ສຳນັກຂ່າວຕ່າງປະເທດ ລາຍງານໃນວັນທີ 19 ທັນວາຜ່ານມານີ້ວ່າ ຄະນະມົນຕີຄວາມໝັ້ນຄົງ ແຫ່ງ ສະຫະປະຊາຊາດ ຫລື UNSC ຈຳນວນ 15 ປະເທດ ໄດ້ລົງມະຕິຢ່າງເປັນເອກະສັນ ຮັບຮອງຮ່າງມະຕິວ່າດ້ວຍ ການຂວ້ຳບາດເສັ້ນທາງການເງິນຂອງກຸ່ມໄອເອັສ ຊຶ່ງນຳສະເໜີໂດຍ ສະຫະລັດອາເມຣິກາ ແລະ ຣັດເຊຍ ຊຶ່ງມະຕິດັ່ງກ່າວນີ້ ໄດ້ສະເໜີໃຫ້ປະເທດຕ່າງໆ ນຳໃຊ້ມາດຕະການຂວ້ຳບາດ ດ້ວຍການຫ້າມຊື້-ຂາຍ ວັດຖຸບູຮານ ຈາກປະເທດຊີຣີ, ຂວ້ຳບາດບຸກຄົນ ແລະ ອົງກອນ ທີ່ເຄື່ອນໄຫວຊື້-ຂາຍນ້ຳມັນ ຈາກກຸ່ມໄອເອັສ ແລະ ເຄືອຂ່າຍ ຕະຫລອດຮອດ ຮຽກຮ້ອງໃຫ້ແຕ່ລະປະເທດ ລະງັບການຈ່າຍເງິນຄ່າໄຖ່ ໃນກໍລະນີປະຊາຊົນຖືກຈັບ ເພື່ອເປັນຕົວປະກັນ.
ທັງນີ້ ພາຍໃນກອງປະຊຸມ ໄດ້ມີການປະເມີນວ່າ ກຸ່ມໄອເອັສ ມີລາຍໄດ້ຈາກການຂາຍນ້ຳມັນເຖື່ອນ ປີລະປະມານ 500 ລ້ານໂດລາ ແລະ ມີລາຍໄດ້ຈາກການ ສົ່ງອອກແຮ່ທາດ ແລະ ຊັບພະຍາກອນອື່ນໆ ອີກປະມານ 550 ລ້ານໂດລາຕໍ່ປີ ຊຶ່ງເຮັດໃຫ້ກຸ່ມດັ່ງກ່າວ ມີງົບປະມານນຳໃຊ້ ສູງເຖິງ 30 ລ້ານໂດລາຕໍ່ເດືອນ.