ບໍລິສັດ ປີໂຕຣລ້ຽມເທຣດດິງລາວ ແລະ ບໍລິສັດ ລັດວິສາຫະກິດລາວໂທລະຄົມ ໃຫ້ການອຸປະຖຳເປັນວັດຖຸ ແລະ ເງິນສົດ ໃຫ້ແກ່ກະຊວງປ້ອງກັນປະເທດ ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 65 ປີ (20 ມັງກອນ 1949 ຫາ 20 ມັງກອນ 2014) ທີ່ຈະໝູນວຽນມາບັນຈົບຄົບຮອບອີກວາລະໜຶ່ງ.
ພິທີມອບ-ຮັບການອຸປະຖຳດັ່ງກ່າວ ຈັດຂຶ້ນວັນທີ 13 ມັງກອນ 2014 ທີ່ກະຊວງປ້ອງກັນປະເທດ ໂດຍໃຫ້ກຽດກ່າວມອບຂອງທ່ານ ບຸນຖັນ ຈິດຕະວົງ ຜູ້ອຳນວຍການບໍລິສັດ ປີໂຕຣລ້ຽມເທຣດດິງລາວ ມອບເປັນວັດຖຸ ແລະ ເງິນສົດ ລວມມູນຄ່າ 107 ລ້ານກວ່າກີບ ແລະ ທ່ານ ທອງໃສ ຊານໄຊຍະ ຜູ້ອຳນວຍການໃຫຍ່ ບໍລິສັດ ລັດວິສາຫະກິດລາວໂທລະຄົມ ມອບເປັນເງິນສົດ ມູນຄ່າ 100 ລ້ານກີບ ແລະ ໃຫ້ກຽດກ່າວຮັບຂອງທ່ານ ພົນຕີ ຈັນສະໝອນ ຈັນຍາລາດ ລັດຖະມົນຕີຊ່ວຍວ່າການ ກະຊວງປ້ອງກັນປະເທດ ມີບັນດາພະນັກງານທັງສອງຝ່າຍ ເຂົ້າຮ່ວມເປັນສັກຂີພິຍານ.
ໂອກາດນີ້ ທ່ານລັດຖະມົນຕີຊ່ວຍວ່າການ ກະຊວງປ້ອງກັນປະເທດ ໄດ້ສະແດງຄວາມຂອບໃຈເປັນຢ່າງຍິ່ງ ຕໍ່ການຊ່ວຍເຫຼືອຄັ້ງນີ້ຂອງທັງສອງບໍລິສັດ ເຊິ່ງຖືວ່າເປັນການປະກອບສ່ວນສຳຄັນ ໃນການສ້າງສາ ແລະ ພັດທະນາປະເທດຊາດ ໂດຍສະເພາະ ກະກຽມສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 65 ປີ (20 ມັງກອນ 1949 ຫາ 20 ມັງກອນ 2014) ນີ້