ຂປລ. ໃນວັນທີ 18 ທັນວາ 2015 ນີ້ຢູ່ກະຊວງການຕ່າງປະເທດ, ທ່ານ ທອງລຸນ ສິສຸລິດ ຮອງນາຍົກລັດຖະ ມົນຕີ, ລັດຖະມົນຕີວ່າການກະຊວງການຕ່າງປະເທດ ໄດ້ໃຫ້ກຽດຕ້ອນຮັບ ທ່ານ Daniel Russel ຜູ້ຊ່ວຍລັດຖະມົນຕີກະຊວງການຕ່າງປະເທດ ສະຫະລັດ ອາເມຣິກາ ພ້ອມຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ແຕ່ວັນທີ 17-18 ທັນວາ ນີ້.
ໃນໂອກາດນີ້ ທ່ານ ທອງລຸນ ສີສຸລິດ ໄດ້ສະແດງຄວາມຕ້ອນຮັບ ແລະ ຊົມເຊີຍ ພ້ອມທັງຕີລາຄາສູງຕໍ່ ທ່ານ Daniel Russel ແລະ ຄະນະ ທີ່ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ ເຊິ່ງເປັນການປະກອບສ່ວນສໍາຄັນ ເຂົ້າໃນການເສີມຂະຫຍາຍສາຍພົວພັນຮ່ວມມື ລະຫວ່າງ ສອງປະເທດ ລາວ ແລະ ສະຫະລັດອາເມຣິກາ ໃຫ້ນັບມື້ນັບແໜ້ນແຟ້ນຂຶ້ນກວ່າເກົ່າ, ພ້ອມນີ້ ສອງຝ່າຍໄດ້ປຶກສາຫາລືໃນການກະກຽມໃຫ້ແກ່ການຢ້ຽມຢາມລາວ ຂອງຄະນະຜູ້ແທນຂັ້ນສູງອາເມຣິກາ ໃນປີ 2016 ເນື່ອງໃນໂອກາດການເປັນປະທານອາຊຽນ ຂອງ ສປປ ລາວ ທັງໄດ້ປຶກສາຫາລືກ່ຽວກັບການຊຸກຍູ້ສົ່ງເສີມການພົວພັນຮ່ວມມືສອງຝ່າຍໃນຕໍ່ໜ້າ.
ທ່ານ Daniel Russel ໄດ້ສະແດງຄວາມຂອບອົກຂອບໃຈຕໍ່ ທ່ານຮອງນາຍົກລັດຖະມົນຕີ, ລັດຖະມົນຕີວ່າ ການກະຊວງການຕ່າງປະເທດ ທີ່ສະຫລະເວລາອັນມີຄຸນຄ່າໃຫ້ການຕ້ອນຮັບຢ່າງອົບອຸນ, ພ້ອມທັງ ໄດ້ແຈ້ງໃຫ້ຊາບເຖິງຈຸດປະສົງຂອງການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້.
ໃນໂອກາດ ການເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ ທ່ານ Daniel Russel ແລະ ຄະນະ ໄດ້ພົບປະ ແລະ ເຮັດວຽກ ເພື່ອປຶກສາຫາລື ກຽວກັບການພົວພັນຮ່ວມມືໃນຕໍ່ໜ້າ ກັບ ບັນດາທ່ານລັດຖະມົນຕີວ່າການ, ຊ່ວຍວ່າການກະຊວງທີ່ກ່ຽວຂ້ອງຂອງ ສປປ ລາວ ຕື່ມອີກ.
ແຫລ່ງຂ່າວ:
