ປີ 2015 ນີ້, ເປັນປີຄົບຮອບ 55 ປີ ແຫ່ງການສ້າງຕັ້ງສາຍພົວພັນການທູດ ແລະ 50 ປີ ຂອງວັນສ້າງຕັ້ງສະມາຄົມມິດຕະພາບ ລາວ-ຣັດເຊຍ ສິ່ງດັ່ງກ່າວສະແດງໃຫ້ເຫັນເຖິງຜົນສຳເລັດຂອງການພົວພັນຮ່ວມມືທີ່ນັບມື້ຂະຫຍາຍຕົວຢ່າງຕໍ່ເນື່ອງ. ດັ່ງທີ່ທ່ານ ມີຄາອິ ບາຣານົບ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງສະຫະພັນຣັດເຊຍ ປະຈຳລາວ ໄດ້ແຈ້ງຕໍ່ສື່ມວນຊົນ ໃນວັນທີ 18 ທັນວາ 2015 ນີ້ວ່າ: ລັດຖະບານຣັດເຊຍ ມີຄວາມເພິ່ງພໍໃຈຕໍ່ການຮ່ວມມືສອງຝ່າຍທີ່ນັບມື້ຂະຫຍາຍຕົວ ໂດຍສະເພາະແມ່ນທາງດ້ານການເມືອງ ທີ່ສະແດງອອກເຊັ່ນ: ການນຳຂັ້ນສູງຂອງສອງປະເທດໄດ້ມີການພົບປະກັນ ຢູ່ນະຄອນຫລວງປັກກິງ ເປັນຄັ້ງ ທຳອິດໃນຮອບ 5 ປີ ສິ່ງດັ່ງກ່າວເປັນການກະຕຸກຊຸກຍູ້ຢ່າງແຂງແຮງໃຫ້
ແກ່ການເສີມຂະຫຍາຍການຮ່ວມມືສອງຝ່າຍໃນດ້ານຕ່າງໆໃຫ້ຂະຫຍາຍຕົວຢ່າງຕໍ່ເນື່ອງເປັນຕົ້ນ: ການຮ່ວມມືໃນຂົງເຂດວັດທະນະທຳ-ສັງຄົມ, ຂົງເຂດນິຕິບັນຍັດ ລວມເຖິງຂົງເຂດໂທລະຄົມມະນາຄົມ ແລະ ການສື່ສານ, ການບິນ,ການສຳຫລວດບໍ່ແຮ່, ການຂຸດຄົ້ນບໍ່ແຮ່ ແລະ ອື່ນໆ.
ທ່ານເອກອັກຄະລັດຖະທູດຍັງຍົກໃຫ້ເຫັນວ່າ: ເປັນໜ້າເສຍດາຍທີ່ລະດັບການຮ່ວມມືດ້ານເສດຖະກິດ-ການຄ້າຂອງສອງປະເທດຍັງບໍ່ທັນຕອບສະໜອງຕາມຄວາມສາມາດຕົວຈິງ, ມູນຄ່າການຊື້-ຂາຍສອງຝ່າຍຍັງຢູ່ໃນລະດັບທີ່ບໍ່ທັນສູງ ແຕ່ທັງສອງຝ່າຍກໍໄດ້ມີການປຶກສາຫາລື ກ່ຽວກັບຂໍ້ຕົກລົງໃໝ່ວ່າດ້ວຍການຄ້າຮ່ວມກັນ ເຊິ່ງຈະເປັນການເອື້ອອຳ ນວຍໃຫ້ວຽກງານດັ່ງກ່າວມີທ່ວງທ່າດີຂຶ້ນ. ໃນການພົວພັນຮ່ວມມືຂົງເຂດທີ່ມີທ່ວງທ່າຂະຫຍາຍຕົວເປັນພິເສດແມ່ນດ້ານການສຶກສາ, ສະເພາະໃນປີນີ້ ມີນັກສຶກສາລາວໄດ້ໄປສຶກສາຕໍ່ທີ່ປະເທດຣັດເຊຍເຖິງ 37 ຄົນ, ໃນນັ້ນ26 ທຶນແມ່ນໄປຮຽນດັບປະລິນຍາຕີ ແລະ 11 ທຶນໄປຮຽນ ປະລິນຍາໂທ ໃນສາຂາວິຊາວິທະຍາສາດ, ການເມືອງ,ເສດຖະກິດ, ພາສາສາດ, ນິຕິສາດ, ການປົກຄອງ ແລະ ອື່ນໆ.
ສິ່ງດັ່ງກ່າວສະແດງໃຫ້ເຖິງຜົນສຳເລັດແຫ່ງການພົວພັນຮ່ວມື ລາວ-ຣັດເຊຍ ໃນຕະຫລອດໄລຍະ 50 ກວ່າປີຜ່ານມາ ເຊິ່ງເປັນການປະກອບສ່ວນພັດທະນາຂົງເຂດວຽກງານຕ່າງໆໃຫ້ນັບເຂັ້ມແຂງ ແລະ ຂະຫຍາຍຕົວ, ຍັງເປັນການປະກອບສ່ວນເສີມສ້າງສາຍພົວພັນມິດຕະພາບ ກໍຄືການປະກອບສ່ວນຢ່າງເໝາະສົມເຂົ້າໃນພາລະກິດເສີມສ້າງສັນຕິພາບ, ສະຖຽນລະພາບ, ມິດຕະພາບ ແລະ ການຮ່ວມມື ເພື່ອການພັດທະນາໃນພາກພື້ນ ແລະ ໃນໂລກ.
ແຫ່ລງຂ່າວ
