ໃນທ້າຍອາທິດຜ່ານມາ ທ່ານ ສາຍທອງ ແກ້ວດວງດີ ຮອງເຈົ້າຄອງນະຄອນຫຼວງວຽງຈັນ ໄດ້ລົງຢ້ຽມຢາມ ແລະ ຊີ້ນຳວຽກງານການປັບປຸງແກ້ໄຂ ບັນຫາຄົນຂໍທານ ບ້າໃບ້-ເສຍຈິດ ແລະ ເດັກດ້ອຍໂອກາດ ທີ່ສູນເຝີກອົບຮົມ-ປິ່ນປົວຜູ້ຕິດຢາເສບຕິດ ຢູ່ທີ່ເມືອງໄຊເຊດຖາ ນະຄອນຫຼວງວຽງຈັນ ໂດຍມີທ່ານນາງ ດຳດວນ ຈັນທະວົງ ຫົວໜ້າພະແນກແຮງງານ ແລະ ສະຫວັດດີການ-ສັງຄົມ (ຮສສ) ນວ ພ້ອມດ້ວຍພະນັກງານ-ວິຊາການກ່ຽວຂ້ອງ ໃຫ້ການຕ້ອນຮັບ.
ໂອກາດດັ່ງກາວ ທ່ານນາງ ດຳດວນ ຈັນທະວົງ ກໍ່ໄດ້ລາຍງານສະພາບການຈັດຕັ້ງປະຕິບັດ ກ່ຽວກັບການແກ້ໄຂບັນຫາຄົນຂໍທານ ບ້າໃບ້-ເສຍຈິດ ແລະ ເດັກບໍ່ມີຜູ້ປົກຄອງຂອງສູນເຝີກອົບຮົມ ແລະ ປິ່ນປົວຜູ້ຕິດຢາເສບຕິດ ນວ ໄລຍະສົກປີຜ່ານມາໃຫ້ທ່ານຮອງເຈົ້າຄອງຊາບໂດຍສັງເຂບ ເຊິ່ງເຫັນວ່າປັດຈຸບັນໃນສູນເຝີກອົບຮົມດັ່ງກ່າວ ແມ່ນມີຄົນຂໍທານ ທັງໝົດ 71 ຄົນ ຍິງ 19 ຄົນ ເປັນຄົນຕ່າງແຂວງ 12 ແລະ ຍິງ 2 ຄົນ ຜ່ານການລົງຕິດກວດກາຕົວຈິງຍັງໄດ້ພົບເຫັນເປົ້າໝາຍຈຳນວນ 203 ຄົນ ຍິງ 71 ຄົນ ໃນນັ້ນໄດ້ສຶກສາອົບຮົມກັບທີ່ 27 ຍິງ 11 ຄົນ ສົ່ງເຂົ້າສູນ 176 ຄົນ ຍິງ 60 ຄົນ ແລະ ສົ່ງກັບຄືນສູ່ທ້ອງຖິ່ນເດີມ 95 ຄົນ ຍິງ 38 ຄົນ ເພື່ອກັບໄປຊອກຫາວຽກເຮັດງານທຳ ແລະ ປະກອບອາຊີບຢູ່ທ້ອງຖິ່ນຂອງຕົນ ພ້ອມນັ້ນ ທ່ານຮອງເຈົ້າຄອງ ກໍ່ໄດ້ໃຫ້ທິດຊີ້ນຳຕໍ່ການແກ້ໄຂບັນຫາ ແລະ ການຈັດຕັ້ງປະຕິບັດກ່ຽວກັບການປັບປຸງ ແກ້ໄຂ ວຽກງານດັ່ງກາວ ເປັນຕົ້ນແມ່ນ ການເຝິກອົບວິຊາຊີບ ການຈັດຫາວຽກເຮັດງານທຳ ແລະ ອື່ນໆ ເພື່ອເຮັດໃຫ້ຊີວິດການເປັນຢູ່ຂອງເຂົາເຈົ້າດີຂຶ້ນ.
ຈາກນັ້ນ ໄດ້ເດີນທາງໄປສຳຫຼວດດິນປຸກສ້າງ ສູນເຝີກອົບຮົມ ແລະ ປິ່ນປົວຜູ້ຕິດຢາເສບຕິດ ນວ ຫຼັງໃໝ່ ຢູ່ບ້ານເພຍລາດ ເມືອງສັງທອງ ທີ່ຈະເປັນບ່ອນດຳເນີນການກໍ່ສ້າງ 4 ໂຄງການຄື: ໂຄງການປິ່ນປົວ ແລະ ເຝິກອົບຮົບຄົນບ້າໃບ້-ເສຍຈິດ ສູນເຝີກອົບຮົມ ຄົນຂໍທານ ເດັກດ້ອຍໂອກາດ ແລະ ໂຄງການບ້ານຜູ້ເຖົ້າປ່ຽວ ພອຍ ນວ ຈຳນວນ 4 ເຮັກຕາ ເຊິ່ງຄາດວ່າຈະໃຫ້ເລີ່ມຈັດຕັ້ງປະຕິບັດ ໃນຕົ້ນປີ 2016 ເພື່ອເປັນສະຖານທີ່ຮອງຮັບ ແລະ ແກ້ໄຂຊີວິດການເປັນຢູ່ຂອງຈຳນວນຄົນດ້ອຍໂອກາດໃນອະນາຄົດ ເນື່ອງຈາກວ່າສູນເຝີກອົບຮົມຫຼັງເກົ່ານັ້ນ ແມ່ນເປັນສະຖານທີ່ຄັບແຄບ ແລະ ບໍ່ພຽງກັບຄວາມຮຽກຮ້ອງຕ້ອງການໃນຫຼາຍດ້ານ ຈຶ່ງມີຄວາມຈຳເປັນຈະຕ້ອງໄດ້ສ້າງສູນຫຼັງໃໝ່ ເພື່ອແກ້ໄຂບັນຫາປາກົດການຫຍໍ້ທໍ້ຕ່າງໆ ໂດຍສະເພາະແມ່ນຄົນຂໍທານໃນສັງຄົມ ເວົ້າລວມເວົ້າສະເພາະຢູ່ ນວ ໃຫ້ຫຼຸດໜ້ອຍຖອຍລົງ ແລະ ໝົດໄປ.
ແຫລ່ງຂ່າວ:
