ວັນທີ 13 ມັງກອນ 2014 ນີ້ ທີ່ສະຖາບັນວິຈິດສິນແຫ່ງຊາດ ໄດ້ເປີດງານວາງສະແດງຜົນງານພາບຖ່າຍວິຖີຊີວິດ ແລະ ສິລະປະວັດທະນະທຳຂຶ້ນ ໂດຍເປັນກຽດເຂົ້າຮ່ວມຂອງທ່ານ ບຸນເລີງ ເວີນວິລາວົງ ສິລະປິນແຫ່ງຊາດ ຮອງປະທານສະມາຄົມວິຈິດສິນແຫ່ງຊາດລາວ ທ່ານ ໄມສິງ ຈັນບຸດດີ ຫົວໜ້າອຳນວຍການ ສະຖາບັນວິຈິດສິນແຫ່ງຊາດລາວ ທ່ານ ສຈ.ດຣ. ສະເຫຼີມສັກ ພິກຸນສີ ຄະນະບໍດີສິລະປະກຳສາດ ມະຫາວິທະຍາໄລຂອນແກ່ນ ພ້ອມດ້ວຍບັນດາແຂກຕາງໜ້າຈາກພາກສ່ວນຕ່າງໆ ແລະ ນັກສຶກສາທັງສອງສະຖາບັນທີ່ກ່ຽວຂ້ອງ ເຂົ້າຮ່ວມ.
ໂຄງການອົບຮົມຮູບແບບປະຕິບັດການຖ່າຍຮູບ ສິລະປະວັດທະນະທຳ ແມ່ນກິດຈະກຳໜຶ່ງຢູ່ໃນກອບການຮ່ວມມື ໃນໂຄງການມໍລະດົກລ້ານຊ້າງ 3 ທີ່ສະຖາບັນວິຈິດສິນແຫ່ງຊາດ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ສປປ ລາວ ກັບມະຫາວິທະຍາໄລຂອນແກ່ນ ປະເທດໄທ ແຕ່ປີ 2011-2013.
ໃນລະຫວ່າງວັນທີ 10-13 ມັງກອນ 2014 ນີ້ ຄະນະສິລະປະສາດ ມະຫາວິທະຍາໄລຂອນແກ່ນ ໄດ້ຈັດໂຄງການເຝິກອົບຮົມ ໃນການຖ່າຍຮູບສິລະປະວັດທະນະທຳ ຂຶ້ນຢູ່ທີ່ສະຖາບັນວິຈິດສິນແຫ່ງຊາດລາວ ໂດຍມີຄູ-ອາຈານ ແລະ ນັກສຶກສາຈາກສະຖາບັນວິຈິດສິນແຫ່ງຊາດ 15 ຄົນ ແລະ ມີຄູ-ອາຈານ ແລະ ນັກສຶກສາຈາກມະຫາວິທະຍາໄລຈາກປະເທດໄທ ເຂົ້າຮ່ວມ 40 ຄົນ ຈຸດປະສົງຂອງການຈັດອົບຮົມຄັ້ງນີ້ ແມ່ນເພື່ອໃຫ້ນັກສຶກສາ ຄູ-ອາຈານ ແລະ ບຸກຄະລາກອນຂອງສອງສະຖາບັນ ໄດ້ແລກປ່ຽນຄວາມຮູ້ ການຖ່າຍຮູບຈາກຊ່າງຖ່າຍຮູບທີ່ມີຄວາມຊ່ຽວຊານໂດຍກົງ 2 ທ່ານ ມາເປັນວິທະຍາກອນ ແລະ ວິທະຍາກອນ ສາຂາວິໄຈສິລະປະວັດທະນະທຳ ໂດຍແມ່ນທ່ານ ດຣ. ສຸເນດ ໂພທິສານ ໄດ້ມາໃຫ້ຄວາມຮູ້ແກ່ນັກອົບຮົມ ກ່ຽວກັບຄວາມສຳຄັນຂອງວິຖີຊີວິດ ແລະ ສິລະປະວັດທະນະທຳ ໃນກຸ່ມປະເທດພາກພື້ນລຸ່ມແມ່ນ້ຳຂອງ ເວົ້າລວມ ເວົ້າສະເພາະແມ່ນວິຖີຊີວິດ ແລະ ສິລະປະວັດທະນະທຳຂອງຄົນລາວ ຮຽນຮູ້ເຖິງເຕັກນິກການນຳໃຊ້ກ້ອງຖ່າຍຮູບໃຫ້ຖືກຕ້ອງ ຕາມຫຼັກວິຊາການ ຮຽນຮູ້ການຖ່າຍຮູບໃຫ້ເປັນມິຕິສິລະປະ ມີສູນທະລີຍະພາບແຫ່ງຄວາມງາມ ປະເດັນທີ່ສຳຄັນແມ່ນການສ້າງສັນຄວາມສຳພັນ ຄວາມສາມັກຄີທີ່ດີຕໍ່ກັນ ການຮ່ວມມືຊ່ວຍເຫຼືອເຊິ່ງກັນ ແລະ ກັນ ຄວາມຮັກແພງລະຫວ່າງນັກສຶກສາ ຄູ-ອາຈານ ແລະ ພະນັກງານທັງສອງສະຖາບັນ ໂດຍອາໄສກິດຈະກຳດ້ານສິລະປະວັດທະນະທຳເປັນສື່ ແລະ ເປັນເອກະລັກຂອງສິລະປະວັດທະນະທຳ ເປັນໜຶ່ງດຽວໃນປະເທດປະຊາຄົມອາຊຽນ.
ຜ່ານການອົບຮົມມາເປັນເວລາ 3 ວັນ ກໍ່ໄດ້ມີຮູບຖ່າຍຈາກການອົບຮົມ ທີ່ໄດ້ຖ່າຍຈາກສະຖານທີ່ຕ່າງໆໃນນະຄອນຫຼວງວຽງຈັນ ແລະ ປະເທດໄທ ມາວາງສະແດງໃນຄັ້ງນີ້ 68 ຮູບ ນອກຈາກນີ້ ຍັງໄດ້ພິມປື້ມຜົນງານໃນການວາງສະແດງຮູບພາບຄັ້ງນີ້ 300 ກວ່າຫົວ ເພື່ອແຈກຍາຍໃຫ້ແກ່ບັນດາແຂກທີ່ເຂົ້າຮ່ວມອີກດ້ວຍ.
ທີ່ມາhttp://www.vientianemai.net