ເພື່ອເປັນການຂ່ຳນັບຮັບຕ້ອນ 3 ວັນປະຫວັດສາດສຳຄັນຂອງຊາດ ກະກຽມກອງປະຊຸມໃຫຍ່ 3 ຂັ້ນ ແລະ ກຳລັງຈັດຕັ້ງປະຕິບັດ 4 ບຸກທະລຸ ພ້ອມກັບສູ້ຊົນໃຫ້ບັນລຸຕົວເລກເປົ້າໝາຍສະຫັດສະວັດ ດ້ານການພັດທະນາ ໃນປີ 2015 ວຽກງານການສົ່ງເສີມສຸຂະພາບ ສ້າງຕົວເມືອງແຫ່ງສຸຂະພາບ ກໍ່ເປັນວຽກງານໜຶ່ງທີ່ສຳຄັນ ແລະ ແມ່ນໜ້າທີ່ຂອງໝົດທຸກຄົນ ເພື່ອໃຫ້ທຸກຄົນມີສຸຂະພາບດີແມ່ນມີຄວາມສຳຄັນ ຄອບຄົວຄືຈຸລັງຂອງສັງຄົມ ສະມາຊິກພາຍໃນຄອບຄົວມີສຸຂະພາບດີ ຈະຊຸກດັນໃຫ້ສັງຄົມຊຸມຊົນມີສຸຂະພາບດີເໝືອນກັນ.
ເພາະສະນັ້ນ ໂຄງການສ້າງພຶດຕິກຳໃຫ້ຄອບຄົວມີສຸຂະພາບ ໄດ້ຈັດຕັ້ງປະຕິບັດຢູ່ 3 ບ້ານ ກຸ່ມນາຂ່າຄື: ບ້ານນາຂ່າ ແສນດິນ ແລະ ບ້ານນາທ່ອນ ເມືອງນາຊາຍທອງ ນະຄອນຫຼວງວຽງຈັນ ຊຶ່ງໄດ້ຮັບກຽດຖືກຄັດເລືອກຈາກອົງການອະນາໄມໂລກ ປະຈຳພາກພື້ນປາຊີຟິກຕາເວັນອອກ ມີແຕ່ 2 ປະເທດຄື: ສປປ ລາວ ແລະ ຟີລິບປິນ ປັດຈຸບັນ ໂຄງການໄດ້ລິເລີ່ມຈັດຕັ້ງປະຕິບັດໃນທ້າຍປີ 2013 ຢູ່ 3 ບ້ານເປົ້າໝາຍຂອງກຸ່ມນາຂ່າ ເພື່ອສ້າງເປັນຕົວແບບ ໃຫ້ສະມາຊິກຄອບຄົວມີສຸຂະພາບດີ ໂດຍປະຕິບັດ 4 ຂໍ້ ໂຄງການຕົວເມືອງແຫ່ງສຸຂະພາບ (ການຄວບຄຸມຢາສູບຫຼຸດຜ່ອນອຸປະຕິເຫດຕາມທ້ອງຖະໜົນ ທີ່ພົວພັນເຖິງການດື່ມສິ່ງມຶນເມົາ ສົ່ງເສີມການກິນອາຫານທີ່ເປັນປະໂຫຍດຕໍ່ຮ່າງກາຍ ແລະ ການອອກກຳລັງກາຍເພື່ອສຸຂະພາບ) ທັງນີ້ເພື່ອເຮັດໃຫ້ສະມາຊິກພາຍໃນຄອບຄົວມີສຸຂະພາບດີ ການເກັບກຳຂໍ້ມູນທົ່ວໄປກ່ຽວກັບສຸຂະພາບຂອງຄອບຄົວ ແລະ ເພື່ອສຸຂະພາບດີຂອງໝົດທຸກຄົນ.
ພິທີຈັດຂຶ້ນວັນທີ 11 ມັງກອນ 2014 ຜ່ານມາ ຢູ່ທີ່ໂຮງຮຽນປະຖົມສົມບູນບ້ານນາຂ່າ ໂດຍໃຫ້ກຽດເຂົ້າຮ່ວມຂອງທ່ານ ກອງ ອຸ່ນມະໂນ ຮອງເຈົ້າເມືອງນາຊາຍທອງ ມີຫົວໜ້າພະແນກສາທາລະນະສຸກ ນະຄອນຫຼວງວຽງຈັນ ຫົວໜ້າຫ້ອງການສາທາລະນະສຸກເມືອງ ຫົວໜ້າຫ້ອງການ ພະນັກງານ ພໍ່ແມ່ປະຊາຊົນພາຍໃນ 3 ບ້ານເຂົ້າຮ່ວມ.