້າ ເພື່ອສ້າງຄວາມເຂັ້ມແຂງໃຫ້ພາກທຸລະກິດພາຍໃນ ໂດຍສະເພາະ ຂົງເຂດອຸດສາຫະກຳ ອຸດສາຫະກຳປຸງແຕ່ງ ຫັດຖະກຳ ແລະ ການຜະລິດກະສິກຳ-ລ້ຽງສັດ ເພື່ອສາມາດແຂ່ງໄດ້ເງື່ອນໄຂເຂົ້າເປັນປະຊາຄົມເສດຖະກິດອາຊຽນ ຈາກທ່ານຜູ້ວ່າທະນາຄານແຫ່ງ ສປປ ລາວ ການລາຍງານກ່ຽວກັບການກະກຽມຄວາມພ້ອມດ້ານນະໂຍບາຍ ແລະ ກົນໄກ ການປົກປ້ອງຜູ້ຜະລິດພາຍໃນຂົງເຂດອຸດສາຫະກຳ ອຸດສາຫະກຳປຸງແຕ່ງ ຫັດຖະກຳ ແລະ ການຜະລິດກະສິກຳ-ລ້ຽງສັດ ເພື່ອສາມາດແຂ່ງໄດ້ເງື່ອນໄຂເຂົ້າເປັນປະຊາຄົມເສດຖະກິດອາຊຽນ ຈາກທ່ານລັດຖະມົນຕີວ່າການກະຊວງອຸດສາຫະກຳ ແລະ ການຄ້າ ຮັບຟັງການລາຍງານກ່ຽວກັບການແກ້ໄຂສະພາບການຄຸ້ມຄອງ ຮ້ານບັນເທີງ ຮ້ານກິນດື່ມທີ່ເປີດກາຍກຳນົດເວລາ ແລະ ບັນຫາອື່ນໆຈາກທ່ານລັດຖະມົນຕີວ່າການກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ແລະ ຮັບຟັງການລາຍງານກ່ຽວກັບການແກ້ໄຂບັນຫາຄວາມບໍ່ສະຫງົບ ການກໍ່ອາຊະຍາກຳ ແລະ ບັນຫາຢາເສບຕິດ ຈາກທ່ານລັດຖະມົນຕີວ່າການກະຊວງປ້ອງກັນຄວາມສະຫງົບ ຈາກນັ້ນ ສສຊ ກໍ່ໄດ້ພ້ອມກັນປະກອບຄຳຄິດເຫັນຕໍ່ບັນດາບັນຫາທີ່ເຫັນວ່າບໍ່ມີ ຄວາມສອດຄ່ອງ ພ້ອມທັງໄດ້ຮັບການໃຫ້ຄວາມກະຈ່າງແຈ້ງຈາກພາກສ່ວນກ່ຽວຂ້ອງ ຢ່າງກົງໄປກົງມາ ແລະ ມີບັນຍາກາດທີ່ສ້າງສັນ.
ແຫລ່ງຂ່າວ:
