ຂປລ. ກົມສື່ມວນຊົນ ກະຊວງຖະແຫລງຂ່າວ, ວັດທະນຳທຳ ແລະ ທ່ອງທຽວ (ຖວທ) ຍົກລະດັບຄວາມຮູ້ຄວາມສາມາດ ໃຫ້ ແກ່ສຳມະນາກອນ ຈາກສູນກາງ ແລະ ທ້ອງຖິ່ນ ໃນຫົວຂໍ້ “ ກອງປະຊຸມປຶກສາຫາລືການຄຸ້ມຄອງວຽກງານຖະແຫລງຂ່າວ-ສື່ມວນຊົນ ” ຂຶ້ນໃນວັນທີ່ 21 ທັນວາ 2015 ທີ່ກະຊວງດັ່ງກ່າວ, ໂດຍການເປັນປະທານຂອງ ທ່ານ ປິ່ນປາຖະໜາ ພັນທະມາລີ ຫົວໜ້າກົມສື່ມວນຊົນ ກະຊວງ ຖວທ ແລະ ສຳມະນາ ກອນ ຈາກ 11 ແຂວງທົ່ວປະເທດ 1 ນະຄອນຫລວງ ເຂົ້າຮ່ວມ. ເປົ້າໝາຍ ແມ່ນແນ່ໃສ່ປັບປຸງການຄຸ້ມຄອງ ວຽກງານຖະແຫລງຂ່າວ-ສື່ມວນຊົນ ເພື່ອຮັບປະກັນໃນໜ້າທີ່ວຽກງານການເມືອງ ຍົກລະດັບມາດຕະຖານ ໃຫ້ທັນກັບຍຸກສະໄໝ ແລະ ການພັດທະນາເສດຖະກິດ – ສັງຄົມ ໃນໄລຍະໃໝ່, ໂດຍສະເພາະການກຽມເຂົ້າປະຊາຄົມອາຊຽນ. ສຳມະນາກອນ ຈະໄດ້ແລກປ່ຽນປະສົບການໃນການເຮັດວຽກ, ປະກອບຄຳຄິດຄຳເຫັນ ໃສ່ບາງບັນຫາ ໃນວຽກງານສື່, ນອກນັ້ນ ກອງປະຊຸມ ຍັງຈະໄດ້ເຊື່ອມຊຶ່ມບັນດາກົດໝາຍ, ດຳລັດ ທີ່ກ່ຽວຂ້ອງກັບວຽກງານຄຸ້ມຄອງສື່ມວນຊົນຕື່ມອີກ.
ທ່ານ ປິ່ນປາຖະໜາ ພັນທະມາລີ ກ່າວວ່າ: ປັດຈຸບັນສື່ມວນຊົນລາວ ມີການຂະຫຍາຍຕົວທາງດ້ານປະລິ ມານ ແລະ ຄຸນນະພາບ, ມີຄວາມເຂັ້ມແຂງດ້ານການຈັດຕັ້ງ ສາມາດຄຸ້ມຄອງປະສານສົມທົບ ເຮັດໜ້າທີ່ການເມືອງໄດ້ເປັນຢ່າງເປັນດີ, ໂດຍສະແດງອອກ ຄື ປະຊາຊົນລາວ ສາມາດເຂົ້າເຖິງຂໍ້ມູນຂ່າວສານ ທັງພາຍໃນ ແລະ ຕ່າງປະເທດໄດ້ຢ່າງສະດວກສະບາຍ, ນອກນັ້ນ ທ່ານ ຍັງໄດ້ເນັ້ນບາງບັນຫາ ໃຫ້ສຳມະນາກອນ ເອົາໃຈໃສ່ ເຊັ່ນ: ການຄຸ້ມຄອງວຽກງານໂຄສະນາ, ບົດບາດໜ້າທີ່ສິດ ຂອບເຂດການເຄື່ອນໄຫວ, ການສ້າງຕັ້ງອົງການສື່ມວນຊົນ, ການຄຸ້ມຄອງ ຊ່ອງລາຍການໂທລະພາບໃຊ້ສາຍ ແລະ ບໍ່ໃຊ້ສາຍ, ສິດກ່ຽວກັບລິຂະສິດ ຕໍ່ຜະລິດຕະພັນສື່ມວນຊົນ, ຮຽນຮູ້ກ່ຽວກັບວຽກງານດາວທຽມ, ການຄຸ້ມຄອງສື່ແບບໃໝ່ ແລະ ອື່ນໆຕື່ມອີກ.
ແຫລ່ງຂ່າວ:
