ຂປລ. ໃນວັນທີ 13 ມັງກອນ 2014 ຢູ່ທີ່ໂຮງແຮມລາວພລາຊາ ນະຄອນຫລວງວຽງຈັນ, ສະຖາບັນສົ່ງເສີມພະລັງງານທົດແທນກະຊວງພະລັງງານ ແລະ ບໍ່ແຮ່ ຂອງລາວ ແລະ ບໍລິສັດໄຟຟ້ານ້ຳຕົກ ຂອງ ສປ ຈີນ ໄດ້ຮ່ວມກັນເຊັນບົດບັນທຶກກ່ຽວກັບການສຶກສາແຜນແມ່ບົດ ເພື່ອນຳໃຊ້ພະລັງງານລົມ ແລະ ແສງຕາເວັນ ໃນລາວ, ໃຫ້ກຽດລົງນາມໃນບົດບັນທຶກດັ່ງກ່າວ ຕາງໜ້າຝ່າຍລາວ ໂດຍ ທ່ານ ຫັດສະດີ ສີສຸລາດ ຫົວໜ້າສະຖາບັນສົ່ງເສີມພະລັງ ງານທົດແທນ, ຕາງໜ້າຝ່າຍ ບໍລິສັດ ໂດຍ ທ່ານ ດຣ ເຊັນ ກວນຟູ ຮອງປະທານບໍລິສັດໄຟຟ້ານ້ຳຕົກ ຂອງ ສປ ຈີນ ມີພາກສ່ວນກ່ຽວຂ້ອງທັງ ສອງຝ່າຍເຂົ້າຮ່ວມເປັນສັກຂີພິຍານ.
ໃນການຮ່ວມມືຄັ້ງນີ້ ທັງສອງຝ່າຍ ຈະໄດ້ພ້ອມກັນສຳຫລວດພື້ນທີ່ຕົວຈິງໃນຂອບເຂດທົ່ວປະເທດ ເພື່ອຊອກຫາຈຸດທີ່ເໝາະສົມໃນການພັດທະນາ ພະ ລັງງານລົມ ແລະ ແສງຕາເວັນ ໃຫ້ສາມາດເຊື່ອມຕໍ່ເຂົ້າກັບລະບົບຕາຂ່າຍໄຟຟ້າລາວ ໂດຍການສຳຫລວດທາງບໍລິສັດຈະໃຫ້ການ ສະໜັບສະໜູນ ດ້ານທຶນຮອນ ແລະ ບຸກຄະລາກອນ ຊຶ່ງໃນເບື້ອງຕົ້ນໄດ້ສຳເລັດການສຶກສາຄວາມເປັນໄປໄດ້ຢູ່ສອງຈຸດ ຄື: ເມືອງນອງ ແລະ ເມືອງ ຊົນບູລີ ແຂວງ ສະຫວັນນະເຂດ. ການພັດທະນາພະລັງງານແສງຕາເວັນ ຢູ່ ສປປ ລາວ ໃນໄລຍະຜ່ານມາ ແມ່ນເລັ່ງໃສ່ຂະຫຍາຍລະບົບໄຟຟ້າແສງຕາເວັນ ຢູ່ເຂດ ຫ່າງໄກສອກຫລີກບ່ອນທີ່ຕາຂ່າຍໄຟຟ້າຂະຫຍາຍເຂົ້າບໍ່ເຖິງ.