ສຳນັກຂ່າວຕ່າງປະເທດ ລາຍງານໃນວັນທີ 20 ທັນວາຜ່ານມານີ້ວ່າ ລັດຖະບານຕວກກີ ໄດ້ເລີ່ມຖອນທະຫານຂອງຕົນ ອອກຈາກແຂວງໂມຊູນ ທາງພາກເໜືອຂອງປະເທດອີຣັກ ໃນວັນທີ 19 ທັນວາຜ່ານມານີ້ ຊຶ່ງເປັນຜົນມາຈາກ ປະທານາທິບໍດີ ບາຣັກ ໂອບາມາ ແຫ່ງສະຫະລັດອາເມຣິກາ ໄດ້ຮຽກຮ້ອງໃຫ້ ທ່ານ ເຣເຊບ ເຕຢິບ ເອີໂດກັນ ໃຫ້ຖອນກຳລັງກັບຄືນປະເທດ ເພື່ອຫລຸດຜ່ອນຄວາມເຄັ່ງຕຶງ ກັບລັດຖະບານອີຣັກ ຕໍ່ກັບບັນຫາດັ່ງກ່າວ.

ທັງນີ້ ເນື່ອງຈາກໃນອາທິດຜ່ານມາ ລັດຖະບານອີຣັກ ໄດ້ຮຽກຮ້ອງໃຫ້ມີການ ຖອນທະຫານຕວກກີ ອອກຈາກດິນແດນຂອງຕົນ ຊຶ່ງການທີ່ຕວກກີ ເອົາກອງທະຫານ ແລະ ລົດຕັງ ໄປປະຈຳການຢູ່ແຂວງໂມຊູນ ປະເທດອີຣັກນັ້ນ ແມ່ນຖືເປັນການບຸກລຸກ ຢ່າງຜິດກົດໝາຍ, ແຕ່ຕວກກີເອງເຫັນວ່າ ມີຄວາມຈຳເປັນ ຕ້ອງຮັກສາກຳລັງທະຫານໄວ້ໃນອີຣັກ ເພື່ອເຝິກອົບຮົມ ກອງກຳລັງຂອງອີຣັກ ໃນການຕໍ່ສູ້ກັບກຸ່ມໄອເອັສ.