ໂຄງການສາຍສົ່ງ 230 ກິໂລໂວນ ທ່າວຽງ-ທ່າບົກ ກວມເອົາ 2 ແຂວງຄື: ແຂວງໄຊສົມບູນ ແລະ ແຂວງບໍລິຄຳໄຊ ປະກອບມີສາຍສົ່ງຈາກສະຖານີທ່າວຽງ ຫາສະຖານີທ່າບົກ ຍາວ 154 ກິໂລແມັດ ຈຳນວນເສົາໄຟ 376 ຕົ້ນ ແລະ ສະຖານີກໍ່ສ້າງໃໝ່ 1 ສະຖານີ ແລະ ຂະຫຍາຍສະຖານີ 1 ແຫ່ງ ໃຊ້ໄລຍະດຳເນີນໂຄງການ 3 ປີກວ່າ ໂດຍແມ່ນລັດວິສາຫະກິດໄຟຟ້າລາວເປັນເຈົ້າຂອງໂຄງການ ແລະ ບໍລິສັດ China International Water and Electric Corporation (CWE) ເປັນຜູ້ຮັບເໝົາກໍ່ສ້າງໂຄງການນີ້ ເຮັດບົດບາດລຳລຽງກະແສໄຟຟ້າ ຈາກບັນດາເຂື່ອນຕ່າງໆຂອງໄຟຟ້າລາວ ແລະ ຂອງຜູ້ຜະລິດໄຟຟ້າເອກະລາດ (IPP) ເປັນຕົ້ນແມ່ນ ເຂື່ອນນ້ຳງຽບ 2 ນ້ຳຊັນ 3 ນ້ຳຈຽນ ແລະ ບັນດາເຂື່ອນອື່ນໆອີກຈຳນວນໜຶ່ງ ທີ່ຈະມີການກໍ່ສ້າງໃນຕໍ່ໜ້າ ເພື່ອເຊື່ອມຕໍ່ກັບລະບົບສາຍສົ່ງພາກກາງ 2 ແລະ ນະຄອນຫຼວງວຽງຈັນ.
ຜົນສຳເລັດໂຄງການນີ້ ຈະເປັນການປະກອບສ່ວນສຳຄັນ ໃນການພັດທະນາເສດຖະກິດ-ສັງຄົມ ເພື່ອຫັນຈາກເສດຖະກິດທຳມະຊາດ ໄປສູ່ເສດຖະກິດຜະລິດເປັນສິນຄ້າ ການຫັນປ່ຽນແບບວິທີການຜະລິດ ການດຳລົງຊີວິດ ແລະ ການແກ້ໄຂຄວາມທຸກຍາກຂອງປະຊາຊົນລາວບັນດາເຜົ່າ ຢ່າງຕັ້ງໜ້າ.
ພິທີເປີດການນຳໃຊ້ໂຄງການດັ່ງກ່າວ ໄດ້ຈັດຂຶ້ນວັນທີ 19 ທັນວາ 2015 ທີ່ສະໂມສອນຫ້ອງວ່າການແຂວງບໍລິຄຳໄຊ ໂດຍມີທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ຜູ້ຊີ້ນຳວຽກງານຂົງເຂດເສດຖະກິດການຜະລິດ ແລະ ຈໍລະຈອນ ທ່ານ ດຣ. ຄຳມະນີ ອິນທິລາດ ລັດຖະມົນຕີວ່າການກະຊວງພະລັງງານ ແລະ ບໍ່ແຮ່ ທ່ານທູດເສດຖະກິດ ແລະ ການຄ້າ ແຫ່ງ ສປ ຈີນ ປະຈຳລາວ ທ່ານເຈົ້າແຂວງບໍລິຄຳໄຊ ຜູ້ອຳນວຍການລັດວິສາຫະກິດໄຟຟ້າລາວ ແຂກຖືກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ.
ແຫລ່ງຂ່າວ:
