ວັນທີ 13 ມັງກອນ 2014 ນີ້ ທີ່ກະຊວງແຜນການ ແລະ ການລົງທຶນ ໄດ້ມີພິທີລົງນາມເຊັນສັນຍາຂໍ້ຕົກລົງ ໃຫ້ທຶນຊ່ວຍເຫຼືອລ້າລະຫວ່າງລັດຖະບານລາວ ແລະ ລັດຖະບານຍີ່ປຸ່ນ ໂດຍຕາງໜ້າໃຫ້ລັດຖະບານລາວ ກະຊວງແຜນການ ແລະ ການລົງທຶນ ໄດ້ເຊັນສັນຍາຮັບຮອງເອົາແບບແຜນຜັງ ຂອງໂຄງການກໍ່ສ້າງຂົວເຊກອງ ແຂວງເຊກອງ ຊຶ່ງຕັ້ງຢູ່ເສັ້ນທາງຫຼວງແຫ່ງຊາດ ເລກທີ 16B ຢູ່ພາກໃຕ້ຂອງ ສປປ ລາວ ໂຄງການສ້າງຂົວດັ່ງກ່າວ ແມ່ນໄດ້ຮັບທຶນຊ່ວຍເຫຼືອລ້າຈາກລັດຖະບານປະເທດຍີ່ປຸ່ນ ໂດຍຜ່ານອົງການຮ່ວມມືສາກົນຂອງປະເທດຍີ່ປຸ່ນ (ອົງການໄຈກາ) ທີມງານໄຈກາຕ້ອງໄດ້ໃຊ້ງົບປະມານ 8 ແສນໂດລາສະຫະລັດ ຫຼື ປະມານ 6,4 ຕື້ກີບ ໃນການສຶກສາລາຍລະອຽດ ກ່ອນຈະສາມາດດຳເນີນການຈັດຕັ້ງລົງມືການກໍ່ສ້າງຕົວຈິງ.
ຂົວຂ້າມເຊກອງ ຈະໄດ້ສ້າງເປັນເສັ້ນທາງຜ່ານທັງພາຍໃນ ແລະ ສາກົນ ເຊື່ອມຕໍ່ລະຫວ່າງເມືອງເຊກອງ ແລະ ເມືອງດັກຈຶງ ທັງເປັນການປັບປຸງພັດທະນາການຂົນສົ່ງພາຍໃນແຂວງ ໃຫ້ມີປະສິດທິພາບ ເປັນການເຊື່ອມຕໍ່ການຂົນສົ່ງສິນຄ້າ ການໄປມາຂອງປະຊາຊົນພາຍໃນແຂວງເຊກອງ ໄດ້ມີຄວາມສະດວກສະບາຍ ແລະ ຍັງເປັນການພັດທະນາຂະຫຍາຍຕົວຂອງເສດຖະກິດ ໃຫ້ດີຂຶ້ນເທື່ອລະກ້າວ ຊຶ່ງປັດຈຸບັນນີ້ ແມ່ນໃຊ້ເຮືອເພື່ອຂ້າມແມ່ນ້ຳເຊກອງໃນຈຸດດັ່ງກ່າວ ເຊິ່ງການຂົນສົ່ງແມ່ນພົບຄວາມຫຍຸ້ງຍາກ ເນື່ອງຈາກລະດັບນ້ຳເຊກອງ ມີການປ່ຽນແປງຕະຫຼອດ ຂົວແມ່ນມີຄວາມຍາວ 300 ແມັດ ແຕ່ຖ້າລວມທັງໝົດຄວາມຍາວຂອງຂົວຂ້າມສອງຟາກຂອງແມ່ນ້ຳ ນັບທັງການກໍ່ສ້າງເຊື່ອມຈອດແມ່ນ 527 ແມັດ ໂຄງການດັ່ງກ່າວ ຖ້າສ້າງສຳເລັດ ແມ່ນຈະມີບົດບາດສຳຄັນເພື່ອປະກອບສ່ວນ ເຂົ້າໃນການພັດທະນາເສດຖະກິດ-ສັງຄົມໃນປະເທດລາວ ທີ່ຕັ້ງຢູ່ທາງຫຼວງແຫ່ງຊາດເລກທີ 16B ຊຶ່ງເປັນເສັ້ນທາງໜຶ່ງທີ່ຈະເຊື່ອມຕໍ່ແລວເສດຖະກິດຕາເວັນ ອອກ-ຕາເວັນຕົກ ເຊື່ອມຕໍ່ລະຫວ່າງປະເທດໄທ ແລະ ປະເທດຫວຽດນາມ.
ພິທີລົງນາມສັນຍາຄັ້ງນີ້ ຕາງໜ້າໃຫ້ລັດຖະບານລາວ ໂດຍແມ່ນທ່ານນາງ ສີສົມບູນ ອຸນາວົງ ຫົວໜ້າກົມການຮ່ວມມືສາກົນ ກະຊວງແຜນການ ແລະ ການລົງທຶນ ແລະ ຕາງໜ້າໃຫ້ລັດຖະບານຍີ່ປຸ່ນແມ່ນທ່ານ ໂຄອິຈິ ທາເກອິ ຫົວໜ້າອົງການໄຈກາ ປະຈຳ ສປປ ລາວ ໂດຍມີພາກສ່ວນທີ່ກ່ຽວຂ້ອງທັງສອງຝ່າຍ ເຂົ້າຮ່ວມເປັນສັກຂີພິຍານ.
ທີ່ມາ http://www.vientianemai.net/teen/khao/1/10973