ສຳນັກຂ່າວຕ່າງປະເທດ ລາຍງານໃນວັນທີ 16 ທັນວາຜ່ານມານີ້ວ່າ ທ່ານ ຈອນ ແຄຣີ ລັດຖະມົນຕີການຕ່າງປະເທດ ສະຫະລັດອາເມຣິກາ ໄດ້ກ່າວຢູ່ກອງປະຊຸມ ຫາລືບັນຫາຊີຣີ ທີ່ນະຄອນຫລວງມົດສະກູ ປະເທດຣັດເຊຍ ເມື່ອວັນທີ 15 ທັນວາ 2015 ຜ່ານມານີ້ວ່າ ອາເມຣິກາ ແລະ ພັນທະມິດ ໄດ້ຫັນປ່ຽນນະໂຍບາຍ ບໍ່ຄິດປ່ຽນແປງລະບອບການປົກຄອງຢູ່ຊີຣີແລ້ວ ແລະ ຍອມຮັບຈຸດຢືນຂອງຝ່າຍຣັດເຊຍ ທີ່ບໍ່ສະເໜີແນວທາງ ໃນການປົດຕຳແໜ່ງ ປະທານາທິບໍດີ ບາຊາ ອັນ-ອັດຊາດ ໂດຍປ່ອຍໃຫ້ປະຊາຊົນຊາວຊີຣີ ເປັນຜູ່ກຳນົດຊາຕາກຳທາງການເມືອງ ພາຍໃນປະເທດດ້ວຍຕົນເອງ.

ພ້ອມກັນນັ້ນ, ພາຍໃນກອງປະຊຸມ ຍັງເຫັນດີຈະຈັດໃຫ້ມີການປະຊຸມລະດັບສາກົນ ເພື່ອຫາທາງຢຸຕິ ສົງຄາມກາງເມືອງຢູ່ຊີຣີ ຊຶ່ງຈະຈັດຂຶ້ນໃນວັນສຸກທີ 18 ທັນວານີ້ ທີ່ນະຄອນນິວຢອກ ສະຫະລັດອາເມຣິກາ, ຈາກນັ້ນ ຈຶ່ງຈະນຳສະເໜີຍັດຕິ ເຂົ້າສູ່ສະຫະປະຊາຊາດ ເປັນຂັ້ນຕອນຕໍ່ໄປ.