ສຳນັກຂ່າວຕ່າງປະເທດ ລາຍງານໃນວັນທີ 16 ທັນວາຜ່ານມານີ້ວ່າ ເຈົ້າໜ້າທີ່ນະຄອນທຽນຈິນ ປະເທດຈີນ ໄດ້ອອກຄຳສັ່ງຮື້ຖອນ ຕຶກອາຄານສູງກາງເມືອງ 3 ຫລັງ ທີ່ລັກລອບກໍ່ສ້າງຕໍ່ເຕີມ ໂດຍບໍ່ໄດ້ຮັບອະນຸຍາດ ແລະ ຜິດກົດໝາຍ ຊຶ່ງອາດເກີດອັນຕະລາຍ ຕໍ່ກັບຜູ່ຢູ່ອາໄສ ແລະ ປະຊາຊົນ ໂດຍບັນດາຕຶກດັ່ງກ່າວ ເຈົ້າໜ້າທີ່ອະນຸຍາດໃຫ້ກໍ່ສ້າງ ເປັນອາຄານສູງ 31 ຊັ້ນ ຈຳນວນ 2 ແຫ່ງ ແຕ່ເຈົ້າຂອງໂຄງການ ລັກລອບກໍ່ສ້າງເພີ່ມເຕີມ ເປັນອາຄານ ສູງ 41 ຊັ້ນ ແລະ 58 ຊັ້ນ, ສ່ວນອີກຫລັງໜຶ່ງ ແມ່ນອະນຸຍາດໃຫ້ປຸກສ້າງ ເປັນອາຄານສູງ 35 ຊັ້ນ ແຕ່ໄດ້ລັກລອບຕໍ່ເຕີມ ເປັນອາຄານສູງ 65 ຊັ້ນແທນ.
ທັງນີ້ ຈີນໄດ້ດຳເນີນມາດຕະການເຂັ້ມງວດ ໃນການປາບປາມ ການສໍ້ລາດບັງຫລວງ ຂອງເຈົ້າໜ້າທີ່ຢ່າງຈິງຈັງ ຫລັງຈາກເຫດການລະເບີດຮຸນແຮງ ຢູ່ສາງສິນຄ້າເມືອງທຽນຈິນ ເມື່ອເດືອນສິງຫາ 2015 ຜ່ານມາ ຊຶ່ງເຫດການຄັ້ງນັ້ນ ໄດ້ເຮັດໃຫ້ເຈົ້າໜ້າທີ່ຫລາຍສິບຄົນ ຖືກຈັບກຸມ ແລະ ດຳເນີນຄະດີ ໃນຂໍ້ຫາປະຕິບັດໜ້າທີ່ບໍ່ຖືກຕ້ອງ ແລະ ໄດ້ມີການກວດສອບ ອອກຄຳສັ່ງຮື້ຖອນ ອາຄານທີ່ບໍ່ໄດ້ມາດຕະຖານ ພາຍໃນນະຄອນທຽນຈິນ ອີກຫລາຍສິບແຫ່ງ.