ກອງປະຊຸມລັດຖະບານ ສະໄໝສາມັນ ປະຈຳເດືອນທັນວາ 2015 ໄດ້ໄຂຂຶ້ນຢ່າງເປັນທາງການ ໃນລະຫວ່າງ ວັນທີ 21-22 ທັນວາ 2015 ທີ່ຫ້ອງວ່າການລັດຖະບານ ພາຍໃຕ້ການເປັນ ປະທານຂອງ ທ່ານ ທອງສິງ ທຳມະວົງ ນາຍົກລັດຖະມົນຕີ ໂດຍມີບັນດາທ່ານຮອງນາຍົກລັດຖະມົນຕີ ແລະ ສະມາຊິກລັດຖະບານ ເຂົ້າຮ່ວມຢ່າງພ້ອມພຽງ.
…….ກອງປະຊຸມສະໄໝສາມັນຄັ້ງນີ້ ຈະໄດ້ພ້ອມກັນປຶກສາຫາລື ຄົ້ນຄວ້າ ແລະ ປະກອບຄຳຄິດຄຳເຫັນ ໃສ່ບົດລາຍງານຜົນການຈັດຕັ້ງປະຕິບັດຄຳສັ່ງເລກທີ 31/ນຍ ວ່າດ້ວຍຍຸດຕິຊົ່ວຄາວ ການຂຸດຄົ້ນໄມ້ໃນເຂດປ່າຜະລິດ ການຂຸດຄົ້ນໄມ້ ແລະ ເຄື່ອງປ່າຂອງດົງ ສົກປີ 2014-2015 ແລະ ສະເໜີອະນຸມັດແຜນການ ສົກປີ 2015-2016 ລາຍງານຜົນການຈັດຕັ້ງປະຕິບັດຄຳສັ່ງເລກທີ 13/ນຍ ກ່ຽວກັບການໂຈະການພິຈາລະນາ ແລະ ອະນຸມັດໂຄງການລົງທຶນໃໝ່ ສຳລັບການຊອກຄົ້ນ ແລະ ສຳຫຼວດແຮ່ທາດ ການປູກຢາງພາລາ ແລະ ໄມ້ວິກ ໃນຂອບເຂດທົ່ວປະເທດ ຮ່າງແຜນຍຸດທະສາດການພັດທະນາລະບົບສະຖາບັນການເງິນ-ເງິນຕາໄລຍະ 10 ປີ (2016-2025) ແລະ ວິໄສທັດຮອດປີ 2030 ລາຍງານກ່ຽວກັບການສະເໜີເອົາວຽກງານຄວບຄຸມ ສະກັດກັ້ນ ແລະ ຕ້ານຢາເສບຕິດ ເປັນວາລະແຫ່ງຊາດ ລາຍງານຮ່າງແຜນດຳເນີນງານແຫ່ງຊາດເພື່ອຄວາມສະເໝີພາບຍິງ-ຊາຍ ໄລຍະ 5 ປີ ຄັ້ງ III 2016-2020 ຮ່າງວິໄສທັດຮອດປີ 2030 ລາຍງານຄວາມຄືບໜ້າໂຄງການຍົກລະດັບເສັ້ນທາງເລກທີ 13 ເໜືອ ແຕ່ນະຄອນຫຼວງວຽງຈັນ-ໂພນໂຮງ ແລະ 13 ໃຕ້ ແຕ່ນະຄອນຫຼວງວຽງຈັນ-ບ້ານໄຮ່ ດ້ວຍຮູບແບບລົງທຶນຮ່ວມມື ລະຫວ່າງພາກລັດ-ພາກທຸລະກິດ ແລະ ຮ່າງປັບປຸງດຳລັດວ່າດ້ວຍກອງທຶນທາງ ສະບັບເລກທີ 09/ນຍ ລົງວັນທີ 15 ມັງກອນ 2001 ພ້ອມນີ້ ກອງປະຊຸມ ກໍຈະໄດ້ຮັບຟັງການຊີ້ນຳຈາກ ທ່ານນາຍົກລັດຖະມົນຕີ ແລະ ແຜນວຽກຈຸດສຸມຂອງປະຈຳເດືອນມັງກອນ 2016.
ແຫ່ລງຂ່າວ
